Yohanna 18 - Bible en Guidar

Ərma na Yesu

¹ Adan apel vaska, Yesu mbat dit gewleɗ nan dəgar kiyət məlpaŋ na Kedron, guli net wəleŋɗe tay adaka, ndən toŋ dit gewleɗ nani.

² Yudas məs nawzəm kiyən asənək gəla təki nani, vi Yesu dit gewleɗ nan assərəkaŋgək əkkal adaka.

³ Yudas yi abet məzəlpaŋ gəm məzugaŋ məs Deyeɗe net məsdəlveŋge dit Farisaɗe aslənaŋgə, tahəŋ dit offoɗe mətelti, lalamɗe gəm zəgeɗ nawgaya.

⁴ Yesu asənək məs nawrəhən pakə, agilke yaŋ aɓsit na: Nawa kədawkayanən di?

⁵ Azlan sənən na Yesu mə Nazaret. Yesu aɓsit na: Intə. Yudas məs dəzəm kiyən tay dənɗaŋ adak ziwe.

⁶ Adan Yesu anah sit na: Intə, adereŋgək dirɓe, azbəraŋgək afuŋgu.

⁷ Assohotik əmpa: Naway kədawkayanən di? Azlanənka: Yesu mə Nazaret.

⁸ Yesu amna: Nənah sukumuko, intə. An anaw kədakayawən na, məppet ɗiyiŋ dəmbataŋ.

⁹ Agəɗ vasna vi wən məs apel nak dəknahgəni: Nəzan ɗəf taka səret en kəvay ɓa.

¹⁰ Simoŋ Piyer tay də masalam, aptuwəka, abələk gawla na daya net məsdəlveŋge, apiw sləman dəzəŋ. Iya na gawla van na Malkus.

¹¹ Yaŋ Yesu aɓsən Piyer na: Agul masalam nok a gəlani. Azok na nəsət na huloŋguk məs Afən avaykəŋ ɓa sa?

Məkani Yesu aba Annas

¹² Yaŋ məzəlpaŋ də daya neti, gəm mə Yudeɗ məzugaŋ dərmanən Yesu, aɓrukuni.

¹³ Akanənək daabəŋ aba Hanna, ndəni dəhən Kayafas, daya net məsdəlveŋge addəv əzvaska.

¹⁴ Kayafas vani dənah sit mə Yudeɗ na: Ɗəɗah ɗəf taka dəmtə viyit ɗiy pak naka.

Piyer tay ənəh na gawla na Yesu yi ɓa

¹⁵ Simoŋ Piyer də gawla maɓɓan azbanənək Yesu. Gawla van daya net məsdəlveŋge asənəka, atoŋgək də Yesu a daŋgla na daya net məsdəlveŋgə da.

¹⁶ Na Piyer tay ziwe appaka ama meŋgle. Yaŋ gawla maɓɓan məs daya net məsdəlveŋge asən nak agili, apel sət məgə maddamba, yaŋ tətoŋgən Piyer.

¹⁷ Guluk məgə maddamba nak təɓsən Piyer na: Nok pak səret gewleɗ na ɗəfəŋ kənan ɓa sa? Azlanəka: Intə ɓa.

¹⁸ Balamɗe dit məgaɗe armanənək offo, tay əluwəni, vi səmyã tay. Piyer pak tay ziwe dənɗaŋ əlu offo.

Daya net məsdəlveŋge tay əssohon ma Yesu

¹⁹ Yaŋ daya net məsdəlveŋge assohõn ma Yesu aka wən net gewleɗ nani gəm aka ərba zəga nani.

²⁰ Yesu azlan sən na: Kerekere nəpel sit ɗiyi. Pay pak nərbək zəga addəv gəla nakkal net mə Yudeɗi gəm addəv Gəla na Maŋgəlva, a təki mə Yudeɗ adawsapaŋ pakə, tay məs nəpel də mahaɗama ɓa.

²¹ Vi mi kədassohõn maw di? Assohẽt met ɗiy məs dədaprəmən an məs nənah siti, net asənənək an məs nənahə.

²² Adan Yesu apel wənəska, taka səret məzugaŋ dəssoŋ adak argak Yesu aka tapaslayən, dawnəh na: Vas kədawzlan sən daya net məsdəlveŋge sa?

²³ Yesu azlan sənək na: An də tiveni nəpel ɓa na, arbani. Ya an də tiveni nəpel vimi kədargu di?

²⁴ Yaŋ Hanna aslən məɓrukun sən Kayafas daya net məsdəlveŋge.

Piyer tay ənəh na dəsən Yesu ɓa əmpa

²⁵ Pay nani Simoŋ Piyer tay adak ziwe, tay əlu offo. Yaŋ aɓsənən kan na: Nok pak naret gewleɗ nan kənan sa? Yaŋ aɗamani, amna, intə ɓa.

²⁶ Taka naret belemɗe na daya net məsdəlveŋge, məlmən ɗəf məs Piyer abəl sləman naka aɓsən na: Nuluk addəv guli net wəleŋɗe dəndən ɓa sa?

²⁷ Piyer aɗaman wən nan əmpa. Yaŋ ləŋ gəmnda ahəmə.

Yesu aba Pilat

²⁸ Vit pummo nan pumu, akanənək Yesu kan səna Kayafas da addəv gəla nawtawwəna. Ɗiy en dərmanən van dətoŋgoŋ addəv gəla nawtawwən van ɓa, vi adarnokoŋ ɓa, vi dəzəmaŋgən way na Pak.

²⁹ Pilat kan vit azet appaka, assohẽt na: Dolgoy na mi kəkiyaŋ aka ɗəfəŋ di?

³⁰ Azlanənka, aɓsənən na: Va ɗəf məgəɗ mbərayni ɓa na məki suk na kəta ɓa.

³¹ Pilat aɓsit kan na: Məgəma mətawwən akan dəvokum va aza mahenziŋ nokum. Mə Yudeɗ azlanənək na: Məpəl səmi tive nawbay ɗəf ɓa.

³² Vi an Yesu apel dəgəɗgən gesiŋ, məs apel narban əmta məs adamta.

³³ Pilat kan toŋ addəv gəla nawtawwən əmpa, ayak Yesu, anah sən na: Nok istə məlĩ net mə Yudeɗ sa?

³⁴ Yesu azlanəka: Istə kənah sən kiyuk sa, ɗiy meɓɓet dəpeleŋ sukun aka wən nawa?

³⁵ Pilat azlanəka: Mə Yuda nan sa? Həlfiŋgiɗuk dit deyeɗe net məsdəlveŋge dəkikun suwa. Mi kəgəɗ di?

³⁶ Yesu azlanəka: Məlĩ naw naka dəlvəŋki ɓa. Va məlĩ naw naka dəlvəŋki na, kəta gewleɗ naw wagayaŋ vi adappawən avet mə Yudeɗ ɓa. Ya kakaŋ məlĩ naw naŋki ɓa.

³⁷ Pilat aɓsən kan na: Məlĩ kənan sa? Yesu azlan na: Istə kənah na məlĩ nani. Məwəwi, nəde aka dəlvəŋka, vi kawpel aka gegesiŋgi. Ɗəf na gegesiŋ pak aprəm wəlawa.

³⁸ Pilat aɓsən na: Mi gegesiŋ di? Yaŋ Pilat agil azet mə Yudeɗ əmpa, aɓsit na: Naw, heslepe tay nərah narma ɗəfəŋ ɓa.

Mətawi wən namta aka Yesu

³⁹ Ɗayɗay na, nawpəl sukum mə fərsəna taka də wəzləra na Pak, kəŋglaŋgək kan nəppan sukumgən məlĩ net mə Yudeɗ sa?

⁴⁰ Ya anzlaŋgək vaŋvəl kan əmpa dawnəh na: Ɗəf aŋki ɓa, Barabbasi. Barabbas van məvoŋtive yi.