Yeremiya 40 - Bible en Guidar

Yeremiya tay əsan də gəla a Mispa

¹ Əpel məs dəde sən Yeremiya səza Yawe səza Nebuzaradan daya net məzugaŋ appan əmbat sə Rama. Aka agəm na, tay məɓrukən dit ngiyamɗe a weleŋgit ɗiy na Yerusalem dit en na Yuda, aka adaŋglaŋ əkenin aka balam a Babilon.

² Yaŋ daya net məzugaŋ agəm Yeremiya aɓsən na: Yawe Maŋgəlva noki dəɗi wən nan lahəŋ nawki tatwãh aka təkiyəŋka.

³ Yawe akiyəka, aɗɗak va apeli vi kəɗɗaŋgək mambray aka Yawe, kəprəmnən man ɓa. Vini zəgaŋ agəɗ akokum.

⁴ Kakaŋ in tat əpəl ngiyamɗe səka vok dəpaŋka. An lewi azok əddok də in a Babilon na, ade, wanəzgə sləma okoko. Ya an kulak mbərayni əddok də in a Babilon na asoko. Awla va dələv asan abok pak, an dəsan suk moggoni gəm an təs a ma horok nadda adaka doko.

⁵ Adan dəzlan ɓa, aɓsən na amndok aza Gedaliya wətən Ahikam wətən Safan məs məlĩ na Babilon aɗi daya aket walaŋgəleɗe gugriɗ na Yuda, asok dəndən aret ɗiyi, an vaski ɓa, də təki an təs a mahorok nadda pak doko, yaŋ daya net məzugaŋ apsən zəga nawzəma gəm zəga na mapalay, appan əmbata.

⁶ Yeremiya amil aza Gedaliya wətən Ahikam a Mispa, asan dəndən a weleŋgit ɗiy məs dəppaŋ aka dəlva.

Mə Yudeɗ akkalaŋgək aza Gedaliya

⁷ Deyeɗe net məzəlpaŋ nawra ndəɗaŋ dit ɗiy net pak aprəmənək na məlĩ na Babilon aɗiyək Gedaliya wətən Ahikam daya nadawgən dəlva; apsinik zeli, gil dit kirin gəm səret məssehẽŋɗe naka dəlva, en məketi aka balam a Babilon ɓa.

⁸ Yaŋ Yismayel wətən Netaniya, Yohanan, Yonatan wətən Kareya, Seraya wətən Tanhume gəm kirtin Ofay ɗəf na Netofa, Yezaniya wətən mə Ma'akat, azzoŋ aza Gedaliya a Mispa, ndəɗaŋ dit ɗiy neti.

⁹ Gedaliya, wət Ahikam, wət Safan, asway sitike gəm sit ɗiy net dawnəh na: kədawgeslne'eŋ daɗɗa wəza sit mə Kaldiyeɗ ɓa; məssoŋ aka dəlvəŋka, məgəɗ wəza sən məlĩ na Babilon; wasan moggon azokum.

¹⁰ Naw nəsawək a Mispa, kawziw agəlokum abet mə Kaldiyeɗ məs dədazzoŋ azokum. Nokum məkkalan mbazla, zəgeɗ na mawala gəm mẽlẽ, məzi a mesteɓeɗ nokum, məssoŋ a walaŋgəleɗe gugriɗ nokum məs kəssoŋ addivti.

¹¹ Əmpa na, mə Yudeɗ məs dənzoŋ əɗam anet mə Mo'abɗe da pakə, awaniɓa anet mə Ammonɗe da, awaniɓa a Edom dit en naket dəlveŋge pak aprəmənək na məlĩ na Babilon appetik madambirgit ɗiy na Yuda, aɗi Gedaliya wətən Ahikam wətən Safan aketi.

¹² Yas mə Yudeɗ azzoŋ sə təki pakə, sə təki məs məɓɓehit adaka, azzoŋ aka dələv na Yuda aza Gedaliya a Mispa, azzoŋ ərəhaŋ megezlembirkeɗ dit wəleŋɗe meɓɓet təmək-təməkə aɓuhtini, zəga na mawala kpew diyɗa.

Əbay na Gedaliya

¹³ Yas Yohanan wətən Kareya dit deyeɗe net məzəlpaŋ məs dəssoŋ awra azzoŋ aza Gedaliya a Mispa.

¹⁴ Anah sənənən na: Kəsənək na Ba'ali, məlĩ net mə Ammonɗe aslənək Yismayel wətən Netaniya kawbayuk sa? Ya Gedaliya wətən Ahikam dəŋgəm ətaf wən nan ɓa.

¹⁵ Yaŋ Yohanan wətən Kareya anah sən Gedaliya mahaɗama a Mispa dawnəh na: Kamə nəmbat nəbaygən Yismayel wətən Netaniya ɗəf tay nawsənən ɓa. Vimi adabayuk ka mə Yudeɗ məs dəkkalaŋ azzok dətraygən gəm madambirgit ɗiy na Yuda dəzaŋgən di?

¹⁶ Yas Gedaliya wətən Ahikam anah sən Yohanan wətən Kareya na: Kəɗɗa zəgas ɓa, wən kədawa aka Yismayel.