Yeremiya 9 - Bible en Guidar

Uwa wən agulik ɗiyi

¹ Nawvay gəla a kapta-muyã va təki naffet net mədawaŋ malaka na! Kəta wanəppet ɗiy nawa wanəmbat faraɗa səzeti. Vi ɗiy məkuwaŋ a gizbeŋ baymeti ɗiy mbəreytiŋ.

² Tay ənslinin herzlimit va bəle sən uwawəna, Sən gegesiŋ arəhnən zit aka dəlvafuŋ ɓa, tay əɗɗaŋ mambray akani akani dəsənwən ɓa, Yawe aɗiymani.

³ Naway pak dəsla zən səza baynani! Kəɗiyən əɗɗum nokum aka məlmukum ɓa, vi məlma pak wambəɗokum; baynokum zlaŋ wazəm kikum.

⁴ Ɗəf pak tay əmbəɗan meggeni, awpel an gesiŋ ɓa; assərəkgənənək hərzlumit uwawəna. Əɗɗaŋ mbərayən hã awɓapaŋ əɗi marava ɓa.

⁵ Ərma mama aka ərma mama uwawən aka uwawəna. Aɓoŋgoŋguk dawsənwa Yawe aɗiymani.

⁶ Vini kana, aŋki an Yawe Məzuɓappak anahə: Wanəhĩs akoffo, kawlan an təstəsəŋgə. An vaski ɓa na mbar nədawgəɗ sit ɗiy naw əmpa di?

⁷ Herzlimit tay va har mətakaɗən də muhun azani an adawpeleŋ pak uwawəni yi: Əpel nenek tay əgilyen səmet sən bayneti, addəv kpukpum na mekret hara na tahəŋ ənslənaŋ sənən peweŋ.

⁸ Aka zəv zəga naɗɗa vasna nətaw na wən aket ɓa sa? Yawe aɗiymani. Nəmpəl na kiya aka zeŋvit ɗiy es vas ɓa sa?

Pay nawhəma gəm na əɓuhma ɗəfa

⁹ Wanəhəmə, wanənɗəs aka wən net mossorgoɗe; wanəɓuh maw ammba təki nawtaɗ na kapta-muyã, vi məɗi siti offo. Ɗəf tay dədawtoŋ kəla dak ɓa. Əhəm na wasli tay dədaprəm adak ɓa. Təŋ səzet biŋgeɗ na disiŋ hã gap azet zəgeɗ nawra anzoŋko, addoŋko.

¹⁰ Wanəkkpaŋgan Yerusalem ka korguɗe, ka təki nawɗam net kirɗemuyã, wanəkkpeŋget walaŋgəleɗe gugriɗ na Yuda muyã məs dəf tay adak ɓa.

¹¹ Naway ɗəf məsmaɗɗula naprəm gabba wənəs di? An Yawe apel sənək na dərban sit ɗiy na, vimi dələv azə, məɗi sən offo kpaŋ va kapta-muyã ɗəf awtoŋ dədak ɓa di?

¹² Yawe amna: Vi azganənək mahenziŋ məs nəɗi aveti, dəprəmnən maw ɓa, dədawaŋ va nənah sit ɓa.

¹³ Azbanənək ɓəɓəl na mekret ammbet Ba'alɗe məs efiŋgiɗit ayagan sitini.

¹⁴ Vi vaski Yawe Məzuɓappak Maŋgəlva na Israyel anah vaŋka: Wanəzəmgit ɗiyin də ndərzla, wanəpsit iŋkile də muhun areti.

¹⁵ Wanətreyet aweleŋgit ɗiy-ɗar məs ndəɗaŋ sən kiyit dəsinnin ɓa, efiŋgiɗit ɓa, wanətəl masalam ammbet hã in mbo' əzet kakãhə.

¹⁶ An Yawe Məzuɓappak anah yaŋka. Məɗɗumu, məye gil məsənaŋ əhəma dəzzoŋgu! Məye en məs kokoneɗ na gəlya na gəlabay dəzzoŋgu,

¹⁷ dəgəmənən zit əzzoŋgu dəŋzlaŋ vaŋvəl na gəlabay akamə! Sin dəɓahaŋ aramə, haram dəsan buwwa dit sini!

¹⁸ Vaŋvəl na gəlabay tay əprəm sə Siyon: Haya mbar məzam vaŋ di? Mərbə səm wil gbaŋ di? Vi məppanək dəlva, gəleɗe nam aɓzlaŋka!

¹⁹ Mənokum gili məprəm əpel na Yawe kana; məpak sləmokum ammba əpel na mani. Məyagan sit əŋɗəs sit kirtukum muguluŋgiti, nawat pak təyagan gəlya nawhəm sət meggeta.

²⁰ Əmta atoŋguk də təkifoŋgo məpəl aza gəla namə, atoŋguk addivit gəleɗe lelewɗe namə, kawbay kirin səka tive gewleɗ tamə sə təki nakkala.

²¹ Apel na! Vaŋki Yawe aɗiymani: Gəbeyit ɗiy wasan sokosloɓ afuŋ va ba'ar a gulyo, va maŋgav məvoŋgən dərɓaga məzubəla, ɗəf tay nakkelet ɓa.

Maɗɗula an moggon na: Əsən Daya

²² Vaŋki Yawe anahə: Məs maɗɗula akan adawkaɓ də maɗɗula nan ɓa! Məs gbogboŋ adawkaɓ də gbogboŋ nan ɓa! Məsarya adawkaɓ də arya nan ɓa!

²³ An ɗəf man aka əkaɓ na, dəkaɓ dərəŋ vi tay də əsən naprəm gabba wəna gəm asənwəka, Vi in Yawe tə nədaɗɗa an moggoni, an sarara gəm an təstəs aka dəlva. Vi addivit zəgeɗ vas nədawnan neki Yawe aɗiymani.

Əzga' sit ɗiy en dədaɗiyənən zit na askəlaŋgək awra

²⁴ Yawe aɗiyman na, pay wade in kawtawwən aket ɗiy en dəskəlaŋ awra na gəɓa ziti:

²⁵ aka Eziptə, aka Yuda, aka Edom, aket kirtin Ammon, aka Mo'ab gəm aket məfaɗ tapasleyit na kapta-muyã baymeti. Vi ɗiy-ɗar pak geyeɗiŋgə, ɗiy na Israyel zək net kpak geyeɗiŋ a məkreti.