Yohanna 13 - Bible en Guidar

Pay nan an dərɓe faɗ addəv gəm go'o də Yerusalem ( 13:1—19:42 ) Yesu tay əɗɗa tilit gewleɗ nani

¹ Tak wəzləra na Pak, Yesu asənək na pay nan agapək nappan dəlvəŋ kawmbat aza Afəni. Aŋgluwik ɗiy en nan dəssoŋ aka dəlva, aŋgluwik sawɓa.

² Aka adawzəmaŋ way də moskoyo, diyabəl aguluk əɗɗum mbərayən a makra Yudas, wətən Simoŋ Iskariyot, vi kawzəm ki Yesu.

³ Asənək na Afən apsinik zəgeɗ pak ammba vani, səza Maŋgəlva ade, wamndan aza Maŋgəlva.

⁴ Asilik səka waya, aggbukuk lukut nani, agəm gabaga, aynani.

⁵ Yaŋ amet iŋkile addəv ŋgefleŋ, atəŋgək əɗɗa tilit gewleɗ nani, akəlɓit iŋkile də gabaga məs aynə naka.

⁶ Ndən gap aza Simoŋ Piyer. Piyer aɓsən na Daya is na, əɗasu təlwa?

⁷ Yesu azlani, aɓsən na: Kəsən na an məs nədaɗɗaŋ kakaŋ ɓa. Ya abeŋ siɗikke akəprəm gabbani.

⁸ Piyer aɓsən na: Agəɗ na ɓa, kəɗasu na ɗah təlu ɓa. Yesu aɓsən na: An nəɗa suk ɓa na, haran nok tay azaw ɓa.

⁹ Simoŋ Piyer aɓsən na: An vaski Daya təlwi kaka' ɓa, vaw də kiyu paki.

¹⁰ Yesu aɓsən na: Ɗəf dəslslay na, wəray nan na əɗɗa təlni kaka'ə vi zən salalayi. Salala kənanaŋ, ya pakgukumi ɓa.

¹¹ Vi asənək ɗəf məs nawzəm kini, sən aski anah na: Pakgukum kənanaŋ salala ɓa.

¹² Səɓa Yesu agrak əɗɗa sit tilti, aguluk lukut nani, asanək əzəm əmpa, aɓsit na, kəprəmənək gabba an nəgəɗ sukuməŋ sa?

¹³ Nokum, munokum tat əyəwən na Mərbəzəga mãy Daya, gesiŋ kədawnahaŋgə, vi intə gesiŋ.

¹⁴ Adan in Mərbəzəga gəm Daya nəɗa sukumuk təlkum na, nokum pak aslək kəɗanəngən təlkum a walaŋ zukum.

¹⁵ Nəɗɗa vasna vi karban sukumi, vi nokum pak kəɗɗanəngən va naw nəɗɗa sukum.

¹⁶ Gesiŋ gesiŋ nədawnah sukum: Məgəɗ wəza aday na ki daya nan ɓa, maslən aday na ki məs dəslən ɓa.

¹⁷ An kəsənənək vaska, zukum wasan neki, an kəɗɗanənka.

¹⁸ Nəpel akokum pak ɓa, nəsinik ɗiy en nəweli. Ya aslək an Əver apel dəgəɗgəni: Məs dədawzəm way də iyna, akkpaŋgək akawa.

¹⁹ Nənah sukum dafsən tak dəgəɗgəni. Vi pay adazzan na, kətafəngən na intə iyna.

²⁰ Gesiŋ gesiŋ nədawnah sukum: Ɗəf dətaf maslən nawa, atafwəka. Ɗəf dətafwa, atafək məs dəslənwa.

Yesu tay ərban na Yuda nawzəm kini

²¹ Səɓa Yesu apel wənəska, attapka, apel amna: Gesiŋ nədawnah sukum ɗəf taka səmbokum wazəm kiwa.

²² Gewleɗ nan awlanənək ziti, dəsənən aka nawa adawpele di ɓa.

²³ Taka səret gewleɗ nan məs Yesu aŋgələ, tay ɗewwe a maŋgava Yesu.

²⁴ Piyer Simoŋ amirzi'ik də haran dəssohongən na aka naway apel di.

²⁵ Gawla nak kan dəza Yesu aɓsən na: Daya, naway di?

²⁶ Yesu azlan na: Ɗəf an nədawyop mepteke aret teɓ kapsəni, ndəni. Yaŋ ayop mepteke, agəm apsən Yudas wətən Simoŋ Iskariyot.

²⁷ Səza Yuda azəm mepteke naka, Satan toŋ a makrani. Yesu aɓsən na: An kədaɗɗa aɗɗa gu'u.

²⁸ Ɗəf tay səret sədak taka dəprəm vimi anah sən vas di ɓa.

²⁹ Adan Yudas yi mərəm gabalə, ɗiy meɓɓet aɗɗumon na Yesu anah sən dəlgən əlbah zəga məs wərayəm azan na wəzləra, awaniɓa vi dəpsitgən zəga sit məssehẽŋɗe.

³⁰ Səza Yuda ataf mepteke naka, ndən ləŋ viti. Dəfəɗ atirke.

Wən məɗiyən meleketeni

³¹ Səza Yuda agili, Yesu amna: Kakaŋ na məgagdakani Wətən Ɗəfa, məgagdakani Maŋgəlva dəndəni.

³² An məgagdakani Maŋgəlva dəndəni, Maŋgəlva pak wagagdakan ndən zək nani, wagagdakan ləŋgə.

³³ Kirtuwa in tat də munokum pay siɗikke tagay. Wakəkayawəni, va nənah sit mə Yudeɗ na: Kəɓapaŋ na əmbat a təki məs nədadaw ɓa, vas nədawnah sukum kakaŋka'e.

³⁴ In tat əɗi sukum wən meleketeni: Məŋglu zukum. Va nəŋglukum, nokum pak məŋglu zukum.

³⁵ Aza aski ɗiy pak adawsənnən na gewleɗ naw kənanaŋgə, an əŋgla tay a walaŋkum.

Yesu tay ərban na Piyer wanah na dəsən ɓa

³⁶ Simoŋ Piyer aɓsən Yesu na: Daya aŋga kədaddok di? Yesu azlan na: A təki nədaddawa, kəɓap na əzbaw kakaŋ ɓa, ya wakəzbaw laha.

³⁷ Piyer aɓsən na: Vimi nəɓap na əzbok kakaŋ ɓa di Daya? Nəzaɓanək zu nappan zeŋgilew ammboko.

³⁸ Yesu azlanək na: Əppan zeŋgilok ammbawa? Gesiŋ gesiŋ nədawnah suko: Gəmnda adawhəm man pa' taka wakənah na kəsənu ɓa təl hoku.