Yohanna 1 - Bible en Guidar

Əpel maddaabəŋ ( 1:1-18 ) Əpel na əkeɗeɗe'e gəm na zeŋgile

¹ Də ətəŋ na, əpel tay səkayə, əpel van tay aza Maŋgəlva. Əpel van ndəni Maŋgəlva.

² Tay səkay aza Maŋgəlva də ətəŋga.

³ Zəgeɗ pak dəndən məɗɗeti, zəga tay taka dayday məɗɗan məza dəndəni ɓa ɓa.

⁴ Azani zeŋgile asani, zeŋgile van dəki əkeɗeɗe aket ɗiyi.

⁵ Əkeɗeɗe tay əwiɗ ara guzliyo, ya guzli dəɓap əsərətən ɓa.

⁶ Ɗəf məs Maŋgəlva aslən payə, iya nan na Yohanna.

⁷ Ade na ka miziwe yi vi karban əkeɗeɗe naka, vi ɗiy pak dərahaŋgən ətaf sə kəlazani.

⁸ Nan ndəni əkeɗeɗe ɓa, ade na kawpel aka əkeɗeɗe iyi.

⁹ Əkeɗeɗe van ndəni əkeɗeɗe an gesiŋ məzukekeɓe ɗəf titir pakə, adek aka dəlva.

¹⁰ Tay lahəŋ aka dəlva, dəndəni məzəməɗ dələva, ya dələv dəsən ɓa.

¹¹ Azet ɗiy nan tusso ade, ya ɗiy nan dətafnən ɓa.

¹² Ya ɗiy en dəŋgluwəni, dətafən iya nan na, apsit gbogboŋ nakkpaŋ kirtin Maŋgəlva.

¹³ Net duwe məwet dit mbel ɓa, mãy də əŋgla na gəɓa zə ɗəf ɓa, mãy də əŋgla na ɗəf ɓa, də əŋgla na Maŋgəlva yi.

¹⁴ Əpel nak akkpaŋgək ɗəf də gəɓa zəni, asanək də gəla a walaŋgəmə. Mulak gagdak nani, gagdak va na Karmalay dəknah də mbəlembəle gəm də gegesiŋ arah səza Afəni.

¹⁵ Yohanna apelik wən nani, anahək dayadaya amna: Ndəni məs nəpel wən nani, nənah na: Tay əzzan dərɓagawa, adayək kiywa, vi tay səkay tak məwuwi ɓa.

¹⁶ Mənam pak mərahək haran nam səzet aryeɗ nani, mərahək mbəlembəle aka mbəlembəle.

¹⁷ Vi də va Moyis mahenziŋ ade, mbəlembəle də gegesiŋ tam azzoŋ dəza Yesu Kristu.

¹⁸ Ɗəf tay dula ɗah Maŋgəlva ɓa. Ya Wətən karmalay, dəsan Maŋgəlva addəv Afəni, ndəni dərbani.

Yohanna məgəɗ baptem gəm gewleɗ nan maddaabəŋ ( 1:19-51 ) Ərba wən na Yohanna məgəɗ Baptem

¹⁹ Aŋki əpel na Yohanna aka mə Yudeɗ asləŋgin məsdəlveŋge dit mə Leviɗe sə Yerusalem azani, vi dəssohonəngən na: Nok nawa kənan di?

²⁰ Azlanəka dəɗaman ɓa, arbanək na: Naw, intə Kristu ɓa.

²¹ Assohõnənka: Ya nawa kənan kandi? Eliya kənan sa? Yaŋ amna, ndən nənan ɓa. Məskəleŋ kənan sa? Yaŋ azlan na: Owwo.

²² Aɓsənən na: Ya nawa kənan kandi? Vi məmndagangən əzlan sit ɗiy məs dəslənməni. Ya nok mbar kədawnah aka ki zuk di?

²³ Yaŋ aɗiman na: Intə wəla dədaŋzla vaŋvəl a kapta-muyã na: Meziwgin tive na Daya sarra va məskəleŋ Isaya anahə.

²⁴ Ɗiy en məslənit vet mə Farisaɗe əŋgə.

²⁵ Assohõnənka, aɓsənən na: Ya Vimi kan kədaɗɗa Baptem adan Kristu kənan ɓa, Eliya ɓa, məskəleŋ ɓaŋ di?

²⁶ Yohanna azlan sitik dawnəh na: Naw in tat əɗɗa baptem dit iŋkile, ya ɗəf maɓɓan tay a walaŋkum məs kəsənən ɓa.

²⁷ Tay əzzan dərɓagawa, ya nəgap nawpel helegeɗ net hensek nan ɓa.

²⁸ Wənəs pak a Betani agəɗə, dəgar ki Yurdeŋ, a təki Yohanna adaɗɗa baptem.

Yesu, ndargayãk na Maŋgəlva

²⁹ Vit pumpum nani, Yohanna awlak Yesu dazzan azani, yaŋ amna: Akəŋtə ndargayãk na Maŋgəlva məzəvvuyon mambray naka dəlva.

³⁰ Ndəni məs nəpel wən nan nənah na: Ɗəf tay əzzan dərɓagawa, məs dəday kiywa, vi tay səkay tak məwuwi ɓa.

³¹ In sən kiyu nəsən ɓa, ya vi dərbəgən a Israyel, ndəni nəde əɗɗa baptem dit iŋkile.

³² Yohanna apelik akan dawnəh na: Nulak Əmpəs na Maŋgəlva əpirken sə disiŋ va mukuɗuŋgulo asan akani.

³³ Ya naw nəsən ɓa, hara na məs dəslənu əɗɗa baptem dit iŋkile, ndəni dənah su na: Ɗəf məs kədawla Əmpəs əpirken əsan akan na, ndəni məgəɗ baptem də Zeŋgile Salala.

³⁴ Ya naw nulaka nərbanək na, ndəni Wətən Maŋgəlva.

Gewleɗ na Yesu en maddaabəŋ

³⁵ Vit pumpum nan əmpa, Yohanna tay ziwwe adak dit sula səret gewleɗ nani.

³⁶ Yaŋ awla Yesu dawtoŋgo, amna: Ndargayãk na Maŋgəlva yakəŋkə.

³⁷ Gewleɗ sula nek aprəmənək dawpel vaska, yaŋ azbanən Yesu.

³⁸ Yesu amanək haran dirɓe, awle na tay əzbanəni, aɓsit na: Mi kədawkayanən di? Aɓsənən na: Rabbi va ənəh na, Mərbəzəga, aŋga kəsok di?

³⁹ Aɓsit na: Məde kulanəngəni. Ndəɗaŋ kan mbatə, awlanən təki asani. Assoŋ azan adak pay dəpaska wagəɗ aza təbəz poɗo na moskoyo.

⁴⁰ Andre, məlmən Simoŋ Piyer ndəni taka neret ɗiy sula məs dəprəmnən Yohanna, dəzbanən Yesu.

⁴¹ Ndən mbat ərəh Simoŋ məlmən anan daabəŋ aɓsən na: Mərəhək Mesiya va ənəh na Kristu.

⁴² Akak aza Yesu. Yesu təmtəm ulan amna: Istə Simoŋ wətən Yohanna, kawyuki na Kefas, va wənah na milɓe.

Filip də Natan

⁴³ Vit pumpum nani, Yesu aynanək nadda a Galile. Aləmək də Filip aɓsən na: Azbawa.

⁴⁴ Ya Filip van ɗəf na Betsayda yi, walaŋgəla-metiŋ na Andre də Piyer.

⁴⁵ Filip mbat ərəh Natanayel, aɓsən na: An məs Moyis aver wən nan addəv mahenziŋ gəm an məskəleŋɗe apeleŋ akan naka mərəhəka, ndəni Yesu na Nazaret wətən Yosef.

⁴⁶ Natanayel aɓsən na: Zəga moggon wade sə Nazaret sa? Filip amna ade awla.

⁴⁷ Adan Yesu awla Natanayel dazzan azani, apelik akani, amna aŋki mə Israyel an gesiŋ məs tay də muluvuluvu azan ɓa.

⁴⁸ Natanayel aɓsən na: Səŋga kəsənu di? Yesu azlani, aɓsən na: Tak aka Filip dəyuk ɓa, kəsok ammba sokoyo, nulukuko.

⁴⁹ Yaŋ Natanayel azlan sən na: Mərbəzəga, istə Wətən Maŋgəlva, istə məlĩ na Israyel.

⁵⁰ Yesu azlani, aɓsən na! Kətaf na vi nənah na nulukuk ammba sokoyo sa? A kuwəl zəgeɗ məday kiyit eski.

⁵¹ Aɓsən əmpa na: Gesiŋ gesiŋ nədawnah suko, akulanən disiŋ məkolən, maslayɗe na Maŋgəlva əpeŋgeŋ gəm əpurkoŋ aka Wətən Ɗəfa.