Yeremiya 5 - Bible en Guidar

Walaŋgəla-metiŋgin məraygən baymani

¹ Məbbal aket tiveɗ na Yerusalem, kamə məwələ, məttoku; məkayan təki temtemi, an wakərahaŋ ɗəf təttaka məgəɗ təstəsə, təttaka məkayan ədaw aka tive təstəsə. Asna wanəvvuyon sən Yerusalem vani.

² Də adawnahaŋ dayday na: «Yawe madarani na» na uwawən na ndəɗaŋ əswayaŋgə.

³ Yawe horok tay ɗəhərra ammba ula ədaw təstəs ɓa sa? Kərgeke, ya dəttəmanən azet va zəga ɓa. Kəkgrekke, aɓoŋgoŋguk dawtaf əzga'a. Aɓɓəlanənək heret day ki gərma, aɓoŋgoŋguk dawmilye azoko.

⁴ Naw nəmnah: net məmeɗeŋɗeŋgə; mətemtiŋgə, vi dəsənnən tive na Yawe ɓa, dəsənnən ətawwən na Maŋgəlva net ɓa.

⁵ Dəɗah naw nəmmbat azet ɗiy gugriɗe, əpel dənɗaŋgə: vi net asənnənək tive na Yawe, asənənək ətawwən na Maŋgəlva neti. Mbaraka net pak: Aŋzluwənək zuk na ma wəleti aɓuhunək helege an diyneti.

⁶ Vini ɓoolu siddivit wəleŋɗe asil aket op, kəramuyã sura aboŋgeti. Balgam adasivu walaŋgəleɗe gugriɗ neti kawbakani ɗəf an dəgil səddəvən pakə, vi əɓoŋ net diyɗa yi, əppan Maŋgəlva net anzlərka.

⁷ Aka askəsna wavvuyan suk sa? Kirtuk azgawənka, aswayaŋgək də zəga məs Maŋgəlva yi ɓa. Nəbetke, də as pak ndəɗaŋ əku a gizbe, ndəɗaŋ əsap addəv gəla nat məpolkoyoku.

⁸ Tahəŋ va pilseŋge məzgilit mikrit moggeti, ɗəf pak tay fõyfõy ammbat ga meggeni.

⁹ Nəhãy na aka wən net zəgeɗis ɓa sa? Yawe aɗiymani, gəm nəmpəl na kiya aket ɗiy məɗɗaŋ zev as ɓa sa?

¹⁰ Məzlah kiyit mamberet nani məŋgrof guli net megezlembirkeɗ van məza kakah ɓa mətaw ki veti, Vi na Yawe əŋgə ɓa!

¹¹ Ɗiy na Israyel va en na Yuda azəmənək kiwa, Yawe aɗiymani.

Ərəh na əzgan Yawe

¹² Dəsənən Yawe ɓa, anahaŋ na: Tay ɓa, tatwãh arəhəm na ɓa, məwəl na masalam ɓa, may ɓa.

¹³ Məskəleŋɗe wakkpaŋgaŋ səmyã ɗarə, əpel na Maŋgəlva tay azet ɓa dəgəɗ aket vaska.

¹⁴ Vi vaski Yawe Maŋgəlva Məzuɓappak anah na: Adan kəpelin əpelis na, inyakən əɗɗi əpel naw amok va offo, ɗiyiŋki net sesemeŋgə offo wazime.

¹⁵ In yakəŋ əki ɗiy-ɗar akokum sə faraɗa, ɗiy na Israyel, Yawe aɗiymani; ɗiy məs awyaŋ ɓaŋ, ɗiy na maguwa, ɗiy məs kəsən met ɓaŋ məs kaprəm an adawpeleŋ ɓaŋ.

¹⁶ Gulom net tay va magamas məkol mani, ndəɗaŋ pak gəromɗe nalpaŋgə.

¹⁷ Ya wazəmnən zəga na mabardaw nok gəm way noko, wazimnin kirtuk mezeŋgleket dit muguluŋgiti, wazimnin wasliɗe dit gilew noko, wazimnin megezlembirkeɗ dit sokoyeɗ noko; wapuwetin walaŋgəleɗe gugriɗ nok na korgu məs kədawlan na zəga tay nawrəhuk sədak ɓaŋ də masalam.

¹⁸ Aka pay as daydayə, Yawe aɗiyman na, nəzokum na kaka' ɓa.

¹⁹ Pay kənahaŋ na: A gəla mi Yawe Maŋgəlva nam adaɗɗa səm vaŋ di? Kəzlan sitgin na: Va kəzgawən vi kaɗɗa wəza sit meŋgilveɗ na guw aka dələv na vawraykuməŋka, vaska'e, kedaɗɗaŋ wəza sit ɗiy-ɗar aka dələv məs nokumi ɓa!

Məsənni gagdak na Yawe ɓa

²⁰ Məpel wənəs sit kirtin Yakob, məprəman a Yuda də wənah na:

²¹ Kamə məprəm wənəŋ ɗa, ɗiy məs əɗɗum net gbeslsle məza maɗɗula ɓa, məs hereti, ya awlaŋ ɓa, məs sləmeti, ya aprəmaŋ ɓa.

²² Anawi kəgeslne'eŋ suwən na ɓaŋ sa? Yawe aɗiymani. Kəkkereŋ na abaw ɓa sa? In məs nəɗi hoyoŋko ka meŋge na pehe, meŋge an faɗə məs akkaɗ na kiyən ɓa: Wapilmis samə, ya aɓap na ɓa; vovolumɗe net wabayaŋ gəgay samə akkaɗɗaŋ na ɓa.

²³ Ya kiyit ɗiyəŋ ɓəli, məɓoŋtiŋ. Aktuhunək dəɓeti, addoŋko,

²⁴ Awnahaŋ a mekret na: Məgeslne' səm sən Yawe Maŋgəlva namə ɓa. Məzəpsəm buwən aka pay nani, an na mawala gəm an na mənziya, məzugesəm payɗe məɗiyit na mawala.

²⁵ Heslepeɗe nokum dədazlzleɓetin zəgeɗiski, mambrayɗe nokum atakənək moggon ɓa' səzokum.

²⁶ Vi aweleŋgit ɗiy nawa, mərəhi ɗiy məsdarawəɗe əsekeɗeŋ təki limbi'limbi' va mərmaŋ biŋgeɗi tahəŋ ənslənaŋ bizwili vi karme ɗiyi.

²⁷ Va bəbəta dəknah dit biŋgeɗi, vaski gəleɗe net aknahaŋ dit zəgeɗ na vərumu. Vini aɓayaŋgə, assoŋ məs aryeɗi,

²⁸ mikirit lokoɗok lokoɗoku. Akkaɗaŋgək ki meŋge na mambraya. Aɗɗaŋ zəga təstəs ɓa, azgaŋ sləma aka mitiwe ɓa, tay əɓayaŋ addəv əraha. Abbahaŋ sənən məzuray ɓa.

²⁹ Nəhãy na aka wən net zəgeɗis ɓa sa? Yawe aɗiymani, gəm nəmpəl na kiya aket ɗiy məɗɗaŋ zev as ɓa sa?

³⁰ Zəga na dərwa gəm daryaw agəɗək aka dəlva:

³¹ Məskəleŋɗe aɗɗaŋgək kəleŋ na uwawəna, məsdəlveŋge tahəŋ ətaf ərəh net kaka'ə, ɗiy naw tahəŋ ulanən lew a ma hereti. Ya mi kədaɗɗaŋ dərɓaga as di?