Yohanna 2 - Bible en Guidar

Wəza na Yesu na Paya ( 2:1—12:50 ) Əɓel a kana

¹ Aka əvoŋ mahoko'ən na əɓel agəɗək a Kana, aka dələv na Galile. Ma Yesu tat adaka.

² Yesu pak məyani dit gewleɗ nan aka əɓel vani.

³ Adan mbazla akkpapə, ma Yesu təɓsən na: Tahəŋ də mbazla ɓa.

⁴ Yesu azlan sətək na: Ɗakə, mi dəsapaw də is di? Pay naw dəgap tagay ɓa.

⁵ Yaŋ man tənah sit məɗɗaŋ wəza na: An anah sukum pak məɗɗa.

⁶ Gagiyeɗ na gərəm tahəŋ adak sləre, mə Yudeɗ aɗiyaŋ nabbur ziti, taka net pak tay ətaf iŋkile zəga na litər səkatə.

⁷ Yesu aɓsit na: Məknih gagiyeɗiŋ dit iŋkile, aknihinik tuɓurtuɓuru.

⁸ Yaŋ Yesu aɓsit na: Kakaŋ na məmbaɗə, məkə sən afən wən addəv əɓele. Akaŋ sənənka.

⁹ Adan afən wən addəv əɓel anet iŋkile dəkkpaŋgaŋ mbazla naka, dəsən na səŋgay di ɓa, ya məɗɗaŋ wəza məs dəmbeɗtin iŋkile, net asənənka. Afən wən addəv əɓel ayak zələt waŋ məɓelta,

¹⁰ aɓsən na: Ɗəf pak tay əpsit mbazla an nenek daabəŋ sit ɗiy en ayə. An abeyke, wapsit an məs tay nek ɓa. Ya noko, kəzaɓanək mbazla an nenek hã kakaŋka.

¹¹ Aski ətəŋ sekene an Yesu agəɗ daabəŋ a Kana aka dələv na Galile. Arbanək gagdak nani, gewleɗ nan atafnənka.

¹² Dərɓagani, ambatək a Kafarnahum ndəni, mani, milmiŋgiɗin gəm gewleɗ nani, pay diyɗa assoŋ adak ɓa.

Yesu addəv Gəla-na-Maŋgəlva

¹³ Əzləra na Pak net mə Yudeɗ go'oy, Yesu peŋ a Yerusalem.

¹⁴ Arihik məvəlaŋ wasliɗe, timiŋgiɗi, biŋgeɗ na maha dit məddəɗaŋ deleɗ ɗewɗew addəv Gəla na Maŋgəlva.

¹⁵ Yesu helege ləmaslgən ka azlawar arɓehet timiŋgiɗ dit wasliɗe pak səddəv Gəla na Maŋgəlva. Andolet deleɗ net məddəɗaŋ deleɗi aslaŋgan tabəl neti.

¹⁶ Aɓsit məvəlaŋ biŋgeɗ na maha na: Məzargit zəgeɗiŋ səŋka, kədakkpaŋganən gəla na Əbba ka gəla nawman vokum ɓa.

¹⁷ Gewleɗ nan aɗɗumonənək məverni na: Əŋgla na gəla nok tay əzlu a makraw va offo.

¹⁸ Mə Yudeɗ azlanənka, aɓsənən na: Sekene mi kədarbə səm məsəngən na is tat də gbogboŋ naɗɗa zəga vaska di?

¹⁹ Yesu azlani aɓsit na: Məɓzlu Gəla na Maŋgəlva əŋka, wanəsilgin addəv pay hoku.

²⁰ Yaŋ mə Yudeɗ net aɓsənən na: Mərka Gəla na Maŋgəlvaŋ agəɗ əzva kaklaw poɗo kiyən sləre. Yaŋ nok kəmna wakəsilgin addəv wəvoŋ hoku?

²¹ Ya nan apel na aka Gəla na Maŋgəlva dəsan gəɓa zəni.

²² Səza Yesu asil səka əmta, gewleɗ nan aɗɗumonən an məs apeli, yaŋ atafən an Məverin gəm əpel an Yesu apeli.

Yesu asənək an na makra ɗəfa

²³ Aka Yesu asan a Yerusalem gap əzləra na Pak, ɗiy diyɗa atafənka vi awlenin sekeneɗ məs agəɗə.

²⁴ Ya Yesu zək nan dəppan kiyən sit ɓa, vi asinik pakə.

²⁵ Wəray tay ɗəf dənah səngən wən na ɗəf ɓa, vi asənək an na makra ɗəf pakə.