Yeremiya 39 - Bible en Guidar

¹ Aka wəzva mavaytakan na Sedekiya məlĩ na Yuda aka məlyã, də təla məkəlawani, Nabukodonozor məlĩ na Babilon adek dit məzəlpaŋ nan pak a Yerusalem, asərŋgəsləni.

² Aka wəzva makəlaw kiyən taka na Sedekiya. Də wəvoŋ vaytak na təla mopoɗoni, məɓliwi zlava na walaŋgəla-metiŋ nak səzani.

³ Ndəni deyeɗe na məlĩ na Babilon atoŋgoŋ addəv walaŋgəla-metiŋgini, aziweŋ ama tive naddak təkiya. Ndəɗaŋgə Nergal-Sareser daya net deyeɗe nalpa, Samgar-Nebo, Sarsekim, daya net mətawaŋkoyom, daya net məsənaŋ wən net ngərzleɗi gəm madambirgit deyeɗe na məlĩ na Babilon.

⁴ Səza Sedekiya məlĩ na Yuda dit məzəlpaŋ nan awlenni, anzoŋko, agilyoŋ də dəfəɗ sə walaŋgəla-metiŋ dəka tive na guli net wəleŋɗe na məlyã, də mative na walaŋgit zlavaɗe sula. Agilyoŋ dəka tive na Araba.

⁵ Yaŋ məzəlpaŋ net mə Kaldiyeɗ azbetini, arufnən Sedekiya a təki məpəlayya na Yeriko; armanəni akanən aza Nabukodonozor məlĩ na Babilon a Ribla, aka dəlev na Hamat, yaŋ atawwən akani.

⁶ Məlĩ na Babilon atawək wəlet kirtin Sedekiya ama haran a Ribla. Atawək wəlet ɗiy gugriɗ na Yuda pakə.

⁷ Yaŋ aɓəh hara Sedekiya, aynan dit ngiyamɗe sula na təbəz pepreŋge, vi kawkan a Babilon.

⁸ Mə Kaldiyeɗ aɗi sənənək offo sən gəla na məlyã gəm sit gəleɗe net ɗiyi; yas aɓzluwən zlava naka walaŋgəla na Yerusalem.

⁹ Ya madambirgit ɗiy dəssoŋ a walaŋgəla-metiŋ gəm ɗiy en dəmbataŋ ammba təl məlĩ na Babilon, Nebuzaradan daya net məzugaŋ akek a Babilon.

¹⁰ Ya, səret ɗiy məddekti, məs zəga net tay ɓa, Nebuzaradan daya net məzugaŋ appetik aka dələv na Yuda yaŋ apsit guli net megezlembirkeɗi gəm gulyeŋge.

Məppani Yeremiya na kiyən

¹¹ Yas Nabukodonozor məlĩ na Babilon aɗi wən nan ava Nebuzaradan daya net məzugaŋ aka wən na Yeremiya dawnəh na:

¹² Agəma, horok dəsan akani, kədawgəɗ sən zəga mbərayən ɓa, dərəŋ na, va adawpel suko, agəɗ sən vaska!

¹³ Yaŋ daya net məzugaŋ Nebuzaradan aslən Nebusazban daya net mətawaŋkoyom gəm Nergal-Sareser daya net məsənaŋ wən net ngərzleɗi gəm ɗiy gugriɗ na Babilon pakə;

¹⁴ aslənaŋ əgəm Yeremiya sə daŋgla nawga, apsən sən Gedaliya wətən Ahikam wətən Safan kawkan ananda, asanək də gəla aret ɗiyi.

Əpel sən Ebed Melek

¹⁵ Aka Yeremiya asan mərman a daŋgla nawga, əpel na Yawe ade sənək dawnəh na:

¹⁶ Doko, kənah səngən Ebed Melek mə Etiyopi dawnəh na: An Yawe Məzuɓappak Maŋgəlva na Israyel anah yaŋka: Wanəki an nəpel aka walaŋgəlaŋka. Tatwãh nədawkiya, zazay yi ɓa, pay nan na wagəɗ koroko.

¹⁷ Pay nani wanəkõhguko Yawe aɗiymani, kappoki avet ɗiy məs kədawgeslne sit ɓa.

¹⁸ Vi əkõh nədawkohguko, kəmtə na ama masalam ɓa, zəga nawrəh nama əgay nok na zeŋgiloki yi, vi kəppanək zuk suwa Yawe aɗiymani.