Yeremiya 51 - Bible en Guidar

¹ Vaŋ Yawe anahə: In yakəŋ əfu səmyã nawza aka Babilon gəm aket ɗiy nan məzuzelɗe nawa.

² Wanislin melekeɗ a Babilon watərayanəni wappohonən dələv nani. Ha'aw, wasilyoŋ akan səŋga səŋga pak pay na ərayəska.

³ Məsənaŋ bəle dəhotin herɗe net aket məseŋgiɗti, adarəh əkaɓaŋ addəv lukut na təbəz net ɓa! Kulanən sasãhit gewleɗ net ɓa, məzet məzəlpaŋ net pakə.

⁴ Məs vamvi azet dəskotoŋ aka dələv net mə Kaldiyeɗi, ɗiy məbeyit dəssoŋ kpororo aket tiveɗi.

⁵ Vi dələv net aknahək də əɗɗa mambray aza Salala na Israyel. Ya Israyel də Yuda na, gil na gəbayəŋ ɓa, Maŋgəlva net dəmtə ɓa Yawe Məzuɓappaki yi.

⁶ Mənzoŋ sə Babilon, məkõhgən kiykum! Kədawzaŋ aka heslepe nan ɓa. Vi pay an Yawe adampəlkiya iyi; tay əmndagan sən an dəslə səni.

⁷ Babilon, hĩlĩw na meleŋge yi ammba va Yawe. Tay əbay dələv pak va əbay na mbazla, ɗiy asaŋgək mbazla nani vini kiyit ɗiy agrəŋgə.

⁸ Gurzik Babilon askotu, aŋgəsl hoɓoɓu. Məɓuh mokum ammbani, məkay alapa sən əssa nani. Awsən ɓa wambəl soko.

⁹ Məmbeɗik Babilon, ya dəmbəl ɓa. Məzar səzani, ɗəf pak dəlgən aka dələv nani. Vi wən mətaw akan agapək hã disiŋ asilik hã gap aza slaybuwna.

¹⁰ Yawe arbanək təstəs nan vimə. Məndam a Siyon mərbangən an Yawe Maŋgəlva nam agəɗə.

¹¹ Mətekeɗet herɗe nokum, məgim gulomɗe nokum, Yawe asilgin maɗɗulet milyeŋge na Mediya, vi Yawe man aka əzan Babilon, as van Yawe dədampəlkiya, tay əmpəl ki gəla nani.

¹² Məslan zəga narba nawgay aka zlava na Babilon. Mənzlərgit məgaɗe, məziwgit məgaɗe Məzi məsekeɗeŋ təkiya. Vi Yawe aɗɗumuk əmpa aɗɗak an məs apel aket ɗiy na Babilon əmpa.

¹³ Is məs kəsok də gəla ama məlpa metiŋ, məs də əzaɓ diyɗa, pay nagrak nok agapka, əsla na ma ərəh noki.

¹⁴ Yawe Məzuɓappak aswayək də ki zək nan na: Ha'aw gesiŋ nəknahkuk dit ɗiy va heyɗeŋɗe; wanzlaŋ vaŋvəl naska wəla akoko.

¹⁵ Daya dəɗɗa dələv də gagdak nani; aziwgin dəlvafuŋ də maɗɗula nani apakək disiŋ də əsən nani.

¹⁶ Dəka əpel nan iŋkile adawbayaŋ gəgay a disiŋ, adawsilgin slaybuwən hã sə təki dələv abaymani adaɗɗa əwiɗ na buna adawgilgin səmyã siddivit bətəŋɗe nani.

¹⁷ Ɗəf titir pak dərwayi əsən tay akan ɓa. Məhəs zəga pak wil ədanni aka wən na zəgakamaŋgəlva, vi zəgeɗkamaŋgəlva məɗɗan də təbəz van uwawəni ɗarə. Əmpəs tay addivit zəgeɗ vet ɓa.

¹⁸ Zəgeɗ ɗarəŋgə, wəza nawmas akani yi. As pak wazə pay nedawsilyew aketi.

¹⁹ An na Yakob na va zəgeɗiski ɓa, ndən dəzeɓ zəgeɗ pakə, Israyel dəsan mahəlfa an haran nani. Iya nan na Yawe Məzuɓappakə.

Əggrak na Babilon

²⁰ Istə gədəma avawa, gulom nawgaya. Nəgəmuk avawa, nətiɓ ɗiy dənduko gəm nəzet milyeŋge.

²¹ Də is nətəɓ pələs də məpeŋ akani, nətəɓ mawta na pələs də ɗəf naddəvən.

²² Də is nətiɓ zel dit gili, nətiɓ gewleɗ dit mezzeɗi, nətiɓ gewleɗ dit gorɗeŋge.

²³ Də is nətəɓ məzutaɗa də gazlaŋ nani, nətəɓ məzinse dit wasliɗe nense nani, nətiɓ deyeɗe na bərzləŋna-kivadəlva dit deyeɗe na kivadəlva.

²⁴ Ama horokum, nədawfaɗ sən Babilon dit ɗiy na Kaldiya aka mambray an aɗɗan a Siyon pakə Yawe aɗiymani.

²⁵ In yakəŋ əwak suko is mossorgo məzuzan təkiya Yawe aɗiymani. Is məzan dələv pakəŋkə, nəslanək vaw akoko, wanəslaŋguk səket milɓeɗi. Wanəkkpaŋgok va mossorgo na slayoffo,

²⁶ agəmaŋ gərəm dayday sənok da kawziwgin aka ənzla na gəla ɓa, awaniɓa nawɗi gabba gəla ɓa. Mərayguk faɗ kədawsoko Yawe aɗiymani.

²⁷ Aziwgin zəga narban əgay aka dəlva, affon moho aweleŋgit ɗiyi; məhheɗeɗ ɗiy-ɗar dəlpaŋgən dit mə Babilonɗe, aye milyeŋge na Ararat, na Minni gəm na Askenaz akani. Aɗi deyeɗe nalpa akani, aslin pilseŋge əwak sən məssehhit ɓəsɓəs va zaray.

²⁸ Məhheɗeɗ ɗiy-ɗar dəlpaŋgən dit mə Babilonɗe, milyeŋge na Mediya, deyeɗe na bərzləŋna-kivadəlva dit deyeɗe na kivadələv nan pakə gəm dələv na əzəm məlĩ nan pakə.

²⁹ Dələv tay əkkere, tay ɓalwãy-ɓalwãy sən əssa vi əɗɗum na Yawe aka Babilon tay əknaha. Tay əkkpaŋgan dələv na Babilon təki məraygən məza ɗəf akan ɓa.

³⁰ Məs məkret nalpa na Babilon appanənək əgaya addivit korguɗe adassoŋgu. Mekret amtəka, akkpaŋgaŋgək va gili. Məslakataɗe na maddamba anzlaŋka, məɗiyə offo sit gəleɗe nani.

³¹ Məzənzan tay ənzan əruf an mbərən məkə alabara tay ənzan kawruf an mbərən kawnah sən məlĩ na Babilon na: Məgulni walaŋgəla-metiŋ nok sə metteɓ man hã aza metteɓ man mbərən.

³² Mətakni təki naggara, aɗiyaŋgək offo sit wəleŋɗe, məzəlpaŋ attapaŋka.

³³ Vi vaŋki Yawe Məzuɓappak Maŋgəlva na Israyel anahə: Babilon tay pəh pəh məndapani. Abe siɗikke na, pay nawbələn wagapə.

Maŋgəlva armak wən nampəlkiyit ɗiy nani

³⁴ Nabukodonozor məlĩ na Babilon, azəmwəka, asərwəka, akkpaŋgawək va mesteɓe mekeleŋ. Asɗəkwək va zəga darawən adasɗək zəga, aknəh gədəvən dit zəgeɗ na sləma nawa, yas azgawa.

³⁵ Sãhã məs Babilon azəmgəməŋka dəkkpaŋ ka kini ɗiy na Siyon adawnahaŋgə! Mbel naw dəmndoŋ aket mə Kaldiyeɗi Yerusalem adawnaha.

³⁶ Vi vaski, Yawe anah vaŋka: In yakəŋ əka wən ammboko, wanəslan wən nampəl kiyko, wanəkkpa' pehe nani, wanərsla heret iŋkile nan dayma.

³⁷ Babilon wakkpaŋ va kiməskiya, təki nassa net wawayɗe, walaŋgəla məraygən nawɗi fofyoko akani gəm məza ɗiy addəvən ɓa.

³⁸ Tahəŋ əbay gagay sap va gewleɗ ɓooliɗi tay əhayaŋ va kirtit ɓooliɗ mugolti.

³⁹ Aka met tay sirsir aka zəga, dəpaski nəki sit əzəma. Wanəbey va əbay na mbazla, dənnekeŋgini; dəleŋgeŋgin pəwət faɗ məza adafɗahaŋ ɓa Yawe aɗiymani.

⁴⁰ Wanəke a təki nawtaw wəlet zəgeɗ va kirtit timeŋgiɗ nawtaw wəleti, va ndergeyẽɗ dit murgoɗe.

Dolgoy aka Babilon

⁴¹ Mbari məgul Sesak məs mammba dələv pak adawgagdakan nak di? Mbar agəɗ Babilon akkpaŋ məraygən a weleŋgit dəlveŋge di?

⁴² Pehe aguluk Babilon, asulupuk də pitimpitim net vovulumɗe.

⁴³ Walaŋgəleɗe gugriɗ nan arayaŋka, dələv mukuro yi akkpaŋgək təki warwarə, dələv məza dəf akan ɓa, məza məzutoŋ dəkan ɓa.

⁴⁴ Yawe amna: Wanəsil aka Bel, maŋgəlva na Babilon; wanəɗɗa dəptekgin zəga na barani, ɗiy azzoŋ na sipsip azan əmpa ɓa. Zlava na Babilon zlaŋ aɓəslka.

⁴⁵ Mənokum ɗiy nawa migil səddəvən; naway pak dəkõhgən kiyən səma ədagədəv na Yawe vakvakə!

⁴⁶ Vi mokrokum adamta ɓa, kədawgeslne'eŋ sən alabara hiwwe kəprəmaŋ aka dələv ɓa. Vi addəv əzva aŋka alabara hiwwe, əzva mbərən alabara hiwwe əmpa, gagay aka dəlva gəm məlĩ əɓɓah məlyã.

⁴⁷ Vi vaski, pay yaŋ əzzani wanəsil aket zəgeɗmeŋgilveɗ na Babilon. Wil wada dələv nan pakə. Kiygəbayit ɗiy nan wassoŋ kpororo addəvən.

⁴⁸ Disiŋ də dəlvafuŋ dit zəgeɗ naket pak waŋzlaŋ vaŋvəl sən ənneke aka Babilon, vi sə kəla disiŋ məraygən təki adazzoŋ akani. Yawe aɗiymani.

⁴⁹ Babilon wamtə tam aba Israyel. Ɗiy naka dələv pak tam wamtaŋ aba Babilon.

⁵⁰ Məs dəkõhoŋ səma masalam, məddoŋgu kəssoŋ aŋ ɓa. Sədaka, kəɗɗumoŋgən aka Yawe, məɗɗum aka Yerusalem.

⁵¹ Wil tay ədəmə, vi məprəmək əra! Mənam tat ərba wili vi melekeɗ atoŋgoŋguk a təki na matuya naddəv gəla na Yawe.

⁵² Vini kana, pay tay əzzani Yawe aɗiymani, wanəsil aket zəgeɗkameŋgilveɗi. Aka dələv nan pak kaprəmi əɓuhma net məs vaŋvi azeti.

⁵³ Kəta Babilon dəpeŋ a disiŋ zlaŋ, kəta dəkkpaŋgan əɓay na gbogboŋ nan məs ɗəf awɓap əgap azan ɓa, sə kəlazawa, məzuraygənən wagapaŋ azani, Yawe aɗiymani.

⁵⁴ Vamvəl tay əzzan sə Babilon; əza metiŋgin tay aka dələv net mə Kaldiyeɗi.

⁵⁵ Vi Yawe tay əraygən Babilon; azanək gogoyo metiŋgin naddəvən. Məzuzelɗe tay əŋzla vaŋvəl va vovolumɗe na pehe.

⁵⁶ Vi məraygən təki tay əzzan akani aka Babilon, mərmeti guromɗe nani gəm məŋzleti bəleɗe neti. Vi Yawe Maŋgəlva yi məzufaɗ va aza an məɗɗani əmndak adamndagani.

⁵⁷ Wanəbey ɗiy gugriɗ dit məs maɗɗuleɗ nani, deyeɗe na bərzləŋna-kivadələv nani, deyeɗe na kivadəlva nani gəm məzəlpaŋ məs mekret nan va əbay na mbazla. Waleŋgeŋ faɗə, afɗahaŋ na ɓa, məlĩ aɗiymani, iya nan na Yawe Məzuɓappakə.

⁵⁸ Vaŋ Yawe Məzuɓappak anah əmpa: Zlava slosloprok na Babilon əɓzla adaɓzla gərakə, kawɗi siti offo sit metiveɗ nan məɓeytiŋki ɗiy zit ayanən ɗarə, ɗiy ayanənək zit sən offo!

Ɗerewel məzgan a Efrat

⁵⁹ Əpel an məskəleŋ Yeremiya aɗi wən nan sən Seraya wətən Neriya, wətən Maseya gala ambat də Sedekiya məlĩ na Yuda a Babilon addəv əzva mapoɗo'ən səza akkpaŋ məlyã. Seraya yi daya aka gəla na məlĩ daska.

⁶⁰ Yas Yeremiya aver tatwãh an nazzan aka Babilon pak addəv ɗerewel taka, əpel məs məverin aka Babilon nəs pakə.

⁶¹ Yeremiya anah sən Seraya na, an kəgapək a Babilon kətəlgən ma aka əpeləs pakə.

⁶² Kənahgən na: Yawe is dəvok kənah aka wən na təkiyəŋ na: nawzani yi, vi ɗəf adawsan akan ɓa hã gap də zəga mamayã pakə, vi wasan təki məraygən faɗə.

⁶³ An kəgrakək əŋɗan ɗereweləŋka, kiynangən gərəm azani kəzgangən addak Efrat,

⁶⁴ kənahgən na: Vaski Babilon adawtəpani, agil na səddəv tatwãh məs nədawki akan ɓa. Zit adawyanəni: eskey əpel na Yeremiya abaymani.