Yeremiya 43 - Bible en Guidar

Tay əkanən Yeremiya na gagay a Eziptə

¹ Səza Yeremiya agrak əpel sit ɗiy pakə, əpel na Yawe Maŋgəlva net baymani, əpel məs Yawe Maŋgəlva net aslən sit gərakəŋka,

² yaŋ Azariya wətən Hosaya, Yohanan wətən Kareya gəm ɗiy məɓaygənən kiyit pak anahaŋ sən Yeremiya na, wən kədawa, Yawe Maŋgəlva nam dəslənuk dawnəh na kədaddoŋ a Eziptə kadasso adak ɓa ɓa.

³ Ha'aw Baruk wətən Neriya dədawreɗuk akam vi kapsəməm ammba vet mə Kaldiyeɗi, kawbaymə gəm kawkəm aka balam a Babilon.

⁴ Ndəni Yohanan wətən Kareya, deyeɗe net məzəlpaŋ gəm ɗiy pak dəprəmən ma Yawe nassa a Yuda ɓa.

⁵ Yaŋ Yohanan wətən Kareya, deyeɗe net məzəlpaŋgə, ɗiy en dəppaŋ sə Yuda məs dəzzoŋ sə weleŋgit ɗiy-ɗarə, dəzzoŋ sə təki məs atərayaŋ adak vi kasso aka dələv na Yuda:

⁶ Zeli, gili, kirni, kirtin məlĩ muguluŋgiti, ɗiy baymet məs Nebuzaradan, daya net məzugaŋ apəl sən Gedaliya wətən Ahikam wətən Safan. Akanənək məskəleŋ Yeremiya gəm Baruk wətən Neriya.

⁷ Addoŋguk aka dələv na Eziptə vi dəprəmən ma Yawe ɓa agapaŋ hã a Dafne.

Yeremiya tay əpel aka an dədawgul Eziptə

⁸ Yaŋ əpel na Yawe ade sən Yeremiya a Dafne dawnəh na:

⁹ Agəm gərmeŋge gugriɗe avoko, kəndikgin afuŋ a təki narka mənekeɗe ama hara gəla na Farawən a Dafne keret ɗiy na Yuda.

¹⁰ Kənah sitgin na: An Yawe Məzuɓappak Maŋgəlva na Israyel anah yaŋka: Inyakəŋ əslən gawla naw Nabukodonozor məlĩ na Babilon, wanəɗi mazaŋga na məlĩ nan aket gərmeŋge məs nəndəkiŋki. Wazlzlar gizlirke na məlĩ nan aketi.

¹¹ An adeke, warga dələv na Eziptə, an namta sən əmta, an narma sən ərma, an na masalam sən masalam.

¹² Waɗisit offo sit gəleɗe net meŋgilveɗ na Eziptə, wazle, warme, wakoson dələv na Eziptə va məzutaɗa adawkoson hentere səza lukut nani, ya wagil sədak də zazaya.

¹³ Wabaslet gərmeŋge məmpet a Heliyopolis naka dələv na Eziptə, wazle geleɗe net meŋgilveɗ na Eziptə də offo.