Yohanna 16 - Bible en Guidar

¹ Nənah sukum wənəs pak na vi kədawrahaŋ zəga nazbərgukum ɓa.

² Wagilgukumən səddəv gəla nakkal net Yudeɗi. Ya pay tay əzzani, ɗəf dəbaykum pak waɗɗum na Maŋgəlva adawgagdakani.

³ Waɗɗanən vaska vi dəsənən Afən ɓa, in ɓa.

⁴ Nənah sukum vasna, an pay nan adeke, kəɗɗumonəngən na naw nənah sukumko. Nənah sukum wənəs də ətəŋ nan ɓa, vi in tat də munokum.

Wəza nə Zeŋgile Salala

⁵ Kakaŋ in tat əmbat aza məs dəslənwa, ya ɗəf tay taka səmbokum dəssohõw na: Aŋga kədodok di ɓa.

⁶ Vi nənah sukum wənəski mokrokum azlahə.

⁷ Ya gesiŋ nədawnah sukum: Moggoni azokum an nəmbatka, an nəmbat ɓa məzəbbah nak ade na azokum ɓa. Ya an nəmbatka, wanəslən sukum.

⁸ Ya nan an adeke, warban mambraya, təstəsə, gəm ətawwən sit ɗiy naka dəlva.

⁹ An dəwəlsən mambray na: Vi dətafwən ɓa.

¹⁰ An dəwəlsən təstəs na: Vi in tat əddaw aza Afəni, kuluwən na əmpa ɓa.

¹¹ An dəwəlsən ətawwən na: Vi mətawi wən aka daya naka dəlvəŋ səkay.

¹² In tat dit zəgeɗ diyɗa nawnah sukum əmpa, ya kəɓəsin na kakaŋ ɓa.

¹³ Pay Zeŋgile na gegesiŋ adazzani, wadawgukum addəv gegesiŋ pakə. Vi apel na na kiyən ɓa, ya wanah an adaprəm pakə, wanah sukum zəga an dədazzani.

¹⁴ Nan wagagdakawa, vi wagəm səza an naw kawnah sukum.

¹⁵ Zəga na Əbba pak nawi. Vini nənah na: Əmpəs wagəm səza an naw kawnah sukum.

Əzəm sahã akkpaŋgək ənneke

¹⁶ Abe siɗikke aŋ na kuluwən na ɓa, dərɓagan siɗikke əmpa wakuluwəni.

¹⁷ Gewleɗ nan apeleŋgik a walaŋ zit na: Mi adawnah səməs di? Abe siɗikke aŋ na kuluwən na ɓa, dərɓagan siɗikke əmpa wakuluwəni. Gəm vi intat əmbat aza Afən əŋ di?

¹⁸ Aɓɗaŋ kan na: Mi as van adawnəh abe siɗikkeŋ di? Məsən an adawpel akan ɓa.

¹⁹ Yesu asənək na met aka əssohoni, aɓsit na: Aka an nənah na: Abe siɗikke aŋ na kuluwən na ɓa, dərɓagan siɗikke əmpa wakuluwəni kedassohonən ma zukum sa?

²⁰ Gesiŋ gesiŋ nədawnah sukum: Wakəhəmaŋgə wakəɓuhun mokum, ya mamba dələv wanneken zəni. Wakəssahanən zukum ya wəssahan zukuməs wakkpaŋ ənneke.

²¹ An guluk tat əɓay uwa, mat wasan ɓəɓiɓəɓi vi pay nat agapka. Ya an tuwak muzliya, taɗɗumon əzəm sahã nat ɓa sən ənneke vi tuwək ɗəf egge.

²² Vaski yi'e nokum, kakaŋ na mokum tay ɓəɓiɓəɓi, ya wanəmsak ulukum. Mokrokum wanneki, ɗəf tay nawgəm ənnek nokum ɓa.

²³ Pay nan na, zəga tay kədassohowən ɓa. Gesiŋ gesiŋ nədawnah sukum: An kədassohoŋ ava Afən də iya naw pak wapsukum.

²⁴ Hã kakaŋka, tay an kəssohoŋ də iya naw ɓa. Məssõhu, wakərəhaŋgə, vi ənnek nokum dəknahgəni.

Yesu məskə wəla dəlva

²⁵ Zəgeɗis pak də əmpa kiwən nəpel sukum, ya pay tay əzzan məs nəpel sukum na də əmpa kiwən ɓa, wanəpel sukum an dəwəl sən Afən appaka ta'ə.

²⁶ Pay nani, wakəssohoŋ də iya nawa. Nənah sukum na, wanəkkaman Afən vikum ɓa.

²⁷ Afən zək nan aŋglukumko, vi kəŋgluwənka, kətafənək na səza Maŋgəlva nəde.

²⁸ Səza Afən nəgil nəde aka dəlva. Kakaŋ in tat əppan dəlva in tat əmndaw aza Afəni.

²⁹ Gewleɗ nan aɓɗaŋ na: Awla, kakaŋ na is tat əpel kotakə məza də əmpa ki wən ɓa.

³⁰ Kakaŋ məsənək na kəsənək zəga pakə. Kəŋgəl ɗəf dəssohongən mok ɓa. Vini mətaf na səza Maŋgəlva kəgili.

³¹ Yesu aɓsit na: Kakaŋ na kətafaŋgək kan sa?

³² Mula pay tay əzzani, agapək səkay, kawtəragukumi, naway pak əmbat azet zəgeɗ nani, wakəppawən takərguwa. Ya takərgu nan ɓa, vi Afən tay də ina.

³³ Nənah sukum pak vasna vi kərahaŋgən zazay də əsler də iyna. Wakəssoŋ mokum ɓəɓiɓəɓi aka dəlva, ya məsok zukum, naw nəskak wəla dəlva.