Yeremiya 46 - Bible en Guidar

Əɗɗa kəleŋ aket ɗiy-ɗarə ( 46:1—51:64 )

¹ Əpel na Yawe dəde sən məskəleŋ Yeremiya aka wən net ɗiy-ɗarə.

Əska wəla aket mə Eziptiɗ a Karkemis

² Dəwəl sən Eziptə aka wən net məzəlpaŋ na Farawən Neko məlĩ na Eziptə. Gala asan a Karkemis ama Efrat a təki məlĩ na Babilon Nabukodonozor adəmsəni, aka əzva mapoɗon nawzəm məlĩ na Yoyakim wətən Yosiyas məlĩ na Yuda.

³ Məzaɓan baray an muzliya, gəm baray an metiŋgini. Məgil ama əlpa.

⁴ Məkyek pilseŋge, məpeŋgi məpeŋgeŋ pilseŋge! Məziw dit kulpupɗe na təbəz akokum! Məzeɓet tulhõŋge, məgul lukutɗe na təbza.

⁵ Mi dəgəɗ nule slərslər əmndoŋ dirɓe di? Məbey məzəlpaŋ guromɗe neti, ənzo adanzoŋgu akkpaŋganən heret ɓa geslne tay kiyit tərwəslə, Yawe aɗiymani.

⁶ Məs tələn nek akõh na ɓa, gurom nalpa akõh na ɓa, də tapaslay pay na kəla disiŋ ama Efrat, wataŋgbayaŋ, waskotoŋgu.

⁷ Miy dədawgul təki va məlpa Nil məknahni va məlpa məs iŋkile nan adawbayaŋ gəgayəŋ di?

⁸ Eziptə yi va Nil məknahən, gəm va məlpa məs iŋkile nan adawbayaŋ gəgayə, tay ənah na: Wanəgul dəlvafuŋ wanəzet walaŋgəleɗe gugriɗ dit ɗiy naddivit pakə.

⁹ Mətoŋ əlpa pilseŋge, məzla aket mawteɗ net pilseŋge! Guromɗe mətoŋgu, na Etiyopi gəm na Put məs dəsənan wən net barayɗe, gəm mə Ludɗe dəsənaŋ bəle!

¹⁰ Payiski pay na Maŋgəlva Yawe Məzuɓappak, pay nampəlkiya aket məzuzelɗe nani. Masalam wazime wabə kpe' dit mbel net hã kiyən viwwe vi əzaɓ-Maŋgəlva mədan sən Daya Yawe Məzuɓappak aka dələv na kəla disiŋ ama Efrat.

¹¹ Dok a Galad akay alapa Is waŋ gbuɓɓo na Eziptə, ɗari kədanzlərgit miheɗi: Kənzaɗ na ɓa.

¹² Ɗiy na guw aprəmənək ərba wil noko, vi əɓuhma nok tay əprəm aka dələv pakə. Gurom nalpa argizl sinik gurom nalpa mbərən, askotoŋguk sulegit pak afuŋgu.

Məgulni Eziptə

¹³ Əpel an Yawe apel sən məskəleŋ Yeremiya gala Nabukodonozor məlĩ na Babilon ade əwak sən dələv na Eziptə.

¹⁴ Mərban a Eziptə məprəman a Migdol, məprəman a Memfis gəm a Dafne. Mənah na: Aziw a gəloko, asla zuko! Vi masalam tay əzim ɗiy kiyuk tərwəslə.

¹⁵ Vimi Apis medgeɗge zəgakamaŋgəlva nok anzan di? Dəɓap əziw ɓa vi Yawe aslaŋganəka,

¹⁶ anzlərgənək ətaŋgbãya, ɗəf pak əskot aka məlməni. Tay ənahaŋ na: Asil amndam səm azet ɗiy namə aka dələv net migilmə, sən masalam məzəm təkiya.

¹⁷ Məlvan Farawən məlĩ na Eziptə adak na: «Geŋgere kaɗam kaɗam ɗarə!»

¹⁸ Madaraw nani, məlĩ aɗiymani iya nan na Yawe Məzuɓappak: Va mossorgo Tabor aweleŋgit mossorgoɗe, gəm va mossorgo Karmel aka pehe, tay əzzani.

¹⁹ Atər zəga nok nadda aka balam waŋ na Eziptə. Vi walaŋgəla na Memfis wakkpaŋ kapta-muyã kawzlani, ɗəf asan na addəvən ɓa.

²⁰ Eziptə, Bəlatək lelewkə! Bembir tay əzzan sə kəla disiŋ akata.

²¹ Məzəlpaŋ nan ka dala dayday tahəŋ va kirit wasliɗe məzgəla. Ya ndəɗaŋ veti aktuhunək dəɓeti anzoŋguk sapə. Dəɓap əziwweŋ gala pay nawza net agap aket ɓa, pay nawsilye aketi.

²² Eziptə tay ənzan va dohõ suluhsuluh Vi tay əzzoŋ də gagay akani dit zlimbeɗ va məpɗakaŋ seseme.

²³ Abilinik wəleŋɗe nata, də ngərəɓ zlaŋ Yawe aɗiymani. Vi tahəŋ gidigidi daykiyit heyɗeŋɗe aŋɗaŋ ɓa.

²⁴ Waŋ na Eziptə tat aket wili: məpsittə yi avet ɗiy na kəla disiŋ.

²⁵ Yawe Məzuɓappak Maŋgəlva na Israyel amna: Wanəsil aka Amon zəgakamaŋgəlva na Tebes, aka Farawən, aka Eziptə gəm aket meŋgilveɗ nani, aket milyeŋge nani, aka Farawən gəm aket ɗiy en dəɗiyən əɗɗum net akani.

²⁶ Wanəppet avet ɗiy məzukayanən zeŋgileti: Ava Nabukodonozor məlĩ na Babilon gəm avet məɗɗaŋ wəza nani. Sədərɓaga aska, wasan a gəlan va lahəŋka. Yawe aɗiymani.

Israyel wakõhu

²⁷ «Is Yakob, gawla nawa, kəgeslne ɓa; kəkker ɓa, Israyel, vi in yakəŋ əkõhguk sə faraɗa. Gəm kirtuk səka dələv na balam neti. Yakob wamili, wasan kiyən foŋgo, wasan məza də əɗɗum ɓa, ɗəf tay nattapan ɓa.

²⁸ Is Yakob, gawla nawa, kəgeslne ɓa; Yawe aɗiymani, vi in tat də isi. Vi wanəggrek ɗiy-ɗar məs nəɓɓahuk adak pakə, nok hara na, nəzok na ɓa, ya wanəzga suk də ətawwəna. Wanəɗiyuk ka ɗəf də mezlibezlibe na man ɓa!»