Yeremiya 6 - Bible en Guidar

Tatwãh metiŋgin tay əteh aka Yerusalem

¹ Mənzoŋ sə Yerusalem kirtin Benyamin. Muffon moho a Tekowa məmpa gabaga na dələv a Bet-Kerem Vi tatwãh arbək sə kəla disiŋ, əza metiŋgini.

² Nəzanək Siyon walaŋgəla moggon lalawa!

³ Adaki məzuteɗeŋɗe adaddoŋ dit aryeɗ neti. Watərwəslən dit gizlirkeɗe neti; naway pak wataɗ a təki nani.

⁴ Misilgin əgay də Yerusalem! Misili, mərɗi səm akan aka tataŋ paya. Aw haya! Pay aɓeke, vi zeŋgile na moskoy tay əzzekeŋgi.

⁵ Misili, mərɗi səm akan də dəfɗa, mibzliwgin gəleɗe mogget nani.

⁶ Vi vaŋ Yawe Məzuɓappak anahə: Mibil wəleŋɗe, məkkpot dələv ki Yerusalem tərwəslə, ndən walaŋgəla-metiŋgin məs məzga' səni. Əsərma tay addəvni.

⁷ Va vov net iŋkile adaziwgit iŋkile nani, vas adarma daraw nani. An ɗəf adaprəm na ndəni gagay gəm ərma mama. Tatwãh də ərga tahəŋ a maharaw pay pakə.

⁸ Ataf əzga'a Yerusalem, vas ɓa na wamuɗakə vi nədakkpoŋgok va ki kapta, dələv məs ɗiy tahəŋ akan ɓa ɓa.

Ɗiy məs aprəmaŋ ɓa

⁹ An Yawe Məzuɓappak apel yaŋka: Məgim madambirgit ɗiy na Israyel en dəppaŋ takataka, va adawɓuhnən mokkoyɗe net megezlembirkeɗi; məbbalan vokum məffeket takataka va məɓoh uwa na məgezlembirke adaffekeni.

¹⁰ Sən nawa nədawpel sən gəm nədawɗi ka miziwe naw dəprəməngən di? Sləmet asukko, aɓapən na əzga sləma ɓa. Əpel na Yawe tay va zəga na əra azeti; annekeŋ dəndən ɓa.

¹¹ Nəknahək də ədagədəv na Yawe nəyək dawɓəsən. Aggbo aket kirin appaka gəm aka əsap net gewleɗi. Karma ɗəf mizilin va gulku, mazza va mazza an kursuk kursuku.

¹² Gəla net wakkpaŋ ka net ɗiy mbirti, gəm guli net sap dit gil neti'e. Vi wanətəl vaw aket ɗiy naka dəlvəŋka Yawe aɗiymani.

¹³ Vi təŋ səka muzliya hã gap ɗəf metiŋgini, naway pak tay əkayan ərəh kaka. Təŋ səza məskəleŋ gap aza məsdəlva, naway pak tay uwawəna.

¹⁴ Tahəŋ əgəm tatwãh net ɗiy naw va zəga an ɗarə, də wənah na: wən tay ɓa, wən tay ɓa, mbara wən tayi.

¹⁵ Wil adetinke vi zəga narba wil aɗɗaŋgə, wil dədetin ɓa, dəsənaŋ zəga wil ɓa. Vini, waskotoŋ aret ɗiy en dədaskotoŋgu pay nədawsilyew aketi, wazbəraŋ va ɗiy meɓɓeti, Yawe anahə!

¹⁶ An Yawe anah yaŋka: məziw sosokko aka tive mula gəm məttok aka tive an lahəŋka. As tive an moggoni sa? Məzbani asna wakəssoŋ zayə. Yas anahaŋ na: Məzban na ɓa.

¹⁷ Nəɗiyək məgaɗe dəssak sukuməngəni məgəɗ maɗɗula aka ɓaɓəlma gozloro yas azlanaŋ na məgəɗ na maɗɗula ɓa.

¹⁸ Vini, məprəma ɗiy-ɗarə, məsən an nawrih ɗiy nawa.

¹⁹ Dəlvafuŋ aprəma: Wanəki tatwãh aket ɗiy sən əɗɗum net mbəraynəŋka. Dəzgaŋ sləma aka əpel naw ɓa, azeleninik mahenziŋ nawa.

²⁰ Mi tursan na Saba adawtər su gəm kevile məffok nek naka dələv faraɗa di? Əvəl nawzla kurmbuɗuk nokum tay əmbat su ɓa əzaɓ-Maŋgəlva kədawdaŋ tay nek azaw ɓa.

²¹ Vini in Yawe nənah na: Wanəɗi zəgeɗ nazlbe ɗiyən abet dəskotoŋgən aketi wazaŋ beymeti efiŋgiɗti dit kirtit sapə, megge də bayna.

Məzuzel tay əzzan sə tapaslay pay na kəla disiŋ

²² Vaŋ Yawe anahə: Awle ɗiy tahəŋ əzzoŋ səka dələv na kəla disiŋ; vanday net ɗiy-ɗar gədakə tay əzzan hã sə təki dələv abaymani.

²³ Bəle də tulhõ ammba veti, məsdarawɗeŋgə, ulasahã tay azet ɓa. Ɓaɓəlmet tay va vovolumɗe na pehe. Apeŋgeŋgik aket pilseŋge, məssẽhit va ɗiy məsla zit nawgay də is waŋ na Siyon!

²⁴ Məprəm wən nani, vam amtəka, mənam tat əkker sən geslne va guluk məɓay uwa.

²⁵ Kəgilyoŋ awra ɓa, kəddoŋ aka tive ɓa, masalam na məzuzel tayi; gəslne tay təki pakə.

²⁶ Ɗiy nawa, mugul lukut na gəlabay azokum məpətukul aka moŋglo va əska morkoyo ammba wiyin karmalay dəmtə, muɓuh mokum ɓəluwɓəluwə, vi məzuraygən təki wade akam girziki.

Israyel təbəz məs abbur ɓa

²⁷ Is Yeremiya ka məwəl nazet ɗiy naw nəɗiyuk awaleŋti, kəsəngən gəm kəkosongən ədaw neti.

²⁸ Beymet pak məɓoŋtingə, məndaŋ gabba ɗəfəŋgə, kiyit ɓəl va təbəz pepreŋge awaniɓa təbəz titire, beymet pak məbayaŋ ɗiyəŋgə.

²⁹ Kutukutu tay əbay dayadaya; offo aggrakək way təbəza. Ɗari məhəs təbəz ayan zəni mbərayən nan awzar ɓa.

³⁰ Dayenin na təbəz babar məzelni vi in Yawe nəzelike.