Yohanna 14 - Bible en Guidar

Yesu yi tive nadda aza Afəni

¹ Yesu aɓsit gewleɗ nan na, mokrokum adazlzlaɓ ɓa. Mətaf Maŋgəlva, mətafwa.

² Təki tay diyɗa eŋgil ana Əbba da. Va vaski ɓa na, kəta wanənah sukum na, wanəmbat əzaɓan sukum təkiya sa?

³ An nəmbatək əzaɓan sukum təkiya, wanəmili, wanəkukum azawa, vi a təki naw nəsawa, nokum pak kəssoŋgən adaka.

⁴ Təki nədaddawa, kəsənənək tive nani.

⁵ Tomas aɓsən na: Daya məsən təki kədaddok ɓa, mbarmbar mədawsən tive nan di?

⁶ Yesu azlan sən na: Naw, intə tive, gegesiŋ gəm zeŋgile. Ɗəf tay nawmbat aza Afən an də iyni ɓa ɓa.

⁷ Va kəsənwənka, wakəsənən Əbba'e. Təŋ kakaŋka kəsənnənka, kulanənka.

⁸ Filip aɓsən na: Daya, arban səm Afəni wasan səm məkə.

⁹ Yesu aɓsən na: Filip nənziyək də munokum diyɗa, yaŋ kəmna kəsənu ɓa? Ɗəf duluwa, awlak Afəni. Mbarmbar nok kədawnəh na arban səm Afəni di?

¹⁰ Kətaf na in tat addəv Afəni, Afən tam tay addəvwa ɓa sa? Əpel məs naw nədawpel sukum, na kiywi nədawpelin ɓa. Afən məs dəsan addəvu dədaɗɗa wəza nani.

¹¹ Mətaf an nədawnah sukum: In tat addəv Afəni, Afən tam tay addəvwa. An kətafən əpel naw ɓa, mətaf viyit wəzeɗe zək neti.

¹² Gesiŋ gesiŋ nədawnah sukum: Ɗəf dətaf wəzeɗe məs nəgəɗə, wagəɗ mədaykiyit eski, vi naw aza Afən nədawmbata.

¹³ An məs kəssohoŋ də iya naw pak, wanəɗa, vi Afən dəsangən məgagdakan addəv Wətəni.

¹⁴ An kəssohowən də iya naw pak, naw wanəɗa.

Iynama nawslən Zeŋgile Salala

¹⁵ Yesu anahək əmpa na: An kəŋgluwənka, wakərmenin mahenziŋɗe en nawa.

¹⁶ Naw wanəkkaman Afən dəslən sukumgən məzəbbah mbərni, ndəni Zeŋgile Salala, vi dəsangən də munokum hã faɗə.

¹⁷ Əmpəs na gegesiŋ məs dələv aɓap na ərəh ɓa, vi awlan ɓa, dəsənən ɓa. Ya nokum kəsənnənka, vi tay a maŋgavokum, wasan addəvkum.

¹⁸ Nəppokum na mitiweɗ ɓa, wanəde azokum.

¹⁹ Abe aŋ siɗikke, dələv awlu na əmpa ɓa, ya nokum wakuluwəni. Vi naw madaraw nani, nokum pak wakəssoŋ modorokum.

²⁰ Pay dəpaska, wakəsənən na, naw in tat addəv Əbba, va kəssoŋ addəvwa, in tam addəvkum.

²¹ Ɗəf dərma məs nəɗi naɗɗa, gəm dəɓe' səni, ndəni dəŋgluwa. Afən waŋglu ɗəf an dəŋgəluwa, naw pak wanəŋgluwa, wanərban zu azani.

²² Yuda məza Iskariyot ɓa aɓsən na: Daya, vimi adaɗɗa kədarban zuk azam məza sən dələv ɓa di?

²³ Yesu azlanka, aɓsən na: An ɗəf aŋgluwəka, warma əpel nawa, Əbba waŋgluwa. Waməde azani, waməzaɓ təki nassa nam azani.

²⁴ Ɗəf məs dəŋgəlu ɓa arma na əpel naw ɓa. Əpel məs kədaprəmaŋgə, na kiywi ɓa, an na Afən məs dəslənwi.

²⁵ Nəpel sukumuk vas aka nəsaw də mənokum.

²⁶ Ya məzəbbaha, Zeŋgile Salala məs Afən adawslən də iya nawa, nan warban sukum zəga pakə, waɗɗumon sukum an məs nəpel sukum pakə.

²⁷ In tat əppan sukum zəzaya, in tat əpsukum zazay nawa, va dələv adapsukum nədapsukum ɓa. Mokrokum adazlzlaɓ ɓa, ageslne' ɓa.

²⁸ Kəprəmənək nənah sukumuk na, wanəmbatə, ya wanəmil azokum. An kəŋgəluwənka wakənnekenən zukum, vi in tat əmbat aza Afən, vi Afən adayək kiywa.

²⁹ Kakaŋ na nəpel sukumuk tak dəɓəl əɗɗa ɓa, vi pay adaɗɗa na kətafəngəni.

³⁰ Zəga tay nədawpel də munokum diyɗa əmpa ɓa, vi məlĩ na dəlvəŋ tay əzzani. Haran nan tay azaw ɓa.

³¹ Ya vi dələv dəsəngən na nəŋgluwək Afəni, va Afən aɗi naɗɗa, vas nədaɗɗani. Məsili, mədam səŋka.