Yeremiya 44 - Bible en Guidar

Əpel aket mə Yudeɗ məs dəɗamaŋ a Eziptə

¹ Əpel an dede sən Yeremiya viyit mə Yudeɗ məs dəssoŋ aka dələv na Eziptə pakə, en dəssoŋ a Mikdol, a Dafne, a Memfis gəm aka dələv na Patros dawnəh na:

² Vaŋ Yawe Məzuɓappak Maŋgəlva na Israyel anahə: Nokum kulanənək tatwãh nəki aka Yerusalem gəm aket walaŋgəleɗe na Yuda pakə, yeŋ pay dəpaŋ kiməskiya, ɗəf tay addivit ɓa.

³ Sən zəga naɗɗa net daryaw aɗɗaŋ suwən də əmbat əzla tursan sit meŋgilveɗ meɓɓet məs dəsinnin ɓa, mənokum ɓa, efiŋgiɗkum ɓa.

⁴ Naw nəppan əslən sukum məɗɗaŋ wəza naw məskəleŋɗe ɓa, əslinit dawnəh na: Kədaɗɗaŋ zəga daryaw məs nəzel ɓa.

⁵ Ya dəprəmaŋ ɓa, dəpakən sləmet ka kappan əɗɗa zəga mbərayən net ɓa, ka kappan gabba əzla tursan sit meŋgilveɗ meɓɓet ɓa.

⁶ Ndəni herɗe naw gəm ədagədəv naw afyohoŋgu, azlenin walaŋgəleɗe na Yuda dit tiveɗ na Yerusalem akkpaŋgaŋ kiməskiya, mbəreyit va dəpaŋkəŋka.

⁷ Ya kakaŋ na, vaŋ Yawe Maŋgəlva Məzuɓappak, Maŋgəlva na Israyel anahə: Vimi kədaɗɗaŋ mbərayən metiŋgin vaŋ sən zukum ka kappan Yuda məza zel ɓa, gil ɓa, kirin gəm məpriŋgeɗ ɓa gəm ka ɗəf adambra ɓa di?

⁸ Mənokum tat ədansu gədəvu də wəza na vokum, mənokum tat əzla tursan sit meŋgilveɗ meɓɓet aka dələv na Eziptə məs kəddoŋ əssoŋ adaka, ka mənokum kawza ka kakkpaŋ zəga na mefɗeke gəm zəga na əra aweleŋgit ɗiy naka dəlva.

⁹ Kəzgətaŋgək ki zəga daryaw məs efiŋgiɗkum, milyeŋge na Yuda dit gil neti gəm zəga daryaw nokum, net gil nokum məs dəgəɗ aka dələv na Yuda gəm aket tiveɗ a Yerusalem sa?

¹⁰ Hã pay dəpaŋka, dəɗiyaŋ marava ɓa, ɗəf tay dəgeslne ɓa, ɗəf tay dədaw aka mahenziŋ ɓa, aka an məziwgin məs nəpsukum abokum gəm abet efiŋgiɗkum ɓa.

¹¹ Ya vaŋ Yawe Məzuɓappak Maŋgəlva na Israyel anahə: In yakəŋ əzi haraw akokum ka na əraya, gəm kawzan Yuda də wən nani.

¹² Wanəgim en dəmbraŋ sə Yuda, məs dəɗinən heret nawbat aka dələv na Eziptə kassa adaka, wagrakaŋ pak aka dələv na Eziptə. Waskotoŋ ama masalam, sən mayã. Wagrakaŋ təŋ səka muzliya gap ɗəf metiŋgin, wamtaŋ ama masalam gəm sən mayã. Wakkpaŋgaŋ zəga na mahanay, məreygit tipi, ka zəgeɗ net mefɗeke gəm zəgeɗ na əra.

¹³ Wanəsil aket ɗiy en dəssoŋ aka dələv na Eziptə va nəsil aket ɗiy na Yerusalem də masalam, də əki mayã gəm gəbaymərma.

¹⁴ Səmmbet ɗiy en dəppan mederet na Yuda məs dəzzoŋ əsso aka dələv na Eziptə, ɗəf tay nawkõh kazzo aka dələv na Yuda məs adaɗɗumoŋ nawmilyeŋ kasso adak ɓa, vi amilyoŋ na ɓa abbər ɗiy en dəndəwəɗaŋ ɓa.

Tuyeŋge mədet sət ma'ãyək na disiŋ

¹⁵ Ɗiy pak məs dəsənən na gil net tahəŋ əzlaŋ tursan sit meŋgilveɗ meɓɓeti gəm gil dəsapaŋ adak diyɗa, vasna ɗiy dəssoŋ də gəla a Eziptə pakə, a Patros azlan sənən Yeremiya dawnəh na:

¹⁶ Əpel kəpel səm də iya na Yawe əŋ na, məprəm suk na ɓa.

¹⁷ Vi əpel an dəgil səmam pak mədazba, kawzla tursan sət Ma'ãyək na disiŋ, waməpeslit va məgəɗə, mənamə, efiŋgiɗmə, milyeŋge namə, deyeɗe namə, a walaŋgəleɗe gugriɗ na Yuda gəm aket tiveɗ na Yerusalem. Gala mədaɗɗa zəgeɗiski, mənam tat əba də zəga nawzəma, mənam tat əsam zayə tatwãh tay məwəl ɓa.

¹⁸ Ya səza məppan gabba əzla tursan sət Ma'ãyək na disiŋ gəm əpeslta, zəga pak tay əkkpap səvamə, mənam tat əgrak ama masalam gəm sən mayã.

¹⁹ Yaŋ gil anahaŋ na, an mənam tat əzla tursan sət Ma'ãyək na disiŋ gəm əpeslit na, məza zilŋgiɗim dətafnən ɓa mədaɗɗa sət gəpa məpəpla dəgil va ndəta gəm mbazla nawpeslət sa?

²⁰ Yaŋ Yeremiya anah sit ɗiy pakə, zel dit gili gəm ɗiy pak məs dəzlan sənən əpel dawnəh na:

²¹ Tursan kəzlaŋ a walaŋgəleɗe gugriɗ na Yuda gəm aket tiveɗ na Yerusalem, mənokum, efiŋgiɗkum, milyeŋge nokum, deyeɗe nokum gəm ɗiy naka dəlva, Yawe dəɗɗumon wən nan hã dətoŋ a makran ɓa sa?

²² Yawe dəɓap əɓəs daraw na wəza mbərayən nokum məs kəɗɗaŋ ɓa, aba zəga daryaw məs kəɗɗaŋgəŋ ɓa, ndəni dələv nokum akkpaŋ kiməskiya, hoŋhoŋ də mefɗeke məza ɗəf akan ɓa va pay dəpaŋkəŋka.

²³ Vi kəzlaŋgək tursan gəm kəɗɗaŋgək mambray aka Yawe, kəprəmən ma Yawe ɓa, kədawaŋ addəv mahenziŋ nan ɓa, aka an aɗi gəm aka an aziwgin ɓa ndəni ərayəŋ arəhkum va dəpaŋgənəŋka.

²⁴ Yaŋ Yeremiya anah sit ɗiy pakə gəm sit gil pak na: Məprəm əpel na Yawe ɗiy na Yuda en naka dələv na Eziptə pakə.

²⁵ Aŋki an Yawe Məzuɓappak Maŋgəlva na Israyel apel dawnəh na: Mənokum dit gil nokum kənahaŋgək də mokum yaŋ kəɗɗanən də vokum dawnəh na: Waməknahan an miynan mam naɗɗa, nawzla tursan sət Ma'ãyək na disiŋ, nawpeslta, məɗɗa iynama nokum, məzban əknahan iynama nokum vanəs kana!

²⁶ Vini kana, məprəm əpel na Yawe mənokum ɗiy na Yuda naka dələv na Eziptə pakə, in yakəŋkə, nəswayək də iya naw metiŋgini, Yawe anahə: Ɗəf na Yuda tay nawya iya naw aka dələv na Eziptə bayman dawnəh na: Də iya na Daya Yawe madarani ɓa.

²⁷ In yakəŋ haraw ɗəhərra kawki əray aketi məza moggon ɓa, ɗiy na Yuda dəssoŋ aka dələv na Eziptə pak wagrakaŋ ama masalam, sən mayã hã gap ndəɗaŋ kakahə.

²⁸ Ɗiy siɗikke dədawkõhoŋ səma masalam dədamndoŋ səka dələv na Eziptə aka dələv na Yuda, asna ɗiy en dəppaŋ sə Yuda məs dəɗamaŋ a Eziptə pak wasənnən na, əpel na naway dədaɗɗa di? An nawi, an neti yi.

²⁹ Aŋki zəga dədarban na wanəsil akokum aŋka Yawe anahə, ka kəsənəngən na, əpel nawi dədaɗɗa akokum də əki əraya.

³⁰ Vaŋ Yawe anahə: In yakəŋ əppan Farawən Hofra məlĩ na Eziptə avet məzuzelɗe gəm ammba vet ɗiy en məzukayanən zeŋgileni va nəpsən Sedekiya məlĩ na Yuda ava Nabukodonozor məlĩ na Babilon məzuzel nan məzukayan zeŋgileni.