Yeremiya 41 - Bible en Guidar

¹ Aka təla mabuhulon na, Yismayel, wətən Netaniya, wətən Elisama, nan mazlalwã məlĩ yi, adek dit ɗiy gugriɗ na məlyã gəm ɗiy kəlaw ammban aza Gedaliya, wətən Ahikam a Mispa. Azəmaŋgək way adak matak a Mispa.

² Ndəni Yismayel, wətən Netaniya, gəm ɗiy kəlaw məs dəssoŋ dəndən abayən Gedaliya wətən Ahikam, wətən Safan də masalam. Vaski abayənən ndən məs məlĩ na Babilon aɗi daya na dəlva.

³ Yismayel abeyik mə Yudeɗ dəssoŋ dəndə Gedaliya a Mispa pakə gəm məzəlpaŋ net mə Kaldiyeɗ dəssoŋ adaka.

Yismayel abeyik melekeɗ məddoŋ a matuya kaklaw dədopoɗo

⁴ Aka əvoŋ sula dərɓaga məbay Gedaliya, ɗəf tay dəɓəl əsənən ɓa.

⁵ Yas ɗiy kaklaw dədopoɗo azzoŋ sə Sikem, sə Silo gəm sə Samari, eŋgemet məfeɗti, lukutɗe net məŋgereti gəm zit məntarani, əvəla gəm tursan avet nawki addəv gəla na Yawe.

⁶ Yismayel wətən Netaniya vit sə Mispa əddan ələm sit də əhəma. Yas anah sit na: Məde ana Gedaliya wətən Ahikam da.

⁷ Səza agapaŋ addak walaŋgəla-metiŋgini, yas Yismayel wətən Netaniya dit ɗiy nammban atawən wəleti, azgetin addəv vovu.

⁸ Ɗiy kəlaw səmmbet anahaŋgək sən Yismayel na: Kəbayəm ɓa, vi zəga nawzəm nam tay məɗaman awra, haykəmari, haykəmari dadabya, mẽlẽ gəm amama. Yas dəbey sap dit milmiŋgiɗit ɓa.

⁹ Vov məs Yismayel azget ɗiy mimtit məs abay adakəŋka, na Gedaliya yi, məlĩ Asa dəɗɗa aka batam Ba'esa məlĩ na Israyel, anani Yismayel wətən Netaniya aknah dit ɗiy məbeyti.

¹⁰ Yismayel akek madembirgit ɗiy en dəssoŋ a Mispa pakə, kirtin məlĩ muguluŋgiti gəm ɗiy en dəppaŋ a Mispa pakə, məs Nebuzaradan daya net məzugaŋ apəl ammba va Gedaliya wətən Ahikam, yas Yismayel wətən Netaniya ake aka balamə, ambat anet mə Ammonɗe da.

Məppeti məfərsəneɗ na Yismayel

¹¹ Yohanan wətən Kareya gəm deyeɗe net məzəlpaŋ məs dəssoŋ dəndən pak aprəmənək mambray məs Yismayel wətən Netaniya agəɗə.

¹² Andenin ɗiy pak addoŋ əgay də Yismayel wətən Netaniya, arəhən go'o dit iŋkile məs suzliya na Gabawən.

¹³ Səza ɗiy məs də Yismayel awlanən Yohanan wətən Kareya gəm deyeɗe net məzəlpaŋ dəndəni, yas annekenən ziti.

¹⁴ Yas ɗiy məs Yismayel arəm sə Mispa nek pak ambataŋ aza Yohanan wətən Kareya.

¹⁵ Yismayel wətən Netaniya akõhuk səba Yohanan dit ɗiy dədopoɗo, ambat anet mə Ammonɗe da.

¹⁶ Yas Yohanan wətən Kareya gəm deyeɗe net məzəlpaŋ nazan pak agimin madembirgit ɗiy en akiyaŋ sə Mispa səza Yismayel wətən Netaniya abay Gedaliya wətən Ahikam, gambereɗi, məzəlpaŋgə, gili, kirni gəm mətawaŋkoyom məs amilgit sə Gabawən.

¹⁷ Addoŋ əziweŋ a Kimham go'o də Bet-Lehem, vi kadda a Eziptə,

¹⁸ ɓa' səzet mə Kaldiyeɗi məs adawgeslne'eŋ sitini, vi Yismayel wətən Netaniya abay Gedaliya wətən Ahikam məs məlĩ na Babilon aɗi daya aka dəlva.