Yeremiya 36 - Bible en Guidar

Yoyakim tay əzla ɗerewel məktəmən məs Baruk averi

¹ Aka əzva mopoɗo'ən na Yoyakim wətən Yosiyas məlĩ na Yuda aka məlyã, əpel na Yawe vanəŋ ade sənək Yeremiya dawnəh na:

² «Agəm ɗerewel məktəmən, kevergən əpel an nəpel suk aka Israyel, aka Yuda gəm aket ɗiy naket dəlveŋge pak təŋ səza pay nəpel suko, təŋ səza pay na Yosiyas hã gap pay dəpaŋka.

³ Kuzuŋ ɗiy na Yuda waprəmən tatwãh nədaɗɗum nawgəɗ sitiŋ pakə, vi dəmulyoŋgən ɗəf pak səka tive mbərayən nani; asna wanəppan sit heslepe net də mambray neti.» Ka dəmilyoŋgən ɗəf pak səka tive mbərayən nani; asna wanəvvuyon əzlzlaɓ neti gəm mambray neti.

⁴ Yas Yeremiya aya Baruk wətən Neriya, yas Baruk aver əpel na Yawe səma Yeremiya bayman məs apel sən addəv ɗerewel məktəmən naka.

⁵ Yas Yeremiya aɗi wən nan sən Baruk dawnəh na: Mətakwi nəɓap na əmbat addəv gəla na Yawe ɓa.

⁶ Nok na kəlgən addəv gəla na Yawe pay naɗɗa meme, kəŋɗangən əpel na Yawe məs kəver sə maw nak aslmet ɗiy nak səddəv ɗerewel məktəmən addəv gəla na Yawe pay naɗɗa meme; gəm kəŋɗangən aslmet ɗiy na Yuda pak məs dədazzoŋ sə walaŋgəleɗe gugriɗ neti.

⁷ Kuzuŋ əkkam net wagap aba Yawe, wamulyoŋ ɗəf pak səka tive nan mbərayni. Vi ədagədəv metiŋgin dit herɗe məs dərbə gala Yawe apel aka wən net ɗiyiŋki.

⁸ Yaŋ Baruk wətən Neriya aɗɗa va Yeremiya məskəleŋ aɗisən wən nan pak, naŋɗan əpel na Yawe səddəv ɗerewel addəv gəla na Yawe.

⁹ Aka əzva ma sle'en na Yoyakim wətən Yosiyas məlĩ na Yuda, aka təla mavaytakani, mətəli ma naɗɗa meme aba Yawe. Ɗiy na Yerusalem pakə, ɗiy na walaŋgəleɗe gugriɗ na Yuda məzəzzoŋ a Yerusalem pakə.

¹⁰ Addəv gəla na Yawe Baruk aŋɗan əpel na Yeremiya səddəv ɗerewel a sləmet ɗiy pak a giziŋ na Gemariya wətən Safan məzuver metiŋ na meŋgle a maddamba meleketen na gəla na Yawe.

¹¹ Adan Mika wətən Gemariya dəhən Safan aprəm əpel na Yawe səddəv ɗerewel pakə,

¹² ndən prik ana məlĩ da a giziŋ na məzuver na, ɗiy gugriɗ pak yeŋ ɗewɗewi: Elisama məzuvere, Delaya wətən Semaya, Elnatan wətən Akbor, Gemariya wətən Safan gəm Sedekiya wətən Hananiya dit ɗiy gugriɗ pakə.

¹³ Yas Mika aboton sit əpel məs aprəm gala Baruk adaŋɗan səddəv ɗerewel aslmet ɗiy pak naka.

¹⁴ Yaŋ ɗiy gugriɗ nek aslənən Yehudi wətən Netaniya wət Selemiya wət Kusi aza Baruk dawnəh na: Ɗerewel məktəmən məs kəŋɗan aslmet ɗiyiŋka, agəm avoko, doko; yaŋ Baruk wətən Neriya agəm ɗerewel məktəmən nak avani, ade azeti.

¹⁵ Aɓsənən na, asok ɗa, aŋɗan aslmamə. Yas Baruk aŋɗan sit aslmeti.

¹⁶ Səza aprəmən əpel nak pakə, ɗiy pak awlaŋgək aza zit də əkkere. Yaŋ aɓsənən Baruk na: Waməboton əpeləŋ pak sən Məlyã.

¹⁷ Yas attokonən Baruk dawnəh na: «Əŋga abotonsəm ɗa əpel kəveriŋ na, ndən əpelin is əverin sa?»

¹⁸ Yaŋ Baruk aɓsit na: «Ndən də man dəpelsu əpeləŋ pakə, yaŋ naw nədawverin addəv ɗerewel də zəga nawvere.»

¹⁹ Yaŋ ɗiy gugriɗ anah sənən Baruk na, dok aɗamə, isi gəm Yeremiya, ɗəf adawsən gəlokum ɓa!

²⁰ Yas ambataŋ a daŋgla aza məlyã, aɗiynən ɗerewel məktəmən nak a giziŋ na məzuver Elisama da, aboton sənən wənəs pak sən məlyã.

²¹ Yaŋ məlĩ aslən Yehudi əgəm ɗerewel məktəmən naka, yas agəm sə giziŋ na Elisama məzuvere, Yehudi van aŋɗan aslma məlyã gəm aslmet deyeɗe en məs dəziweŋ a maŋgava məlĩ pakə.

²² Məlĩ tay ɗewwe addəv gəla an nassa addəvən pay na səmyã, aka təla mavaytakan də kasli na slay offo mərman abani.

²³ An Yehudi aŋɗanək ədor hoku may poɗo na, məlĩ ətawən dət slõhõŋguk na məzuvere, ndən əzgan aka offo na kasli nak hã ɗerewel məktəmən nak gərak aka offo na kasli naka.

²⁴ Məlyã gəm gewleɗ nan məs dəprəmən əpelis pak dəkkereŋ ɓa, dəŋgeretin lukutɗe net ɓa.

²⁵ Də Elnatan, Delaya gəm Gemariya ampanən tilit aza məlĩ na, adawzla ɗerewel məktəmnəŋ ɓa zlaŋ, dəprəm met ɓa.

²⁶ Yas məlĩ aɗi wən nan sən Yerameyel wətən məlyã, sən Seraya wətən Azriyel gəm sən Selemiya wətən Abdel dərmanəngən Baruk məzuvere gəm məskəleŋ Yeremiya. Yas Yawe aɗemeti.

²⁷ Yas əpel na Yawe ade sən Yeremiya sədərɓaga məlĩ azla ɗerewel məktəmən də əpel məs Baruk aver səma Yeremiya nak dawnəh na:

²⁸ «Amsak agəm ɗerewel məktəmən mbərən, aver əpel maddaabəŋ naddəv ɗerewel məktəmən madaabəŋ məs Yoyakim məlĩ na Yuda azləŋka.

²⁹ Kənahgən aka Yoyakim məlĩ na Yuda, na: An Yawe anah yaŋka: “Nok kəzlak ɗerewel məktəmənəŋ dawnəh na: Vimi kəver addəvən dawnəh na: Məlĩ na Babilon wade, wazan dəlvəŋka, wazet ɗiy dit zəgeɗ memeyẽɗ nakani di?”

³⁰ An Yawe apel aka Yoyakim məlĩ na Yuda yaŋka: Ɗəf nan tay təttaka dədawsan aka mazaŋga na məlĩ Davit ɓa. Kazgani kigəbayuk ara pay kapaya gəm a təki zəzay ɗəfɗa.

³¹ Wanəsilsuko, sən uwa noko gəm sit gewleɗ noko sən heslepe nokum. Əray məs nəpel sukum wən nan kəprəmnən ɓaŋ pak wanəki akokum, aket ɗiy na Yerusalem gəm aket ɗiy na Yuda.»

³² Yeremiya agəm ɗerewel məktəmən maɓɓan gəmə, ndən ta' əpsən Baruk wətən Neriya məzuvere. Yas aver əpel na ma Yeremiya naddəv ɗerewel bayman məs Yoyakim məlĩ na Yuda azlə aka koffo naka, yaŋ antep əpel diyɗa aman zev aska.