Yeremiya 48 - Bible en Guidar

Əpel aka Mo'ab

¹ Vaŋ Yawe Məzuɓappak Maŋgəlva na Israyel apel aka wən na Mo'ab: Əray aka Nebo: Vi arayka! Wil ara Kiryatayim məgulni! Wil ara walaŋgəla na korgu, addəv geslne yi.

² Gagdak na Mo'ab tay əmpa ɓa. Əray məɗɗum sən Hesbon: Məndamə məzangən səret dəlveŋge! Isi Madmen pak wakəsok gəkgəkə, masalam wazboko.

³ Vaŋvəl tay dədazzan sə Horonayim na: Haya mənamə, əray metiŋgini!

⁴ Mo'ab arayka, gewleɗ nan tahəŋ əzlaŋ vaŋvəla.

⁵ Əteŋ a Luhit na əteŋ də əhəma. Əpirke sə Horonayim, ɗəf əprəm vaŋvəl nawraya.

⁶ Mənzoŋgu, məkõhgən kiykum! Məssoŋ va koro nawra.

⁷ Ha'aw adan kəɗi əɗɗum nok aka wəza nok gəm aka ərəh noko. Is vat zlaŋ, kagulki yi! Kemos maŋgəlva nokum wal aka balam, məsdəlveŋge nani gəm ɗiy gugriɗ nan sapə.

⁸ Məraygən təki wade a walaŋgəla-metiŋ temtem pakə, walaŋgəla-metiŋ tay nawkõh ɓa. Walaŋ wazə, mossorgo mə fihfih warayə. An Yawe anahi yi.

⁹ Məssah sən persleke Mo'ab, vi dəveŋgin dəlgəni! Walaŋgəleɗe gugriɗ nan wassoŋ kiməskiya, wakkpaŋgaŋ məza ɗiy addivit ɓa.

¹⁰ Əray aka məgəɗ wəza na Yawe məza də makran taka ɓa, əray aka mətak masalam nan səzet mbeli.

¹¹ Səka gawla nani Mo'ab tay də əɗɗum ɓa: tay kiyən foŋgo aket ndirkiɓ nani məɗarni ɗah sə mosgoy a mosgoy mbərən ɓa. Məsimgini ɗah ɓa, vini nenek nan asan va lahəŋka. Məŋgənən dəddəɗ ɓa.

¹² Vini, pay tay əzzani, Yawe aɗiymani, wanəslin sən məzuɗarəni, wamanən siddivit mosgoyɗe nan gərakə, wakkrepin hinziŋgiɗ nani.

¹³ Wil wada Mo'ab sən Kemos maŋgəlva nan va wil ade mə Israyelɗe sən zəgakamaŋgəlva net na Betel məs aɗiyən əɗɗum net pak akani.

¹⁴ Mbar kədawɓap ənahaŋ na: Məs makram mənani gəm məzəlpaŋ mənani di?

¹⁵ Mo'ab arayka, məderzehi aket walaŋgəleɗe gugriɗ nani tawkenin gewleɗ guromɗe nan a təki nawtaw wəleti. Məlĩ məs iya nan na Yawe Məzuɓappak aɗiymani:

¹⁶ Əza go'oy nazzan aka Mo'ab, əza nan tay əzzan də kakara sawɓa.

¹⁷ Ɗiy dəssoŋ kiyən karkarə məs dəsənən iya nan pakə, məɓlan kikum akani. Mənah na: Mbarmbari zleŋge na məlĩ, zleŋge na gagdak aŋgəsl di?

¹⁸ Waŋ na Dibon, aprik səka gagdak noko, assok addəv əɗɗa meme, vi məraygən Mo'ab tay əzzan əwaksuko, waɓzliw korguɗe nok afuŋ.

¹⁹ Aziw aka tive, aga waŋ na Arower. Attokon ɗəf an dədanzan gəm an dəndəwəɗ na: Mi dəgəɗ di?

²⁰ Wili tay ədanən Mo'ab vi geslne armaka, mənɗəsə, məŋgəsl vaŋvəla; məprəman a Arnon na məzani Mo'ab.

²¹ Ətawwən dəde aka dələv na mossorgo mə fihfih, aka Holon, aka Yasa gəm aka Mefat,

²² aka Dibon, aka Nebo, aka Bet-Diblatayim,

²³ aka Kiryatayim, aka Bet-Gamul, aka Bet-Meyon,

²⁴ aka Keriyot, aka Bosra gəm aket walaŋgəleɗe gugriɗ en faraɗa dit en go'o naka dələv na Mo'ab pakə.

²⁵ Mohõk dəsan gbogboŋ nok apoŋko Mo'ab, vok aŋgəslka, Yawe aɗiymani.

²⁶ Məzlər sən mbazla adan aɓaygənək kiyzən day ki Yawe. Mo'ab Dəkəɗəŋgəl aka əpar nani dəkkpaŋgən zəga nawmas akani.

²⁷ Ya Israyeli zəga nawmas nok ɓa sa? Aret məhelɗeŋge mərəhən ka addəv əpel nok akan pak na is əɓlan kiyuk sa?

²⁸ Məppet walaŋgəleɗe gugriɗe, məssoŋ a popor gərma ɗiy na Mo'ab. Məssoŋ va mukuɗuŋgulo məzaɓ gəla nan bal sən ma Bətəŋ.

²⁹ Məprəmək əɓaygən kiya na Mo'ab, va aɓaygən kiyzəni, haya əkuwa, haya keppe, haya əkaɓa, haya ərga makra.

³⁰ Naw nəsənka, Yawe aɗiymani, tay ədaygənəni, tay əkaɓaŋgə; ya atəraŋ na ɓa.

³¹ Vini kana, in tat əɓuh maw aka Mo'ab, in tat əŋzla vaŋvəl aka Mo'ab dəwənnani in tat əhəm ammbet ɗiy na Kir-Heres.

³² Ammba guli net megezlembirkeɗ na Sibma nədawhəm day ki ammba Yazer. Kivok anzanək balsən pehe hã gap a pehe na Yazer. Ya məraygən təki askotuk aka uwwa noko, aket mokkoyɗe noko.

³³ Ənnek gəm əbabyak azaŋgək sə guli net wəleŋɗe gəm səka dələv na Mo'ab. Nəkkpa'ək mbazla sə mosgoyo, tay əɗɗaŋ hoyohoyo a təki nawɗot uwwa net wəleŋɗe ɓa; hoyohoyo tay ɓa.

³⁴ Ɗiy na Hesbon tay ənzlaŋ vaŋvəla, tay əprəm a Eleyale, gogoyo net tay əgap a Yahas hã əgap a So'ar, Horonayim, Egilat-Silisiya. Iŋkile na Nimrim zlaŋ akkpa'aŋka.

³⁵ Wanəzet ɗiy məddoŋ a matuya kawzla tursan sit meŋgilveɗ net sə Mo'ab, Yawe aɗiymani.

³⁶ Vini nədawɓuh maw aka Mo'ab in ənɗes va ɓaɓəlma pozloro, nədawɓuh maw aket ɗiy na Kir-Heres in ənɗes va ɓaɓəlma pozloro, vini ərəh an akkalaŋ pak azə.

³⁷ Vi naway pak afaɗək kiyən, afiwik eŋgemeni. Antarək van pakgəni, aynaŋgək gabaga na sak a gizeti.

³⁸ Aket gəleɗe məkgba'aɗe na Mo'ab gəm aket tiveɗ nan pakə, əhəmi gəm əŋɗəsa. Vi nəkrapək Mo'ab va mesteɓe məs maw tay akan ɓa, Yawe aɗiymani.

³⁹ Ndəni kan dəskot sa? Məɓuh mokum. Ndəni kan sa? Mo'ab akkpaŋgan doŋgbolən sit wili. Mo'ab akkpaŋ ka zəga nawmas akan gəm zəga naggət akan azet ɗiy dəkaraŋ kiyən pakə.

⁴⁰ Vi vaŋki Yawe anahə: Va kəɓəs na gazla dəveŋ dəppar persleken dəka Mo'ab.

⁴¹ Məzəmni Keriyot, Mesadot mətakni. Asna, pay nani, məzəlpaŋ məs mekret na Mo'ab wassoŋ va guluk məɓay uwwa.

⁴² Kawzani Mo'ab, ɗiy nan wazaŋgə vi aɓaygənək kiyzən aka Yawe.

⁴³ Geslne naɗɗa slərslərə, bətəŋ gəm bizwil: Tahəŋ vikum ɗiy na Mo'ab, Yawe aɗiymani.

⁴⁴ Ɗəf dədanzan sən gəslne wabət a vovu. An dəgil sə vov warəm aka bizwil. Vi wanəki əzva an nawaksən Mo'ab Yawe aɗiymani.

⁴⁵ Məzənzoŋ waziweŋ ara zeŋgile na Hesbon məyeti. Ya offo wagil sə Hesbon, hərzləm offo səna məlĩ na Sihon da, wazla tapaslay Mo'ab gəm bəbərkiyit məŋglaŋ əgaya.

⁴⁶ Əray akoko Mo'ab! Ɗiy na maŋgəlva Kemos azaŋka. Vi mərmeti kirtuk məzeŋgleket dit muguluŋgit aka balamə.

⁴⁷ Wanəzaɓan wən na Mo'ab addəv pay an dədazzani Yawe aɗiymani. Aŋ ətawwən na Mo'ab adawziwwe.