Yeremiya 37 - Bible en Guidar

Məlĩ Sedekiya tay əŋgla əkkam na Yeremiya

¹ Məlĩ Nabukodonozor məlĩ na Babilon aɗi Sedekiya wətən Yosiyas ka məlĩ aka dələv na Yuda a gəla Koniya wətən Yoyakim.

² Ya ndəni, gewleɗ nani, ɗiy naka dəlva, dəprəmən əpel na Yawe məs apel də ma Yeremiyaŋ ɓa.

³ Ndeni məlĩ Sedekiya aslən Yukal wətən Selemiya gəm Sefaniya wətən məsdələv Maseya aza məskəleŋ Yeremiya dawnəh na: Əŋga akkaman Yawe Maŋgəlva nam ambam ɗa.

⁴ Dəpas na Yeremiya tay əbbal kiyən foŋgo a weleŋgit ɗiyi, Mərmani a fərsəna tagay ɓa.

⁵ Yaŋ məzəlpaŋ na Farawən agilyoŋ sə Eziptə. Mə kaldiyeɗ dəsərŋgəslnən Yerusalem aprəmnən wən neti. Yaŋ azaraŋ faraɗa sə Yerusalem.

⁶ Yaŋ əpel na Yawe ade sən məskəleŋ Yeremiya dawnəh na:

⁷ Vaŋ Yawe Maŋgəlva na Israyel anahə: «An kədawnəhaŋ sən məlĩ na Yuda məs dəslənkum azaw nassohõw yaŋka: “vanday net məzəlpaŋ na Farawən məs dəgil əbbah sukum tay əmndan aka dələv ananda a Eziptə.”»

⁸ Mə Kaldiyeɗ wazzoŋ əwak sən walaŋgəlaŋka, wagayaŋ dəndəni, wamohuni, wazlanən də offo.

⁹ An Yawe anah yaŋka: Kədawmbəɗanən zukum dawnəh na: Mə kaldiyeɗ ambataŋgək ɓa' səzamə ɓa, dəmbataŋ ɓa!

¹⁰ Kəta məbay vanday net məzəlpaŋ net mə Kaldiyeɗ məzugayaŋ də mənokum gərak zlaŋ, an ɗiy tahəŋ səret dəmbraŋ dit vaŋviɗe diyɗa azet ɗufɗuf a gizlirke neti, wasulyoŋgu, wazlanən walaŋgəla-metiŋgiŋ də offo.

Məgulni Yeremiya a fərsəna

¹¹ Aka məzəlpaŋ net mə Kaldiyeɗ addoŋ faraɗa səza Yerusalem səbet məzəlpaŋ na Farawən,

¹² Yeremiya agilik sə Yerusalem kawmbat aka dələv na Benyamin vi kawsap uɗak təki nawzəmgəla a weleŋgit ɗiy adaka.

¹³ Əgap nan a maddamba na Benyamin ləŋgə, daya net məgaɗe yaŋka, iya nan na Yiriya wətən Selemiya, wət Hananiya. Armak məskəleŋ Yeremiya dawnəh na: «Azet mə kaldiyeɗ kədawgoh zuk əmbata.»

¹⁴ Yaŋ Yeremiya amna: uwawəni; kiyu nədawgoh azet mə kaldiyeɗ ɓa. Ya dəprəm wən nan ɓa. Yiriya armak Yeremiya, akiyək azet deyeɗe.

¹⁵ Gədivit deyeɗe adək aka Yeremiya, arganənka, azganən addəv gəla na fərsəna, gəla na Yonatan məzuvere, vi anan məkkpaŋgan ka gəla na fərsəna.

¹⁶ Məzgani Yeremiya addəv vov naddəv gəla vani. Yeremiya asanək adak əvoŋɗe diyɗa.

¹⁷ Yas məlĩ Sedekiya aslən əgəmən, məlĩ attokon man mahaɗama eŋgil ananda, amna: «Əpel tay səza Yawe sa?» Yaŋ Yeremiya, amna: Tay; yaŋ amna: kapsukki ava məlĩ na Babilon.

¹⁸ Ndəni Yeremiya anah sən na: Mambray mi nəgəɗ azoko, azet gewleɗ noko gəm azet ɗiyiŋ, hara kəzgawəngən addəv gəla na fərsəna di?

¹⁹ Ya ngahəŋ məskəleŋɗe nokum məs dəɗɗaŋ sukumən kəleŋ dawnəh na: Məlĩ na Babilon ade na akokum ɓa may aka dəlvəŋ ɓaŋ di?

²⁰ Ya kakaŋ na aprəma daya naw məlyã, kəta əkkam naw dəgap a boko. Kəmndagaw addəv gəla na Yonatan məzuver ɓa, nədamta adak ɓa.

²¹ Yaŋ məlĩ Sedekiya aɗi wən nan dəɗinəngən Yeremiya a daŋgla nawga dəpsənəngən peŋ vurŋgbu'o aza wəsɓəta pak hã an peŋ dəgrak sə walaŋgəla baymani.