Yo'el 2 - Bible en Guidar

Pay na Daya go'o yi

¹ Məffon gozloro a Siyon, məŋgəsl vaŋvəl aka mossorgo metiŋ naw salala! Ɗiy naka dələv pak dəkkereŋgi: vi pay na Yawe tay əzzani, go'o yi.

² Pay na guzli yi gəm na guzli titire pay na slaybuwni gəm na guzli tigbizlimi. Ɗiy hõnyo' hõnyo' gboŋgboŋ tay əzzoŋ va təki ɓihhe adaɗɗa aket mossorgoɗe gugriɗe, mulay ɗah vas ɓa, asan na dərɓagan ɗah vas ɓa, hã gap wəzveɗe na sayit ɗiy kpototo.

³ Offo tay əzəm təki abani, dərɓagani, offo tay əzla nzilim nzilimi. Va guli na Eden dələv asan abani, dərɓagan tam, kapta-muyã məraygəni. Zəga tay dəkõh səman ɓa.

⁴ Agilik va pilseŋge; va məŋkoroŋ pələseŋge adanzoŋgu.

⁵ Va ɓaɓəlma mawta nawgay məzuzlah aka dadwar kiyit mossorgoɗe gugriɗe; va ɓaɓəlma offo adawzla tərɗa; va ɗiy gambereɗ məssẽhit a ma wəgaya.

⁶ Ɗiy tahəŋ kotkot abani, məɗɗa heret pak pirreŋgi.

⁷ Va məs mekret adanzoŋgu; va məzəlpaŋ adawpeŋgeŋ dəka zlava. Naway pak əgəm tive nani, amzlahaŋ səka tive net ɓa.

⁸ Ɗəf tay dədawslaŋgən meggen ɓa, naway pak haran aban sek təstəsə. Əslkərnən təki dəka zəga nawtekti; awziweŋ ɓa.

⁹ Ətoŋgoŋ də walaŋgəla-metiŋ, ənzoŋ dəka zlava, əzlahaŋ kiyit gəleɗe; ətoŋgoŋ va məhẽlɗe də təkifoŋgo naza gəla.

¹⁰ Dələv tay əkker abeti, məɓlani disiŋ, pay də təla attireŋke gəm ŋgərzleɗ appanən əkekeɓe' neti,

¹¹ yaŋ Yawe adawgəŋgəm wəlan abet məzəlpaŋ nani. Vi məzəlpaŋ nan aŋɗaŋ ɓa: məzəɗɗa an aɗi gboŋgboŋgi. Vi pay na Yawe metiŋgini, adahək nawgeslne' sən diyɗa: naway nawɓəsən di?

Pay namnda aza Daya yi

¹² Yawe aɗiyman na, təŋ səza kakaŋka, məmndoŋ məde azaw də mokrokum paparə də wəɗɗa meme, də wəhəma, də əɓuh mokum.

¹³ Məŋgaran mokrokum məza lukutɗe nokum ɓa, məmndoŋ aza Yawe Maŋgəlva nokum: vi məgəɗ mbəlembəle yi, muwəl sasãhĩ, awdagədəv go' ɓa, məgəɗ moggoni diyɗa. Appanək wən naɗɗa mbərayən sən ɗəfa.

¹⁴ Nawa dəsən di, kuzuŋ wappan wən nani, wapəl wəzaɓ dərɓagani, əvəl də mbazla nawpesl sən Yawe Maŋgəlva nokum.

Pay naɗɗa meme də wəɓuhma aba Maŋgəlva

¹⁵ Məffon gozloro a Siyon, məɗiywən na wəɗɗa meme, mətəl ma naɗɗa əkkal na paya,

¹⁶ məkkelet ɗiyi, miyə əkkal na paya. Məsepet ɗiy məsɓeti, məsepet gawleɗ naka sayti gəm kirin namet bide. Məs dəɗi guluk kakaŋ dəgil sə giziŋ nani, akən təɗi zil kakaŋ təgil sə giziŋ nawɓel nata.

¹⁷ Məsdəlveŋge dəhəmaŋ a walaŋgəla nawtoŋ dəddəvən a daŋgla də gəlamatuya, məɗɗaŋ wəza na Yawe dənahaŋ na: «Yawe, awla sasẽhit ɗiy noko; kədappet ɗiy nok aket wil ka ɗiy-ɗar dəmasaŋgən aket ɓa! Vimi adawnahaŋ aret ɗiy na: Aŋgay Maŋgəlva net di di?»

Iynama nawsilgiti ( 2:18-27 ) Daya tay əzlan sit ɗiy nani

¹⁸ Yawe aŋgluwək dələv nan day, awlak sasẽhit ɗiy nani.

¹⁹ Yawe azlanka, aɓsit ɗiy nan na: «Yaŋ in tat əslən sukum haya, mbazla na meketepe gəm mẽlẽ, wakəbaŋgə. Nərbə na wil akokum aret ɗiy-ɗariŋ ɓa.

²⁰ An dədazzan sə kəla tapaslay na disiŋ, wanərɓahan səzokum; wanərɓahan aka dələv mukuro gəm kpõkpõhõ, ngaɓa an nabe, kəla pehe, dəmmba pay nampum, ŋgaɓa an na dərɓe, kəla pehe, dəmmba pay na moskoyo; vavrãh nan wagili, əŋgəna nan wagili: Vi aɗɗek zəgeɗ gugriɗe.»

²¹ Dəlvafuŋ, kəgeslne' ɓa, aɗɗələ, anneken zuko: vi Yawe tay əɗɗa zəgeɗ gugriɗe.

²² Zəgeɗ nawra kəgeslne'eŋ ɓa: gaslembeɗ nawra tay əndufoŋgu, wəleŋɗe tay uwaŋgə, sokoyeɗ dit megezlembirkeɗ tahəŋ uwaŋgə.

²³ Mənokum ɗiy na Siyon, məɗɗələ, mənneken zukum də Yawe, Maŋgəlva nokum. Vi tay əzi sukum buwən na mənzi kawkõhgukum, tay əzi sukum buwən maŋgalaw, buwən na mənziya, buwən na mawala va lahəŋka.

²⁴ Kelleɗe waknəhaŋ də haykəmari, mbazla na meketepe gəm mẽl waputkuroŋ sə təki nawɗotti.

²⁵ Wanəfaɗ sukum wəzvaɗe məs «deberzeɗek», «zaray», «sesɓeke», «tatawwã», azəmaŋgə ŋgaɓa nalpa metiŋgin naw məs nəslən akokum.

²⁶ Wakəzəmaŋ əzəm kpe'i, wakəɗiynən ki Yawe Maŋgəlva nokum, məs dəgəɗ sekene vikum. Ɗiy naw asənən na zəga ərba wil ɓa ha faɗə.

²⁷ Wakəsənən na, intə addəvit mə Israyelɗe, intə Yawe Maŋgəlva nokum, maɓɓan tay ɓa. Ɗiy naw asənən na zəga ərba wil ɓa ha faɗə.