Yeremiya 8 - Bible en Guidar

¹ Yawe aɗiyman na, pay nan dəpaska, kabbiti slesleŋɗe net milyeŋge, ɗiy gugriɗe, məsdəlveŋge, məskəleŋɗe na Yuda gəm net ɗiy na Yerusalem səddivit magamasɗe neti.

² Kaweɗti ara paya, ara təla gəm gərzleɗ na disiŋ, zəgeɗis pak məs aŋglaŋgəs, məs aɗɗaŋ sitin wəza, məs azbaŋgə, məs askaŋ helik azeti, məs appu'oŋ abeti; net kakkeleti kawndikit ɓa, wakkpaŋgaŋ ka ba'ar aka dəlvafuŋ.

³ Ɗiy en dəppaŋ səmmbet ɗiy mbəreytiŋki, a təki məs nətreyet pak wanahaŋ na, dəɗah sit əmta ki əssa egge, Yawe Məzuɓappak aɗiymani.

Ədaw məs gabban aprəm ɓa

⁴ Kənah sitgin na, aŋki məs Yawe anahə: An ɗəf askotko, asil na ɓa sa? An ɗəf azək ki tive, amilyen aka təlni aka təlni ɓa sa?

⁵ Vimi ɗiy na Yerusalem əŋ aɓoŋgoŋ dawsənwən aziweŋ ɓəlɓəl addəv uwawəna, ɓoŋgoŋ damilye azaw di?

⁶ Nəzlgək sləma əprəmti təstəs tay addəv an apeleŋ ɓa. Ɗəf tay dədawɗi marava aka mambray nan dawnəh na: «Mi nəgəɗəŋ di ɓa?» Naway pak əzban ənza nan va pələs məgəm zən əmbat a ma əgaya.

⁷ Hemsemse a disiŋ dayday asənək pay nesme nani; mukuɗuŋguleɗi, sagereɗi gəm toligeɗi asənən pay nawmilye neti. Ya ɗiy nawa, dəsənən an Yawe aɗi wən nan aziwgin ɓa.

Məsmaɗɗulet muwaŋ tepelke

⁸ Mbar kədawnahaŋ na məs maɗɗula mənani, mahenziŋ na Yawe avami, mbaraka na sən uwawəni, muwaŋ wənəŋ, tay əslokoron mahenziŋ.

⁹ Məsmaɗɗulet arbaŋgək wili; tahəŋ əkkereŋ sən geslne, mərmetiŋgə. Vi azeleninik əpel na Yawe, maɗɗula net mi atər sit di?

En məzəɗɗumoŋ na, wən tay ɓa

¹⁰ Vini nədapsit gil net sit ɗiy mbirti guli net sit ɗiy en nawmõhini Vi təŋ səka muzliya hã gap ɗəf metiŋgini, naway pak tay əkayan ərəh kaka; təŋ səza məskəleŋ gap aza məsdəlva, naway pak tay uwawəna.

¹¹ Tahəŋ əgəm tatwãh net ɗiy naw va zəga an ɗarə, də wənah na: wən tay ɓa, wən tay ɓa, mbara wən tayi.

¹² Wil adetinke vi zəga narba wil aɗɗaŋgə, Wil dədetin ɓa, dəsənaŋ zəga wil ɓa, Vini waskotoŋ aret ɗiy en dədaskotoŋgu; Pay nədassõh an aɗɗaŋgə waskotoŋgu Yawe anahə.

Zə Maŋgəlva dəppar ɓa, ɗiy tahəŋ də əga ɗarə

¹³ Əza nədawzeti Yawe aɗiymani vi uwa tay aka megezlembirke van ɓa, uwa tay aka sokoyo van ɓa, gaslamban aɓətka. Nəppetik sit ɗiy nawndepetini.

¹⁴ Vimi məsam dəmam ɗar di? Məkkal səmə! Mətoŋsəm addivit walaŋgəleɗe gugriɗ na korgu, məmtəgən adaka. Vi Yawe Maŋgəlva nam aŋgbosuk mamə, apsəmək iŋkile də muwəna vi məgəɗək mbərayən aza Yawe.

¹⁵ Məɗɗumuk aka zazaya, ya moggon tay ɓa. Pay nambəla mədawga kəta kpaŋ na geslne.

¹⁶ Hã sə Dan mədaprəm əhəm net pilseŋge na məzuzel namə. Sən ɓaɓəlma əhəm net pilseŋge dələv tay əɓla. Azzoŋko, azanənək dələv də an naddəvən pakə. Gəm walaŋgəla-metiŋ dit ɗiy nan pakə.

¹⁷ Vi in yakəŋ əslən dohõŋɗe məs muhun akokum tay an nawmbəɗan səret ɓa, wabəlokuməni Yawe aɗiymani.

Əhəm na Yeremiya

¹⁸ Makraw tay əssawa, miyhã nan tay ɓa, zu pak zamzamə

¹⁹ In tat əprəm wəlat wətit ɗiy naw iya hã səka dələv faraɗa, vas na Yawe tay a Siyon ɓa sa? Məlĩ nan tay addəvən ɓa sa? Vimi adansuwən gədəvu də zəgakamaŋgəlva net gəm dit zəgeɗ ɗar na guw di?

²⁰ Əbəl atoŋko, mawala tay əgraka, ya məkõh ɓa'a.

²¹ Sən vamvi məɗi sit ɗiy nawa, zu tay zamzamə; a gəlabay nani, əray arəhwəka.

²² Miha' nawɗan gəla əssa tay a Galad ɓa sa? Awaniɓa zloktor tay adak ɓa sa? Vimi huwwa net ɗiy naw anzaɗ ŋgbəlay ɓa di?

²³ Nakkpaŋgan su kiyu məknəhən dit iŋkile, haraw tamə naymu sin na, kəta anəhəm dəfəɗ də kapay pakə ammba kigəbeyit ɗiy nawa.