Yohanna 17 - Bible en Guidar

Yesu tay əkkam viyit gewleɗ nani

¹ Adan Yesu apel vaska, aslan haran a disiŋ, amna: Aw Afəni, pay agapka. Agagdakan Wətuko vi Wətən dəgagdakokgəni.

² Va kəpsən gbogboŋ aket ɗiy pakə, vi dəpsitigən zeŋgile an faɗ sit ɗiy məs kəpsin pakə.

³ Zeŋgile an faɗə, ndəni dəsənkungən na istə kaka' Maŋgəlva an gesiŋ gəm Yesu Kristu məs kəslənə.

⁴ Naw nəgagdakokuk aka dəlvafuŋ, nəggrakək wəza məs kəvay naɗɗa vi nəɗɗagəni.

⁵ Kakaŋ na, is Afəni, agagdakaw abok də gagdak məs nəsaw dəndən abok tak dələv dəsangəni.

⁶ Nərbanək iya nok azet ɗiy məs kəvay səka dəlva, nokuŋgə lahəŋka yaŋ kepsiwe, armanənək əpel noko.

⁷ Kakaŋ asənənək na, an kəvay pak səzok ade.

⁸ Vi nəpsitik əpel məs kəvayə, atafənka. Asənənək gesiŋ na səzok nəde, atafənək na istə kəslənwa.

⁹ Naw viyit nədakkama, vi dələv nəkkam ɓa, viyit ɗiy məs kəvayə, vi nokuŋgə.

¹⁰ En naw pak nokəŋ, nok pak nawəŋ, məgagdakawi dənɗaŋ.

¹¹ Intat aka dələv əmpa ɓa, ya neti tahəŋ aka dəlva. Naw in tat əmbat azoko. Aw Afən salala, age addəv iya nok məs kəvayə, vi dəssoŋgən taka va məsam taka.

¹² Aka nədawsaw dənɗaŋ, nəgek də iya nok məs kəvayə. Nətərike, tay dəzə səret abbər ki wətən əza ɓa, vi an Əver apel dəgəɗgəni.

¹³ Kakaŋka in tat əmbat azoko, in tat əpel wənəs aka dəlva, vi ənnek naw dəsangən məknahən addəvti.

¹⁴ Naw nəpsitik əpel noko, yaŋ dələv ezele, vi naka dəlvəŋgə ɓa, va naw naka dələv nan ɓa.

¹⁵ Nəkkam na vi kəndegin səka dələv ɓa, vi kəgegin səza Mbərayən.

¹⁶ Naka dəlvəŋ ɓa, va naw naka dələv nan ɓa.

¹⁷ Akkpeŋget salala də gegesiŋ, əpel noki gegesiŋ.

¹⁸ Va kəslənu aka dəlva, in tat əslinit aka dələva.

¹⁹ Nəppanək zu suk ammbeti vi dəsoŋgən məppanən zit suk ammba gegesiŋ.

²⁰ Viti nəkkam kaka ɓa, in tat əkkama'e viyit ɗiy məs dədawtafwən də əpel neti,

²¹ vi pakgit dəssoŋgən taka, va is Afən kəsok addəvwa gəm in addəvko, ka net pak dəssoŋgən addəvmə, vi dələv dətafgən na, istə kəslənwa.

²² Naw nəpsitik gagdak məs kəvayə, vi dəssoŋgən taka, va nam məsam taka.

²³ In addivti is addəvwa, vi dəssoŋgən əsap taka lewlewi. Vi dələv dəsəngən na istə kəslənwa, kəŋgluwik va kəŋgluwa.

²⁴ Aw Afəni, en məs kəvayə, nəŋgəl na a təki naw nəsawa, net pak dəssoŋgən də iyna, vi dulanəngən gagdak naw məs kəvayə, vi kəŋgluwək tak əɗi gabba dəlva.

²⁵ Aw Afən məs təstəsə, dələv dəsənuk ɓa, ya naw nəsənkuko, ya ɗiy en asənənək na istə kəslənwa.

²⁶ Nərban sitik iya noko, wanərban siti'e, vi əŋgla məs kəŋgəluwəŋ dəsangən addəvti, va nəsaw addəvti.