Yeremiya 49 - Bible en Guidar

Əpel aket mə Ammonɗe

¹ Aka wən net mə Ammonɗe na, vaŋ Yawe anahə: Zeŋvin Israyel tay ɓa sa? Məzəm gəla nan tay ɓa sa? Vimi məlĩ net mə Ammon amõh Gad may ɗiy nan assoŋ də gəla a walaŋgəleɗe gugriɗ nan di?

² Vini pay yaŋ əzzani Yawe aɗiymani: anəsilgin vaŋvəl nalpa a Rabba net mə Ammonɗe. Wakkpaŋ təki ɗigitte məraygəni, offo wazim meggeŋgiɗin. Asna Israyel wamõh dələv nani səvet en dəmõhnən səvani Yawe anahə.

³ Hesbon aɓuh moko vi məzani Ay. Meggeŋgiɗin Rabba məhəmə məgul lukut na gəlabaya, məɓuh mokum, məgəɗ ndəwi ndəwi addəv zlava: vi məlĩ net tay əmbat aka balam sap dit məsdəlveŋge gəm ɗiy gugriɗ nan pakə.

⁴ Mi kədawkaɓgən də walaŋ di? Walaŋ nok arayka waŋ məɓoŋgət məs təppan zət aka arya nata. Ənah na: «Naway dədazzan əwak su di?»

⁵ Inyakəŋ əki geslne akoko Yawe Maŋgəlva Məzuɓappak aɗiymani: wade kiyuk tərwəslə. Karɓohkumi ɗəf pak dəkki aɗi harani, ɗəf tay nakkelet ɗiy en dədanzoŋ ɓa.

⁶ Sədərɓagan na, wanəzaɓan wən net mə Ammonɗe Yawe aɗiymani.

Əpel aka Edom

⁷ Aka wən na Edom. Vaŋ Yawe Məzuɓappak anahə: Məsmaɗɗula tay aret mə Temanɗe əmpa ɓa sa? Əsən azək səweleŋgit məs kiyit sa? Maɗɗulet arayək sa?

⁸ Məkkpaŋgə, mənzoŋgu, məso' vov kəssoŋgən adaka ɗiy na Dedan, vi wanəki əza akokum mənokum zəv Esaw; pay nədawsilyew akani.

⁹ An məhoroŋ uwa net wəleŋɗe azzoŋguk anokum da, mokkoy tay adappaŋ ɓa. Dəfəɗ an məhelɗeŋge atoŋgoŋko, waraygənən zəga va aŋglaŋgə.

¹⁰ Vi intə nappət Esaw, nəsənək gəla əzaɓ nani: aɓap na əɗam əmpa ɓa. Zeŋvin azəka. Milmiŋgiɗni, məggegiɗni, azaŋka, ndən zək nan asan na ɓa.

¹¹ Appet mitiweɗ noko wanəsgile, gil net gəbayɗe nok waɗiyən əɗɗum net akawa.

¹² Vi vaŋ Yawe anahə: En məs nətawwən aket nawzəm səddəv maway nawzəmsãhã ɓa, wazəmaŋgə. Kəta nok wakəsok də mezlibezlibe na moko, ya kəsok na də mazlibezlibe na mok ɓa, wakəzəmsãhã!

¹³ Vi də in sən kiyu nəswayə, Yawe aɗiymani, Bosra wakkpaŋ məraygəni, zəga na əra, kiməskiya, wakkpaŋ zəga na mefɗeke. Walaŋgəleɗe gugriɗ nan pak wakkpaŋgaŋ kiməski hã faɗə.

¹⁴ Wən nəprəm səma Yawe na, məsləni maslən a weleŋgit ɗiyi: Məkkalə, məddoŋ akani! Məsil aza əlpa!

¹⁵ Awla wanəkkpaŋgok muzliya nammbet ɗiyi. Məzelok səmmbet ɗiyi.

¹⁶ Ezlezle nazok agesnegitik ɗiyi! Is ula zuk daykiyit ɗiyi ki zuk kədawmbəɗani, is tat a poporit gərmeŋge, kəsok a təki məɓayən. Ya kəta aɗi gəla nok hã a disiŋ va na gazla zlaŋgə, wanəprikguko. Yawe aɗiymani.

¹⁷ Edom wakkpaŋ təki məraygəni; mətoŋgoŋ dəzan pak wakkereŋgi gəm wafyokoŋgu də ula vamvi an dəgəɗ pakə.

¹⁸ Va Sodom, Gomorra gəm walaŋgəleɗe meggegiɗin arayaŋgə, ɗəf tay nassan adak də gəla ɓa, ɗəf titir asan na akan ɓa Yawe anahə.

¹⁹ In yakəŋ va ɓoolu məzugilyen səddəv kevile kpiŋ na Yurden əmbat də təki nawtaɗ ɗayɗayə. Vi in tat əgəm zuwa, in tat ərɓahan ɓa' sədaka. Naway məwelin nawɗi adak di? Naway va in nawnah su an naɗɗa ɓa di? Məlĩ mawani as van nawziw abaw di?

²⁰ Vi vaski məprəm an Yawe aziwgin nawgəɗ sən Edom, an aynan naɗɗa aka wən net ɗiy na Teman: Sessel, kawketi va adawketin kirtit gilewi Sessel, waraygən gazlaŋ net sən wən neti.

²¹ Aka ɓaɓəlma əskot neti, dələv aɓəlka; vaŋvəl net kaɗam kaɗam aprəmək hã pehe net vəlarɗe.

²² Yaŋ va mogdok adawveŋ adabbal persleken pəparra aka Bosra. Pay nani məs mekret na Edom məkret wazlah va makrat guluk adawzla də uwa.

Əpel aka Damas

²³ Dəwəl sən Damas na, wil tay ədenin may Hamat də Arpat, vi aprəmaŋgək wən mbərayən, geslne armeke va pehe məbay gagay məs aɓap na əɓəta ɓa.

²⁴ Damas addakka aktuhuk dəɓan vi kanzani, gəslne armaka, əzəmsahã də tatwãh arəhək va guluk məɓay uwa.

²⁵ Mbarmbari agəɗ məppan walaŋgəla gagdakəŋ walaŋgəla-metiŋ məs dəsan ənnek nawəŋ di?

²⁶ Vini gewleɗ adaskotoŋ aket tiveɗ nani, məzəlpaŋ nan pak wamtaŋ pay dəpaska Yawe Məzuɓappak aɗiymani.

²⁷ Wanəɗi sən offo sən zlava na Damas; wazəm gəla na məlĩ na Benhadad.

Əpel aka mahəlfa net Arabɗe

²⁸ Aka wən na Kedar gəm milyeŋge na Hasor məs Nabukodonozor məlĩ na Babilon adəmsiti, vaŋ Yawe anahə: Məsil məddoŋ aka Kedar! Məzet kirtin Kedem.

²⁹ Migim gizlirkeɗe neti gəm gilew neti, gabaga na gizlirke net gəm zəgeɗ net pakə! Migim zlogomeɗ neti, məŋgəsl vaŋvəl aketi: geslne dəsan də təki pakə!

³⁰ Ɗiy na Hasor məgəm zukum mənzoŋ tərayə, məssoŋ addivit vovɗe kpukpumɗe, Yawe aɗiymani. Vi Nabukodonozor məlĩ na Babilon aziwginik an nawgəɗ sukum aynanək an nawgəɗ sukum.

³¹ Misili, məddoŋ aket ɗiy məs tahəŋ də əɗɗum aket ɓa məs dəssoŋ fendeŋge Yawe aɗiymani məs zlava tay aket ɓa, zəga nawslakat metive tay ɓa. Məs dəssoŋ gayəŋka!

³² Kawmõhti zlogomeɗ neti zəgeɗ memeyẽɗ net diyɗaŋka wasan zəga nawrəh na ma əgaya. Wanətəreyet tapaslay məfaɗənɗes pak ammba səmyã. Wanəki əza səŋga səŋga pak aketi, Yawe aɗiymani.

³³ Hasor wakkpaŋ təki nawɗam net wawayɗe, təki məraygən faɗə. Ɗəf tay nassan adak ɓa ɗəf titir tay nassan də gəla akan ɓa.

Əpel aka Elam

³⁴ Əpel na Yawe sən məskəleŋ Yeremiya aka wən na Elam, aka ətəŋ əzəm məlĩ na Sedekiya məlĩ na Yuda dawnəh na:

³⁵ Vaŋ Yawe Məzuɓappak anahə: In yakəŋ əŋzlan bəle na Elam, məs dəsan ətəŋ na gbogboŋ nani.

³⁶ Wanəsilgən səmyã təɓələn poɗo sə kəla tapaslay pay poɗo aka Elam. Wanətreygit ammbet səmyeŋges pakə. Dələv tay məs mərɓihit sə Elam addoŋ na adak ɓa ɓa.

³⁷ Wanəgeslnegit mə Elamɗe abet məzuzelɗe neti, abet ɗiy en dəŋglaŋ kawzeti. Wanəki əray aketi: ana ədagədəv naw vakvakə Wanəslən masalam ammbeti hã gap in gərak əgrekti, Yawe aɗiymani.

³⁸ Wanəɗi mazaŋga na məlĩ naw a Elam wanəzan məlĩ dit ɗiy gugriɗ nadaka. Yawe aɗiymani.

³⁹ Ya pay wade, wanəsilgin Elam Yawe aɗiymani.