Yeremiya 4 - Bible en Guidar

¹ Israyel, an is tat əmilyok na, azaw kədawmilyeko Yawe aɗiymani. An kəzargitik zəgeɗ daryawɗe nok səma harawa, an kəsok slorslor ɓa,

² an kəswayək na, Yawe madarani addəv gegesiŋ, addəv ətawwəna gəm addəv təstəsə, asna ɗiy-ɗar pak warahaŋ əzaɓ də iya nani gəm wakaɓaŋ addəvən.

³ Aŋki an Yawe anah sit ɗiy na Yuda gəm na Yerusalem: Məboh guli meleketeni, kədazlgaŋ addivit degirgeɗ ɓa.

⁴ Məssoŋ məskəlkum awra vi Yawe. Məzargən gayã na mokrokum, ɗiy na Yuda dit en na Yerusalem. Vi ədagədəv naw adawgilyen va offo nzilimnzilimi, məza ɗəf namtan tay ɓa, sən zəga naɗɗa nokum na daraw.

Vaŋvel nawɓuhma a Yuda

⁵ Məpel wən nan a Yuda, məprəman a Yerusalem, mənah na: Məffon gozloro aka dəlva, məŋgəl vaŋvəl dayadaya. Mənah na, məkkalə, məlgən a walaŋgəleɗe gugriɗ na korgu,

⁶ mətəl gabaga narban dələv dəka Siyon, mənzoŋ məɗamə, kədawziweŋ ɓa. Vi in tat əki tatwãh sə kəla disiŋ əza metiŋgini.

⁷ Ɓoolu agilik səddivit geslembeɗi, məzet ɗiy tay aka tive, agilik səgəlani vi kawzan dələv noko. Kaɓzluti walaŋgəleɗe noko, ɗiy assoŋ na addəvit ɓa.

⁸ Vi askəska, məgul lukut na gəlabaya, məhəmə, mənɗəsə, vi offo nawdagədəv na Yawe dəffet səkam ɓa.

⁹ Pay dəpaska, Yawe aɗiymani, makra məlĩ gəm net deyeɗe wamtə; məsdəlveŋge wassoŋ londoru, məskəleŋɗe gərəŋgə.

¹⁰ Yas nəmnah: A', Yawe Maŋgəlva, əmakemeket ɗiyiŋki, gəm Yerusalem də wənah na, zazay wasan sukum, tak ma masalam tay ama wəlamə!

Ɗiy muguloŋ təki tahəŋ ərɗiyaŋ səkəlaŋga pakə

¹¹ Pay nan dəpaska kawnah siti ɗiyiŋki gəm sən Yerusalem na: səmyã kakãh tay aka tive a kapta-muyã əzzan aket ɗiy nawa, məza vi kawseŋgerit ɓa məza vi katu'eti ɓa.

¹² Səmyã məknahən dit zəgeɗis dəsil sədak əzzan dəzawa. Kakaŋ na, naw tamə wanətawwən aketi.

¹³ Awla yaŋ tay əzzan va slaybuwna. Mawteɗ na pələs nan tahəŋ va barkataŋ, pilseŋge nan tahəŋ də kakara dayki gazla. Əray akamə, mərayka.

¹⁴ Askoɓ mbərayən sə mokroko, Yerusalem, vi kəkõhgəni. Hã gap dehey kədappan əɗɗum nok mbəraynəŋ di?

¹⁵ Əpel tay əzzan hã sə Dan, əprəman wən na mbərayən hã səka mossorgo metiŋ na Efrayim.

¹⁶ Mənah sit ɗiyi, məssak sən Yerusalem na: ɗiy nawguloŋ təki tay əzzoŋ səka dələv faraɗa, tahəŋ əŋzlaŋ vaŋvəl na wəgay aket walaŋgəleɗe gugriɗ na Yuda.

¹⁷ Va məgaɗe na gulyo tahəŋ kiyən karkarə. Vi məɓoŋni akawa Yawe aɗiymani.

¹⁸ Wədaw noko gəm wəza nok dəkinən zəgas pak akoko, əray dəde akoko gesiŋ is tat əttəman tatwãha, gesiŋ tay ətoŋ suk təɗək hã a mokroko.

Yeremiya gbəgba' firik sən əza an adawla əzzani

¹⁹ Gədəvwa, gədəvwa! In tat ɓalwãy-ɓalwãy sən əssa, makraw tay baɗbaɗ va dəɓohu. Makraw tay birbiri! Nəɓap na əɓətaw ɓa: Vi nəprəmək gozloro uffo gəm vaŋvəl na wəgaya.

²⁰ Tay ənahaŋ na əza aka əza, vi dələv pak azəka. Gurzik ləŋ mipiwwet gizlirkeɗe nawa, hara ɗəf pilim taka ləŋ mipiwwet məzlaraɗe naddəvit gizlirkeɗe nawa.

²¹ Hã gap dehe nədappan ula gabaga narban dələv gəm nədaprəm gozloro na əgay uffo di?

²² Ɗiy naw kiyit tay ɓa, dəsənwən ɓa. Kirin məs aɗɗumoŋ kpum ɓaŋgə, əsən tay aket ɓa. Maɗulet na naɗɗa zəga mbərayni; naɗɗa moggon na, dəsənnən ɓa.

²³ Nulak dəlvafuŋ tay foŋlorro mekeleŋ, disiŋ, əkeɗeɗe nan tay ɓa.

²⁴ Nulek mossorgoɗe gugriɗe aɓlaŋka, mossorgoɗe tahəŋ geŋgeɗgeŋgeɗi.

²⁵ Nula na: ɗəf tay təttaka ɓa, biŋgeɗ na disiŋ pak anzoŋko.

²⁶ Nula dələv məs dəsan va guli net wəleŋɗe nak na, kapta-muyã yi, walaŋgəleɗe gugriɗ nan pak abzlaŋka. Sən wən na Yawe, sən offo na ədagədəv nani.

²⁷ Vi vaŋki Yawe anahə: Dələv dəwən nan pak wakkpaŋ va kapta ya nəzan na kakãh ɓa.

²⁸ Vini dələv asan addəv əhəm na gəlabaya, guzli agəɗək a disiŋ. Vi nəpelke, nəɗɗumko, nəddəɗan na maw ɓa, nəmndaw na akan ɓa.

Siyon abet məbayaŋ ɗiyi

²⁹ Sən ɓaɓəlmet mawteŋɗe net pəlsəŋge gəm ɓaɓəlmet məhõnən bəle! Ɗiy na walaŋgəla-metiŋ pak anzoŋko. Ɗiy ətoŋgoŋ addivit geslembeɗi, əpeŋgeŋ aggərma. Walaŋgəla-metiŋ seŋseŋ, ɗəf tay dəpəl təttaka addəvən ɓa.

³⁰ Ya is məzoko, mi kədaɗɗa də ugul lukut pepreŋge, may əbay gawla də zəga na meleŋge, may əveren horok də ənɗerin di? Ɗari kədakkpaŋgan zuk lewi. Greŋgiɗuk tay əzelkuni, met aka əmta nok kpakə.

³¹ In tat əprəm wəlat ɗak va məɓay uwa, va vaŋvəl nat guluk məwə na məlviya nata. Wəlat waŋ adawyaŋ Siyongi tədampəs hoŋkor hoŋkoru də ətəl vat sulagəni: Əray akawa, in tat əmta abet məbayaŋ ɗiyi!