Yeremiya 38 - Bible en Guidar

Tay əzganən Yeremiya addəv vovu

¹ Sefatiya wətən Matan, Gedaliya wətən Pasehur, Yukal wətən Selemiya gəm Pasehur wətən Malkiya aprəmənək əpel məs Yeremiya adawpel sit ɗiy pak dawnəh na:

² Vaŋ Yawe anahə: Ɗəf dəpəl addəv walaŋgəla-metiŋgiŋka, wamtə ama masalam, sən mayã awaniɓa sən gəbaymərma. Ya ɗəf an dəgil dəmbat ezet mə Kaldiyeɗi, wasan madarani.

³ Vaŋ Yawe anahə: «Kapsiti walaŋgəla-metiŋgiŋ ammba vet məzəlpaŋ na məlĩ na Babilon, wamõhõ.»

⁴ Yas deyeɗe anahaŋ sənən məlĩ na: «Ɗəɗah əbay ɗəfəŋka, tay əddakan mekret ɗiy nalpa məs dəssoŋ a walaŋgəla-metiŋgiŋka gəm ɗiy pak də zev əpeləŋka. Vi ɗəfəŋ əray adawkayan sit ɗiy ɓana zəzayi ɓa.»

⁵ Yaŋ Məlĩ Sedekiya anah na: yaŋ avokum, zəga tay məlĩ adawgəɗ sukum ɓa.

⁶ Ndəɗaŋ gəm əgəmnən Yeremiya azganən addəv vov na Malkiya wətən məlĩ a daŋgla nawga. Dit helegeɗ aprikginən Yeremiya vani, iŋkile tahəŋ addəv vov van ɓa, ndərɓayi. Ndəni Yeremiya ambat tif addəv ndərɓa vani.

⁷ Yaŋ Ebed Melek mə Etiyopi, mətawkoyom tay a daŋgla na məlĩ aprəm na azganənək Yeremiya a vovu, aka məlĩ tay ɗewwe a maddamba na Benyamin.

⁸ Ebed Melek vit səŋgil ana məlĩ da, ambat əpel sən məlĩ dawnəh na:

⁹ Daya naw məlyã, an ɗiyiŋ aɗɗaŋ sənən məskəleŋ Yeremiyaŋ pak mbərayni. Azganənək a vovu, wamtə addəvən sən mayã vi peŋ tay a walaŋgəla-metiŋ əmpa ɓa.

¹⁰ Yas məlĩ aɗi wən nan sən Ebed Melek mə Etiyopi dawnəh na: «Andə ɗiy səŋ kaklaw hoku avoko, kəgilgingən məskəleŋ Yeremiya səddəv vov tak adamta.»

¹¹ Ebed Melek hãs ɗiy avani, ndən toŋ ana məlĩ da addəv təki nawzaɓa. Andə kesekeseɗi gəm lukuɗɗe məzveti, atil sən Yeremiya addəv vov dit helegeɗi.

¹² Yaŋ Ebed Melek mə Etiyopi nak anah sən Yeremiya na: «Aslik kesekeseɗ dit lukuɗɗe məzvetis ammba helege a perslekoko.» Yeremiya aɗɗak vaska.

¹³ Yas agdəhnən Yeremiya dit helegeɗi, agilginən səddəv vovu. Yeremiya asan a daŋgla nawga.

Məlĩ Sedekiya ayak Yeremiya əmpa

¹⁴ Məlĩ Sedekiya slən əki məskəleŋ Yeremiya azan a maddamba mohokon na gəla na Yawe. Yaŋ məlĩ aɓsən sən Yeremiya na: Nəssohõk wən taka, kədawɗaman su zəga taka dayday ɓa.

¹⁵ Yaŋ Yeremiya azlan sən Sedekiya na: «An nənah sukuk na əbay kədabayu ɓa sa? Ya an nəsəɓ sukuko, kəprəm su na ɓa.»

¹⁶ Yaŋ məlĩ Sedekiya asway sən Yeremiya mahaɗama dawnəh na: Yawe məs dəzəməɗməŋ madarani yi. Nəbayuk na ɓa, nəppok na ammba vet ɗiy məkayanən zeŋgilekuŋ ɓa.

¹⁷ Yeremiya aɓsən sən Sedekiya na: «An Yawe Maŋgəlva Məzuɓappakə, Maŋgəlva na Israyel anah yaŋka: An əgil kəgil kəmbat azet deyeɗe na məlĩ na Babilon na, asna wakəsok modoroko, kawzlani walaŋgəla-metiŋginiŋ də offo ɓa, wakəsok modorok də gəla noko.

¹⁸ Ya an kəgil kawsap azet deyeɗe na məlĩ na Babilon ɓa na, asna walaŋgəla-metiŋginəŋ wabət avet mə Kaldiyeɗi, wazlanən də offo. Nok van kəkõh na səvet ɓa.»

¹⁹ Yaŋ məlĩ Sedekiya aɓsən Yeremiya na: naw intat əgeslne' sit mə Yudeɗ məs dəddoŋ anet mə kaldiyeɗ da. Vi adapsuwən avet dəzəmguwəngən sahã ɓa.

²⁰ Yeremiya amna, appokun na avet ɓa, aprəm əpel na Yawe məs nədawnah suk ɗa. Wasan suk moggoni, wakəsok modoroko.

²¹ Ya an kəɓoŋguk dawgulyoko, əpel an Yawe arbə su yaŋka:

²² Gil dəppaŋ ana məlĩ na Yuda da pak kawketi sit deyeɗe na məlĩ na Babilon. Gil vet wayaŋ gəlya məmya'ən dawnəhaŋ na: «Beyneŋguɗuk ambəɗokunko, arəhənək gobboko. Təluk agəkək ara ndərɓa, ndəɗaŋ səmmbok vərzləhə.»

²³ Kawketi gil nok beymet dit kirtuk sit mə kaldiyeɗi. Is zəknok pak kəkõh na səvet ɓa. Məlĩ na Babilon warmuko. Walaŋgəla-metiŋginəŋ kawzlani də offo.

²⁴ Yaŋ Sedekiya anah sən Yeremiya na, ɗəf təttaka adawsən wənəŋ ɓa, vas ɓa na kəmtəka.

²⁵ An deyeɗe aprəmənək na nəpelik də isi, wazzoŋ azok ənah suk na, kamə amndan səm an kəpel də məlyã kədawɗaman sem ɓa, məbayuk na ɓa, miy məlĩ apel suk di?

²⁶ Kəzlan sitgən na, əkkam naw nəkə aba məlyã, vi adamdagaw addəv gəla na Yonatan kamta adak ɓa.

²⁷ Yaŋ deyeɗe pak azzoŋ aza Yeremiya, assohõnən mani, yaŋ aboton sit va məlĩ aɗi sən wən nani. Ndəɗaŋ ɓata' zar səzani, vi wən van dəppas ɓa.

²⁸ Yeremiya asanək a daŋgla nawga hã gap pay məgəm Yerusalem. An dəgəɗ pay məgəm Yerusalem: