Yohanna 10 - Bible en Guidar

Wənməkkpaŋga na məzutaɗa dit timiŋgiɗi

¹ Yaŋ Yesu amna: Gesiŋ gesiŋ nədawnah sukum: Ɗəf an dəpeŋ də təki maɓɓani, atoŋ a gazlaŋ net timiŋgiɗ məza kəla maddamba ɓa, nan mahãlay, məvoŋtive yi.

² Ya məs dətoŋ də maddamba na, məzutaɗa net timiŋgiɗi.

³ Məgə maddamba wakol səni, timiŋgiɗ tay əprəmən wəlani. Waye timiŋgiɗ nan pak də iya neti, vi kawket awra.

⁴ An agilgitik pak na, wadaw abeti, timiŋgiɗ wazbanəni vi asənnənək wəlani.

⁵ Sessel azbanən na malaka ɓa, wanzoŋ sənən dərəŋgə vi dəsənnən wəla malaka van ɓa.

⁶ Yesu asla sitik ki van vaska, ya net dəsənnən na aka mi apel sit di ɓa.

Yesu, məzutaɗa moggoni

⁷ Yesu anah sit əmpa na: Gesiŋ gesiŋ nədawnah sukum: Intə maddamba na gazlaŋ net timeŋgiɗi.

⁸ Ɗiy məs dəzzoŋ daabəŋ kiyu pak məhẽlɗeŋ gəm məvoŋgoŋ tive, ya timiŋgiɗ dəprəmin ɓa.

⁹ Naw, intə maddamba, an ɗəf atoŋguk dəkawa, wakõhu. Watoŋgu, wagili gəm warah ətaɗa.

¹⁰ Məhãla nan əzzan na kawhãli, kawtaw wəlani gəm kawzani. Naw nəde na vi ɗiy dərəhaŋgən zeŋgile, dərahaŋgə məza man awsla ɓa.

¹¹ Naw, intə məzutaɗa moggoni. Məzutaɗa moggoni tay əppan zeŋgilen viyit timiŋgiɗ nani.

¹² Ya məzutaɗ vi kawrəha, məzutaɗa məs timeŋgiɗ vet nawray vanəŋ ɓa, an awlak kəramuyã əzzani, wappet timeŋgiɗ wanzani. Asna kəramuyã warme watraygiti.

¹³ Vi məzutaɗ vi kawrəhi, tay dəssan dit timeŋgiɗ ɓa.

¹⁴ Naw intə məzutaɗa an moggoni, nəsənik timeŋgiɗ nawa, timeŋgiɗ naw asənwənka

¹⁵ Va Afən asənwa, vaski nəsən Afəni. Nəppanək zeŋgilew vi timiŋgiɗ nawa.

¹⁶ In tat dit timeŋgiɗ meɓɓeti, məs na gazlaŋgəŋkəŋ ɓa. Net pak adahək nəkigini, waprəmən wəlawa, wakkpaŋgaŋ gazlaŋ taka, məzutaɗa taka.

¹⁷ Sən aski Afən aŋgluwa, vi naw, nəppanək zeŋgilewa, vi nəmsakgən əgəmən.

¹⁸ Ɗəf tay nawɓap əgəm su ɓa, in nədappan də vawa. In tat də gbogboŋ nappani, in tat də gbogboŋ namsak əgəmən. Aski mahenziŋ nərah səza Əbba.

¹⁹ Uɗak agəɗək a walaŋgit mə Yudeɗ aka wən na əpelis əmpa.

²⁰ Ɗiy diyɗa səret aɓɗaŋ na: Tuya tay akani, atemke, vimi kədaprəmnən di?

²¹ Ɗiy meɓɓet aɓɗaŋ na: As əpel na ɗəf mətemni ɓa. Tuya waɓap əkol heret daŋgarɗe sa?

Məzgani Yesu

²² Dəpas na, əzləra naɗɗumon əkol ma Gəla na Maŋgəlva a Yerusalem mi, pay na təlapay yi.

²³ Yesu abbalək addəv Gəla na Maŋgəlva ammba genzek na Salmoŋ.

²⁴ Mə Yudeɗ akaraŋgək kini, aɓsənən na: Dewɗe kədawpələm səddəv gəgrəŋ nam di? An istə Kristu na anah səm kotak ɗa.

²⁵ Yesu azlan sitike: Nənah sukumək farə, ya kətafwən ɓa. Wəzaɗe məs nədaɗɗa də iya na Əbba əŋ dədawpeleŋ akawa.

²⁶ Ya nokum, mənokum tat də ətaf ɓa, vi naret timeŋgiɗ naw kənanaŋ ɓa.

²⁷ Timeŋgiɗ naw aprəmən wəlawa, naw nəsinike, azbawəni.

²⁸ In tat əpsit zeŋgile an faɗə, azaŋ na kpak ɓa hã faɗə. Ɗəf tay nawmõhit səvaw ɓa.

²⁹ Əbba məs dipsiwe adayək ki zəga pakə, ɗəf tay nawɓap əmõh zəga səva Afən ɓa.

³⁰ In də Afəni taka mənani.

³¹ Yaŋ mə Yudeɗ allamaŋ gərmeŋge əmpa kaskani.

³² Yaŋ Yesu aɓsit na: Nərbə sukumək wəzeɗe mogget diyɗa dəzzoŋ səza Afəni. Aka wəza mawan səretis kədaŋgla əskuwən di?

³³ Mə Yudeɗ azlan sənənək na: Aka wən na wəza moggon mədaskuk ɓa, vi əpel mbərayən aka Maŋgəlva yi. Vi ɗəf kənani, is əɗɗa zuk va Maŋgəlva.

³⁴ Yesu azlan sitike: Məverni addəv mahenziŋ nokum na: Naw nənahək na meŋgilveɗ kənanaŋgə ɓa sa?

³⁵ Mahenziŋ ayek ɗiy məs əpel na Maŋgəlva agap azet na meŋgilveɗi, ya tay an nawɓap əzan Əpel na Maŋgəlva ɓa.

³⁶ Ɗəf an Maŋgəlva aweli, aslən aka dəlva. Nokum, mənokum tat ənahaŋ na, is tat əpel mbərayən aka Maŋgəlva, vi nənah na Wətən Maŋgəlva nənani sa?

³⁷ Ya an wəzeɗe na Əbba nədaɗɗa ɓa, asna kətafnən wən naw ɓa.

³⁸ Ya an in tat əɗɗeti, an kətafən na wən naw ɓa zlaŋ, mətaf wəzeɗe veti, vi kəprəmnəgəni gəm kəsənnəgən na Afən tay addəvwa, in tat addəv Afəni!

³⁹ Yaŋ akayaŋ tive narman əmpa, ya ndən kõh səveti.

⁴⁰ Yaŋ Yesu amndan əmpa dəgar ki Yurdeŋ, a təki məs Yohanna atəŋ əɗɗa baptem, asanək adaka.

⁴¹ Ɗiy diyɗa azzoŋguk azani. Aɓɗaŋ na: Yohanna dəgəɗ sekene təttaka ɓa, ya an apel aka ɗəfəŋ pak gesiŋgi.

⁴² Ɗiy nadak diyɗa atafənka.