Yohanna 11 - Bible en Guidar

Əmta na Lazar

¹ Ɗəf maɓɓan tay gbəgba'a, Lazar na Betani yi, walaŋgəla nat Miryam dət Marta məlməta.

² Miryam na, ndətə akən təman tursan aka təl Daya, təɓəlkət tələn də muhur kiyət nakə. Məlmət Lazar yi gbəgba'a.

³ Milmiŋgiɗin məguluŋgit nek slən azan ənah sən na: Awle Daya, ɗəf məs kəŋgəl nak gbəgba'i.

⁴ Adan Yesu aprəma, amna: Gbəgba' əs namtay ɓa, nawgagdakan Maŋgəlva yi, vi Wətən Maŋgəlva dərahgən gagdak dəndəni.

⁵ Yesu aŋglutək Marta dət məlməta gəm Lazar.

⁶ Adan aprəm na Lazar gbəgba'i, avoŋguk sula əmpa a təki asani.

⁷ Yaŋ səɓɓan anah sit gewleɗ nan na: Məmil səm a Yude.

⁸ Yaŋ gewleɗ nan azlan sənən na: Mərbəzəga Fari mə Yudeɗ adawkoyokun naskuk dit gərmeŋge ɓa, yaŋ kədaŋgla əmilye adaka?

⁹ Yesu azlan na: Təbəz kəlaw kiyən sula yi addəv əsɓəta ɓa sa? An dəf tay ədaw kapaya, aŋgbay ɓa, vi tay ula əkeɗeɗe naka dəlvəŋka.

¹⁰ Ya an ɗəf tay ədaw dəfɗa, waŋgbayə vi əkeɗeɗe tay azan ɓa.

¹¹ Səza apel wənəska, aɓsit na: Baynam Lazar aleŋke, wanəmbat vi kafɗahani.

¹² Gewleɗ aɓsənən kan na: Daya an əleŋ aleŋ wambələ.

¹³ Yesu aka wən na əmta na Lazar apeli, ya net əɗɗumoŋ na aka wən net sin adawpele.

¹⁴ Yaŋ Yesu anah sit kotak kan na: Lazar amtəka.

¹⁵ Ya zu neki ammbokum adan in tat adak ɓa, vi kətafaŋgəni. Asna, məndam azani.

¹⁶ Tomas məs adawyaŋ na meseŋge aɓsit gewleɗ meɓɓet na: Nam pak məndamə, məmtəgən dəndəni.

Yesu yi əsilye səka əmta gəm zeŋgile

¹⁷ Adan Yesu agapə, arəhək agəɗək əvoŋ poɗo addəv magamas səkay.

¹⁸ Ya Betani van go'oy də Yerusalem, zəga na kilometər hoku.

¹⁹ Səret mə Yudeɗ ɗiyɗa dəzzoŋ azat Marta dət Miryam vi kazgətet aka wən na məlmit vani.

²⁰ Adan Marta təprəm na Yesu adeke, təmbatək ələmsəni, ya nat Miryam təsatək eŋgili.

²¹ Yaŋ Marta təɓsən Yesu na: Daya va is tat aŋ na, kəta məlmu amtə na ɓa.

²² Ya nəsənək na, kakaŋ zlaŋ, Maŋgəlva wapsuk məs kəssõhon pakə.

²³ Yesu aɓsət na: Məlmuk wasili.

²⁴ Marta təzlan sən na: Nəsənka wasil pay əsilye səka əmta, pay əgrak dəlva.

²⁵ Yesu aɓsət na: Intə əsilye səka əmta gəm zeŋgile. Ɗəf an dətafwa, an amtək dayday na, wasan madarani.

²⁶ Ɗəf madaran dətafu pak amtə na kpak ɓa hã faɗə. Kətafək sa?

²⁷ Təzlan sən na: Ha'aw Daya, naw nətafək na, istə Kristu, Wətən Maŋgəlva, məs dədazzan aka dəlva.

Yesu ahəmka

²⁸ Səza tənah vaska, ndət mbat təyət Miryam məlmət də mahaɗama dawnəh na: Mərbəzəga adeke, tay əyuko.

²⁹ Adan Miryam təprəma, ndət ləŋ le' mbat azani.

³⁰ Yesu dətoŋ a walaŋgəla tagay ɓa, tay a təki məs Marta tələm səni.

³¹ Adan mə Yudeɗ məs dəssoŋ dəndət eŋgil vi kazgətat nak awlətən Miryam təsil fol təgili, azbatənka, azet na, a magamas təmbat kawhəm adaka.

³² Adan Miryam təgap a təki məs Yesu asani, tulaka, ndət guduk ammba tələn dawnah sən na: Daya, va is tat far aŋ na, kəta məlmu amtə na ɓa.

³³ Səza Yesu awlət əhəma, mə Yudeɗ məs dəzzoŋ dəndət əhəmaŋgə. Makran sazlak mbagən gərəŋ.

³⁴ Yaŋ amna: Aŋga kəɗinən di? Azlan sənənka: Daya, ade awla.

³⁵ Yesu ahəmka.

³⁶ Yaŋ mə Yudeɗ anahaŋ ka na: Mula va aŋgluwa.

³⁷ Ya ɗiy meɓɓet səret aɓɗaŋ na: Ndən məs dəkol hara daŋgar na, aɓap na əɗɗa ka Lazar van adamta ɓa ɓa sa?

Məhhurgəni Lazar

³⁸ Makra Yesu agəɗək sazlak əmpa, ndən mbat a magamasə. Bətəŋ məmpan man də kalaɓi.

³⁹ Yesu amna: Məkol kalaɓə. Marta məlmən gəbay nak təɓsən na: Daya, waffoku, vi agəɗək əvoŋ poɗo səkayə.

⁴⁰ Yesu aɓsət na: Nənah suk na, an kətafka, a kula gagdak na Maŋgəlva ɓa sa?

⁴¹ Azargənənək kalaɓ naka. Yesu aslanək haran a disiŋ, amna: Əbba, nəgəɗ sukuk soko vi kəprəmək mawa.

⁴² Nəsənka is tat əprəm maw pay pakə, ya nənah vasna vi ɗiy məs ziwziw tərwəsləŋ dətafəngən na istə kəslənwa.

⁴³ Adan apel wənəska, anahək də wəlan dayadaya: Lazar agili.

⁴⁴ Gəbay agilke, tələn də van məveɗit də gabaga, haran tam mətərən də lukutu. Yesu aɓsit na: Məpəla, məppan dələ.

Ətuvur wən aka Yesu

⁴⁵ Diyɗa səret mə Yudeɗ məs dəzzoŋ azat Miryam awlanən məs Yesu agəɗə, atafənka.

⁴⁶ Ya ɗiy meɓɓet səret ambataŋgək azet Farisaɗe, anah sitinik zəgeɗ məs Yesu agəɗə.

⁴⁷ Deyeɗe net məsdəlveŋge dit Farisaɗe akkalaŋ kawsler meti, aɓɗaŋ na: Mbar mədaɗɗa di? Vi ɗəfəŋ tay əɗɗa sekeneɗ diyɗa.

⁴⁸ An məppanək tay əɗɗa vaska, ɗiy pak watafəni. Asna mə Romeɗ wazzoŋ kawmõh təki salala nam gəm ɗiy namə.

⁴⁹ Ɗəf taka səreti, Kayafas daya net məsdəlveŋge əzva daska, aɓsit na: Nokum zəga tay kəsənaŋ ɓa.

⁵⁰ Ya kawlanən na, ərəhi azokum an ɗəf taka amtək viyit ɗiyi, ki ɗiy pak əzaŋgə ɓa sa?

⁵¹ Sən kini apel vas ɓa, ya daya net məsdəlveŋge aka əzva nani, kəleŋ agəɗ na: Yesu wamtə viyit mə Yudeɗi.

⁵² Viyit mə Yudeɗi kaka' ɓa, vi kawsepet kirtin Maŋgəlva məs dətərayaŋ aka dələv gboŋgi.

⁵³ Təŋ dəpaski armanən wən nawbayən kana.

⁵⁴ Vi vaski Yesu abbal birre a walaŋgit mə Yudeɗ ɓa. Yaŋ ambat sədak aka kivadələv go'o də kapta-muyã a walaŋgəla-metiŋ məs adawyaŋ na: Efrayim, asanək dit gewleɗ nan adaka.

⁵⁵ Pak əzləra net mə Yudeɗi go'oy, ɗiy naka vadələv van azzoŋguk Yerusalem tak Pak dəɓəl ɓa, vi kabbur ziti.

⁵⁶ Akayanənək Yesu, anahaŋgək a walaŋ zit addəv Gəla na Maŋgəlva na, mbar kədaɗɗumoŋ di? Hara ade na a wəzləra ɓa faɗ sa?

⁵⁷ Deyeɗe net məsdəlveŋge gəm Farisaɗe aɗiyənək wen nan na, an ɗef asənək a teki asani, dəssakə, dərmanəngəni.