Yohanna 12 - Bible en Guidar

Miryam təmanək tursan aka tel Yesu

¹ Əvoŋ sləre tak əzləra na Pak, Yesu mbat a Betani a təki Lazar məs asilgən səret ɗiy mimtit nak asani.

² Aɗɗaŋ sənənək əzəm adaka, Marta məzuɗakən, Lazar tam tay aret ɗiy en dəzəmaŋ dəndəni.

³ Yaŋ Miryam təgəm tursan na nard məs əlbah nan tuwãh diyɗa də dədak litər, təmanək aka təl Yesu, yaŋ təkəlɓət tələn van də muhur kiyta. Gədəv gəla pak aknahək də məŋgənən.

⁴ Yaŋ Yudas Iskariyot, taka naret gewleɗ nan, an məs nawzəm kiyən amna:

⁵ Vimi məvəlni tursan vanəŋ koɓeɗ səkat hoku kapsit məssehẽŋɗe ɓa di?

⁶ Anah vasna, sasahĩt məssehẽŋɗe awəl ɓa, vi məhãlayi. Mərəm gabal net deleɗi, tay əhãl deleɗ məziyit addəvən.

⁷ Yaŋ Yesu anah kan na: məppata, təzaɓan na ammba pay an nawndəkwi.

⁸ Vi Məssehẽŋɗe tahəŋ də munokum pay pakə, ya naw na, kərəhwən na pay pak ɓa.

Wən mətuvur aka Lazar

⁹ Ɗiy diyɗa səret mə Yudeɗ aprəmənək na Yesu tay adaka, yaŋ addoŋ adak vi Yesu kaka'i ɓa, sap vi kawla Lazar məs asilgən səret ɗiy mimtitiŋki yi.

¹⁰ Deyeɗe net məsdəlveŋge aziwgininik na nawbay Lazar'e.

¹¹ Vi aka wən nani mə Yudeɗ diyɗa appetini, atafən Yesu.

Yesu tay ətoŋ a Yerusalem

¹² Vit pumpum nani, vanday net ɗiy dəzzoŋ a wəzləra nak aprəmək na Yesu tay əzzan a Yerusalem.

¹³ Akslohõnguk va gugozlo, agilyoŋ ələmsəni, tay ənzlaŋ vaŋvəl na: Hozana, əzaɓ aka məzəzzan də iya na Daya, məlĩ na Israyel.

¹⁴ Yesu arahək wət koro ndən peŋ akan va məverin na:

¹⁵ Kəgeslne' ɓa waŋ na Siyon. Məlĩ nok yaŋ əzzani, tay akat bəlatək na koro.

¹⁶ Aka ətəŋ nan na, gewleɗ nan dəprəmnən gabban ɓa. Ya adan Yesu atoŋ addəv gagdak nani, aɗɗumonənək na akan məver zəgeɗiski, anet zəgeɗ vetis məgəɗ səni.

¹⁷ Vanday net ɗiy dəssoŋ dəndən gala aya Lazar səddəv magamasə, asilgən səret ɗiy mimtit nak apelinik məs awlaŋgə.

¹⁸ Sən aski yi vanday net ɗiy diyɗa azzoŋ ələm səni, vi aprəmənək na, tay əɗɗa sekeneɗi.

¹⁹ Yaŋ Farisaɗe, anahaŋ awalaŋ zit na: Kulanənka, tay məs kədawtəraŋ ɓa, mula, ɗiy pak tay əzbanəni.

Grekɗe meɓɓet tay əkayanən Yesu

²⁰ Grekɗe tahəŋ taka taka aret ɗiy en dəzzoŋ əgagdakan Maŋgəlva pay na wəzləra,

²¹ azzoŋguk aza Filip ɗəf na Betsayda na Galile, assohõnən dawnah sən na: Daya, mam aka ula Yesu.

²² Filip mbat, anah sən Andre yaŋ anah sənən Yesu ndəɗaŋ sulegit pakə.

²³ Yesu azlan sit dawnah na: Pay agapək kakaŋka, ka gagdak na Wətən Ɗəf dərbangən zəni.

²⁴ Gesiŋ gesiŋ nədawnah sukum: An zeŋve na haykəmari dəbət aka dəlvafuŋ dəmtə ɓa wasan takərgəni. Ya an amtəka, asna waɗi aran diyɗa.

²⁵ Ɗəf dəŋglu zeŋgilen pak wazani. Ya ɗəf dəzel zeŋgilen aka dəlvəŋka, wakõhgən faɗə.

²⁶ An ɗəf aŋgələk əgəɗ su wəza, dəzbawa, vi a təki naw nəsawa adaki məgəɗ wəza an naw adawsani. An ɗəf tay əgəɗ su wəza, Afən wagagdakani.

Yesu tay əpel aka əmta nani

²⁷ Yaŋkəŋ na makraw azlzlaɓka. Mi nədawnah di? Əbba akõhgu səddəv ənziyaŋka? Ya sən aski nəde aka pay vanəŋka.

²⁸ Əbba, agagdakan iya noko! Əpel kan pay sə disiŋ na: Nəgagdakanəka, wanəgagdakan əmpa.

²⁹ Səza vanday net ɗiy dəssoŋ adak aprəməni, aɓɗaŋ na: As əhãy na buni. Ɗiy meɓɓet aɓɗaŋ na: Maslay dəpel səni.

³⁰ Yesu aɓsit na: əpelis dəde viyu ɓa, vikumi.

³¹ Kakaŋki pay nawtawwən aka dəlvəŋka. Kakaŋki adazganən məlĩ na dəlvəŋ appaka.

³² Naw an məslawi səka dəlvafuŋ na, wanətiɗ ɗiy pak azawa.

³³ Də əpeliski arban zev əmta məs adamta.

³⁴ Vanday net ɗiy azlan sənənək na: Məprəmək səddəv mahenziŋ na, Kristu wasan hã faɗə. Ya mbari nok kədawnəh na kawslani Wətən Ɗəf a disiŋ tagay di? Naway Wətən Ɗəf vanəs di?

³⁵ Yesu azlan sitik na: Əkeɗeɗe tay a walaŋkum pay siɗikke tagay. Mədaw aka əkeɗeɗe tay də mənokum, vi guzli adawgulkum ɓa, vi məzudaw ara guzli awsən a təki məs adaddan ɓa.

³⁶ Aka mənokum tat də əkeɗeɗe'e, mətaf əkeɗeɗe'e, vi kəkkpaŋgaŋgən kirtin əkeɗeɗe'e. Səza Yesu anah wənəska, ndən mbat haɗam faraɗa səzeti.

Mə Yudeɗ tay ətafnən Yesu ɓa

³⁷ Də agəɗ sekeneɗ ama heret gbaŋkəŋ pak dətafən ɓa.

³⁸ Vi əpel na məs kəleŋ na Isaya dəknahgəni, məs anah na: Daya, naway dətaf an aprəm səmam di? Sən naway Daya arban gbogboŋ na van di?

³⁹ Sən aski dəɓap ətafən ɓa, vi Isaya anahək əmpa na:

⁴⁰ Maŋgəlva atipik hereti, aɓɓəlanək makreti, vi adawlaŋ də heret ɓa, makret adawsən zəga ɓa, vi adawmilyoŋ azaw in kawmbəlgit ɓa.

⁴¹ Isaya aneh zəgeɗis na: Vi awlak gagdak nani, apelik akani.

⁴² Ya də as pak diyɗa səret ɗiy gugriɗ atafənka. Ya sən wən net Farisaɗe, dərbanən zit ɓa, vi adawgilgitin səddəv gəla nakkal net mə Yudeɗ ɓa.

⁴³ Vi gagdak səzet ɗiy aŋglaŋ dayki an səza Maŋgəlva.

Ətawwəna də əpel na Yesu

⁴⁴ Yaŋ Yesu anah dayadaya na: Ɗəf an dətafwa, anaw ataf ɓa, ana məs dəslənwi yi.

⁴⁵ Ɗəf məs duluwa awlak məs dəslənwa.

⁴⁶ In əkeɗeɗe'e, nəde aka dələv na, vi ɗəf məs dətafu pak adawsan ara guzli ɓa.

⁴⁷ An ɗəf aprəmək əpel nawa, ya dəzban ɓa, intə nawtawwən akan ɓa, vi nəde kawtaw wən aka dələv ɓa, vi kawkõhgən dəlvi.

⁴⁸ Ɗəf məs dəzgaw pak, dətaf əpel naw ɓa, tay də ɗəf an nawtaw wən akan səkayə, əpel məs nəpeliŋki nawtaw wən akan pay əgrak dəlva.

⁴⁹ Vi naw nəpel na kiyu ɓa, ya Afən məs dəslənu dəvan dədawɗi su wən nani, dədapsu an nədawpele də an nədarba.

⁵⁰ Nəsənəka, məs aɗi su wən nan van zeŋgile an faɗi. An məs nədawpele, vaski Afən anah suwa, vas nədawpelin.