Yeremiya 42 - Bible en Guidar

Ɗiy en dəndəwəɗaŋ tay əŋglaŋ əsəɓ na Yeremiya

¹ Yas deyeɗe net məzəlpaŋ, Yohanan wətən Kareya, Yezaniya wətən Hosaya gəm ɗiy pak muzliya də ɗəf metiŋ pakə azzoŋ

² anah sənən Yeremiya məskəleŋ na: Kamə, aprəm əkkam namə, akkaman Yawe Maŋgəlva nok ammbamə, ammbet ɗiy en dəndəwəɗaŋ pakə, vi siɗikke məpəl səza va məsam gbaŋ naka va horok adawləməŋka.

³ Yawe Maŋgəlva nok dərban səm tive an mədazba gəm zəga an mədaɗɗa.

⁴ Yaŋ məskəleŋ Yeremiya anah sit na: Nəprəməka, wanəkkaman Yawe Maŋgəlva nokum va kəpeleŋgi; asna wanəmndan sukum an Yawe azlan sukum pakə, zəga tay nədawɗaman sukum ɓa.

⁵ Yas net anah sənən Yeremiya na: Kəta Yawe dəsan miziwe nam an də gegesiŋ, an məɗɗa va əpel an Yawe Maŋgəlva nok adawslən suk səm ɓa!

⁶ Dəsan moggoni, dəsan mbərayni, əpel na Yawe Maŋgəlva nam məs məslənuk azan mədaprəma, zəga pak wasan səm moggoni vi waməprəm ma Yawe Maŋgəlva namə.

⁷ Sədərɓaga əvoŋ kəlawə, əpel na Yawe ade sənək Yeremiya.

⁸ Yas aya Yohanan wətən Kareya dit deyeɗe nalpa ammbani gəm ɗiy pakə, muzliya də metiŋgini.

⁹ Anah sit na: An Yawe Maŋgəlva na Israyel məs kəslənwən azan əgapgən əkkam nokum aban nak anah yaŋka:

¹⁰ An kəzbanənək əsso aka dəlvəŋka, asna wanərkukum nəɓzlukum na ɓa; wanəmpukum nəptukum na ɓa. Vi wanəppan gabba əki əray akokum.

¹¹ Kəgeslne'eŋ sən Məlĩ na Babilon ɓa. Kəgeslne'eŋ aban ɓa Yawe aɗiymani, vi in tat də mənokum kawkõhgukum gəm kamõhkum səvani.

¹² Wanəwəl sãhã akokum, wawla sasãhkum gəm wamndogokum hã aka dələv nokum.

¹³ Ya an kənahaŋgək na: məsam na aka dəlvəŋ ɓa, hã gap kəprəmən ma Yawe Maŋgəlva nokum ɓa,

¹⁴ dawnəh na, məŋgəm na ɓa, aka dələv na Eziptə mədaddamə, təki məs məwəl na əgay ɓa gəm məprəm na uffo na mohõ ɓa, may na way adəm na adak ɓa; adaki mədawsam də gəla!

¹⁵ Ya kakaŋ na, məprəm əpel na Yawe ɗiy en dəppaŋ na Yuda, vaŋki Yawe Məzuɓappak, Maŋgəlva na Israyel anahə: An kəziyənək horokum sek kaddo a Eziptə, an kəddoŋguk əsso adaka,

¹⁶ Asna masalam kədawgeslne'eŋ sənəŋ wagapkum aka dələv na Eziptə adaka; may, məzuki əɗɗum akokuməŋ watip ammbokum a Eziptə adaka, adak kədamtaŋgə.

¹⁷ Ɗiy en dəzinən heret kaddoŋ a Eziptə pak wamtaŋ adak ama masalam, mayã awaniɓa gəbaymərma. Ɗəf tay nawkõh may nawndəwəɗ səma əray məs nədawki aket ɓa.

¹⁸ Vi aŋki an Yawe Məzuɓappak Maŋgəlva na Israyel anahə: Va ədagədəv naw gəm makraw turõh turõh azlalbay aket ɗiy na Yerusalem vaski makraw turõh turõh adawzlalbay akokum an kəddoŋguk a Eziptə, wakəkkpaŋgaŋ va zəga na mefɗeke, kawmasi akokum, kawpeli əpel nawraya gəm zəga net wili də iya nokum; ya Kulanən na ɗa təkiyəŋ ɓa.

¹⁹ Yawe apelik aka wən nokum mənokum məs dəppaŋ na Yuda, kədaddoŋ a Eziptə ɓa, məsən lewlew na, miziwe nawgay də mənokum nənan dəpaŋka.

²⁰ Ha'aw! Hara ɗəf kədawtipeŋgi, vi kəslənwənək aza Yawe Maŋgəlva nokum dawnəh na: Akkaman Yawe Maŋgəlva nam ammbamə, ya va Yawe Maŋgəlva nam anah pakə, anah səmə waməɗɗa vaska.

²¹ Dəpas vani nənah sukum, ya kəprəmnən ma Yawe Maŋgəlva nokum aka an aslənu azokum pak ɓa.

²² Ya kakaŋ na, məsən na wakəmtaŋ ama masalam, mayã gəm gəbaymərma a təki məs kəŋglaŋ naddasso adaka.