Yeremiya 50 - Bible en Guidar

Əɓzla na Babilon, əpəl na Israyel

¹ Əpel an Yawe apel aka Babilon, dələv net mə Kaldiyeɗ də ma məskəleŋ Yeremiya.

² Məpel wənəŋ a weleŋgit ɗiyi, məprəmani, məmpa gabaga narbani, məprəmani, kədawɗamanən ɓa, Mənah na: Məgulni Babilon, wil tay ədanən maŋgəlva Bel, geslne armak maŋgəlva Marduk wil tay ədetin zəgeɗkamaŋgəlva nani meŋgilveɗ nan ageslne'eŋke.

³ Vi Vanday net ɗiy tay əzzan akan hã sə kəla disiŋ, nan wabar'ãt dələv nani ɗəf tay nassan akan ɓa. Təŋ səza ɗəf titir hã azet zəgeɗ mamayẽɗ pak anzoŋko, addoŋko.

⁴ Əvoŋ nan aka pay dəpaska Yawe aɗiymani: Mə Israyelɗe dit mə Yudeɗ wazzoŋ matakə wadawaŋ də əhəma, wakayanən Yawe Maŋgəlva neti.

⁵ Wassohõnən tive naddo a Siyon, wazinən heret dədaka. Wasapaŋ aza Yawe də wənmiyna an faɗ nazgəti kiyən ɓa.

⁶ Ɗiy naw tahəŋ lahəŋ va gilew məzeti məzuteɗeŋɗe net azetinik aket mossorgoɗe gugriɗe. Tahəŋ əpirkeŋ səka mossorgo gəm əpeŋ aka mbərən azgətaŋgək ki gazlaŋ neti.

⁷ Ɗiy en dədawrihinin pak tahəŋ əmpirnini, məzuzelɗe net tahəŋ ənahaŋ na: Məraygən ɓa vi aɗɗaŋ mambray aka Yawe, afən təstəsə, Yawe məs efiŋgiɗit aɗɗiyən əɗɗum net akani yi.

⁸ Mənzoŋ sə Babilon gəm səka dələv net mə Kaldiyeɗi migili, məssoŋ va murgoŋge abet gilewi.

⁹ Vi in yakəŋ əsilgin vanday net ɗiyi waniki əwak sən Babilon. Ɗiy vet wazzoŋ sə kəla disiŋ wassahaŋ akani siske na kawgulni yi. Herɗe net tahəŋ va məzəlpaŋ məs mekret dəskaŋ wəla, amndoŋ mekeleŋ ɓa.

¹⁰ Dələv net mə Kaldiyeɗ wakkpaŋ zəga narəh na mawgaya; ɗiy en nappohonən wabaŋgə Yawe aɗiymani.

¹¹ Ah, wakəɓap ənnekeŋgi, wakəbabyakaŋgə, mənokum məppohonən dələv nawa! Wakəzlahaŋ va bəlata a kevile gəm wakəhəmaŋ va pilseŋge na zeŋve!

¹² Wil tay ədətən mokum diyɗa mərbəsəti wil sət akən təwukum: ndəttə dərɓe faɗ sədəmbet ɗiy-ɗarə kpaŋ kapta-muyã, dələv məkuro gəm təki warwarə.

¹³ Sən ədagədəv na Yawe ɗiy wassoŋ akan ɓa, waray va kiməskiya. Mətoŋgoŋ dəza Babilon pak wakkereŋgi gəm wafyokoŋgu də ula vamvi an dəgəɗ pakə.

¹⁴ Mənokum ɗiy na bəle məssah tərwəsl ki Babilon. Muhẽt herɗe nokum akani, kədappanən dawhẽt herɗe ɓa vi mambray aka Yawe agəɗə.

¹⁵ Məŋgəsl vaŋvəl akan tərwəslə. Aslanək vani dədəkeɗ nan abzlaŋka, zlavaɗe nan abzlaŋka. Yawe dədampəlkiya, məmpəlgən kiya akani məgəɗ sən va agəɗə.

¹⁶ Məzet məzəslgaŋ gəm məzubəlaŋ na Babilon. Aba əzəmsahã addəv əlpa, ɗəf pak dəmndan azet ɗiy nani, dənzan aka dələv nani.

¹⁷ Israyel na, time məzani ɓooliɗ arɓahnənka. Ɗəf dəmpər daabəŋ na, məlĩ na Asiri yi. Sisske na Nabukodonozor məlĩ na Babilon məs dəŋgrofet slesleŋɗe nani.

¹⁸ Vaŋ Yawe Məzuɓappak Maŋgəlva na Israyel anahə: In yakəŋ əsilyew aka məlĩ na Babilon gəm aka dələv nan va nəsil aka məlĩ na Asiri.

¹⁹ Wanəmndagan Israyel a təki nawtaɗ nani. Wataɗ aka Karmel gəm aka Basan; aka mossorgo metiŋ na Efrayim gəm a Galad, wabə.

²⁰ Əvoŋ nan aka pay dəpaska, Yawe aɗiymani: Kawkayani heslepe na Israyel ya kawrahi ɓa, gəm mambray na Yuda, zəga tay mərəhən ɓa. Vi wanəvvuyoŋ sən ɗəf an nədambra pakə.

²¹ Asil dələv na Meratayim awak səni awaksit ɗiy na Pekod, azeti, azan arya net dərɓeget kakãhə, Yawe aɗiymani. Aɗɗa va nəɗi suk wən nan pakə!

²² Geŋgere na əlpa aka dəlva, əray metiŋgini!

²³ Mbari gədəma məzəŋgrof dəlvafuŋ akrap gəm aŋgəsl hoɓoɓ di? Mbari Babilon aray a weleŋgit dəlveŋge ɗar di?

²⁴ Pewẽŋ nənslən aboko, nok kəsən ɓa Babilon yaŋ mərəhuk na kərəmka, vi azaw Yawe kərəm mama.

²⁵ Yawe akoluk ma təki net gulomɗe nani; agilgitik gulomɗe na ədagədəv nani. Aski wəza na Daya Yawe Məzuɓappak aka dələv net mə Kaldiyeɗi.

²⁶ Sə təki dələv abayman pak, mide azani, məkol met mahẽɗ nani, məkkalan eskiŋ ɗigit va haya məzan kakãhə! Zəga taka adappa ɓa!

²⁷ Məzet məzəlpaŋ guromɗe nani, dəpurkoŋ a təki nawtaw wəla zəga! Əray aketi! Vi pay nasilye aketi yi, əvoŋ net agapka.

²⁸ Məprəm wəlet məs dənzoŋgu, en dəndəwəɗaŋ hã səka dələv na Babilon əpel alabara na əmpəlkiya na Yawe Maŋgəlva nam a Siyon: əmpəlkiya ammba gəla nani.

²⁹ Məkkelet məsənaŋ wən na bəle, Məslin aka Babilon. Dəmpanən dibirgidik net kiyən tərwəslə adappaŋ sənən təki nadder dirɓe ɓa! Məgəɗ sən va aza wəza nani, Məgəɗ sən va agəɗə! Vi akkesik hara Yawe ana Salala na Israyel.

³⁰ Vini gewleɗ nan adaskotoŋ aket tiveɗi, məzəlpaŋ nan pak adamtaŋ dəpaska, Yawe aɗiymani.

³¹ In yakəŋ əsilyew akoko: «məkkeshara,» Yawe Maŋgəlva Məzuɓappak aɗiymani. Vi pay nok agapka, pay naw, nawsilyew akoki yi.

³² Məkkeshara ataŋgbayka yaŋ askotu; ɗəf tay nawsilgin ɓa. Wanəɗi sit offo sit walaŋgəleɗe gugriɗ nani, wazəm təki kiyən tərwəsl pakə.

³³ Vaŋ Yawe Məzuɓappak anahə: Məsərni met mə Israyelɗe dit mə Yudeɗ sapə. Ɗiy en dəkenin aka balamə tay ətekini, əɓoŋgoŋ dappet əmbata.

³⁴ Məzukõhgit gboŋgboŋgi, iya nan na, Yawe Məzuɓappakə. Əhãy adawhãy ammbeti, vi kawki zazay aka dəlva, gəm kakkergit ɗiy na Babilon.

An Yawe aynə naɗɗa aka Babilon

³⁵ Masalam aket mə Kaldiyeɗi, Yawe aɗiymani! Gəm aket ɗiy na Babilon, aket ɗiy gugriɗ nan gəm aket məsmaɗɗulet nani

³⁶ Masalam aket məskaŋ heligi; tay əpeleŋ ɗarɗarə! Masalam aket məzəlpaŋ məs mekret nani; tahəŋ slərslər sən geslne!

³⁷ Masalam aket pilseŋge gəm aket mawteɗ net pilseŋge nani, aket ɗiy nan məslahã nananda; dəkkpaŋgaŋ gili! Masalam aka əzaɓ nani; kəta dəmõhnəni!

³⁸ Koloy aka heret iŋkile nani; dəkkpa'aŋgə! Vi dələv net zəgakamaŋgəlva yi, zəgeɗ məzlzlaɓanən ki ɗəfa.

³⁹ Vini muvoɗe nawra gəm derzliŋgeɗ azzo əssoŋ addəv walaŋgəla-metiŋ vani, herkeseŋɗe wassoŋ adaka. Ɗiy assoŋ na ɗah akan əmpa ɓa, va sayit ɗiy amə' pak ɗəf asan na akan ɓa hã faɗə.

⁴⁰ Va Maŋgəlva araygən Sodom, Gomorra gəm walaŋgəleɗe meggegiɗin ɗəf tay nassan adak də gəla akan ɓa Yawe aɗiymani.

⁴¹ Ɗiy tahəŋ əzzoŋ sə kəla disiŋ; vanday net ɗiy-ɗar gədakə dit milyeŋge gagdakɗe tay əzzoŋ hã sə təki dələv abaymani.

⁴² Bəle də tulhõ ammba veti, məsdarawɗeŋgə, ulasahã tay azet ɓa. Ɓaɓəlmet tay va vovolumɗe na pehe. Apeŋgeŋgik aket pilseŋge, məssẽhit va ɗiy məsla zit nawgay də is waŋ na Babilon.

⁴³ Məlĩ na Babilon aprəmək wən neti, abayək zəni, tatwãh arəhəka akker va guluk məɓay uwwa.

⁴⁴ In yakəŋ va ɓoolu məzugilyen səddəv kevile kpiŋ na Yurden əmbat də təki nawtaɗ ɗayɗayə. Vi in tat əgəm zuwa, in tat ərɓahan ɓa' sədaka. Naway məwelin nawɗi adak di? Naway va in nawnah su an naɗɗa di? Məlĩ mawani as van nawziw abaw di?

⁴⁵ Vi vaski məprəm an Yawe aziwgin naɗɗa aka Babilon, an aynan nawgəɗ sən dələv net mə Kaldiyeɗi: Sessel, kawketi va adawketin kirtit gilewi Sessel, waraygən gazlaŋ net sən wən neti.

⁴⁶ Aka ɓaɓəlma əmõh na Babilon, dələv aɓəlka; vaŋvəl agəɗək kaɗam kaɗam aweleŋgit ɗiyi.