Yeremiya 35 - Bible en Guidar

Yeremiya dit mə Rekabɗe

¹ Əpel na Yawe dəde sən Yeremiya aka pay na Yoyakim wətən Yosiyas məlĩ na Yuda dawnəh na:

² Dok anet mə Rekabɗe da, kəpel sitgini, kikiygin addəv gəla na Yawe, addəv taka səret giziŋɗe, kipsitigin mbazla nawsa.

³ Yas Nəya Yazaniya wətən Yeremiya dəhən Habakiya dit milmiŋgiɗin gəm kirtin pakə; mə Rekabɗe beymeti.

⁴ Yas nətoŋgit addəv gəla na Yawe, addəv giziŋ net kirtin Hanan wətən Yigdalya ɗəf na Maŋgəlva məs dəsan a maŋgava giziŋ net ɗiy gugriɗe a disiŋ ki giziŋ na Ma'aseya wətən Sallum məga na maddamba.

⁵ Yas nəɗi mesteɓeɗ məknihit də mbazla gəm hiliŋgiɗ nawsa zəga abet mahəlfaɗe net mə Rekabɗe, yas nəɓsit na: məsa.

⁶ Yas aɓɗaŋ na: mawsa mbazla ɓa, vi Yonadab wətən Rekab afəm aɗi səmək wən nan dawnəh na: Kədawsaŋ mbazla ɓa, mənokum dit kirtukum hã faɗə.

⁷ Kədarkaŋ gəla ɓa, kədazlgaŋ ɓa, kədampaŋ megezlembirke ɓa, kədassoŋ də arya ɓa. Vi addivit gizlirkeɗe kədassoŋ ənziya egge nokum pakə; vi kəssoŋgən əzva kpototo aka dələv məs kəssoŋ adak əga paya.

⁸ Ya məprəmək ma Yonadab wətən Rekab afəm aka an aɗi səm wən nan pak ka mədawsa mbazla ɓa pay nanziya egge nam pakə, mənamə, gil namə, kirtim mezeŋgleket gəm kirtim muguluŋgiti.

⁹ Mərkə gəleɗe nassam addivit ɓa, məgəɗ guli net megezlembirkeɗ ɓa, məzlək ɓa, zeŋve nam tay ɓa.

¹⁰ Adivit gizlirkeɗe məsamə, məprəməka, məɗɗak va afəm Yonadab aɗi səm wən nan pakə.

¹¹ Gala Nabukodonozor məlĩ na Babilon agul dəlva, mənahək na mənzamsəmə, mətoŋsəm a Yerusalem səbet məzəlpaŋ net mə Kaldiyeɗi gəm sebet məzəlpaŋ na Aram, məsamgən də gəla a Yerusalem.

¹² Yas əpel na Yawe ade sən Yeremiya dawnəh na:

¹³ An Yawe Məzuɓappak na disiŋ Maŋgəlva na Israyel anah yaŋka: «Dok ənahsən ɗəf na Yuda gəm ɗiy na Yerusalem na: kərəhaŋ iyak naprəm əpel naw ɓa sa?» Əɗiyma na Yawe.

¹⁴ Mətafni əpel na Yonadab wətən Rekab məs aɗi sit kirtin na: «kədawsaŋ mbazla ɓa, ya dəsaŋ ɓa hã dəpaŋka, aprəmənək an afit aɗi sit wən nani. Ya naw nəyək sam əpel sukum, kəprəmən maw ɓa.

¹⁵ Nəbew dawslən sukum məskəleŋɗe məɗɗaŋ wəza naw pak azokum ɓa, əslinit dawnəh na: Ɗəf pak dəmil səka tive nan mbərayən, dəzaɓan wəza nan moggoni. Adazbet meŋgilveɗ meɓɓet kawgəɗ sit wəza ɓa. An kətafənka wakəssoŋ də gəla aka dələv məs nəpsukum anokum gəm sit efiŋgiɗkum. Ya kəpakən sləmokum ɓa, kəprəmwən ɓa.

¹⁶ Kirtin Yonadab wətən Rekab azbanənək an məs efit aɗi sit wən nani, ya net ɗiyiŋ dəprəmwən ɓa.

¹⁷ Vini kan Daya Maŋgəlva Məzuɓappak, Maŋgəlva na Israyel anah vaŋka. In yakəŋ əki tatwãh aka Yuda, aket ɗiy na Yerusalem pakə, məs nəpel nawgəɗ siti. Vi nəpel sitike ya dəŋgereŋ əprəm ɓa. Nəyeke, ya dəzlanən ɓa.»

¹⁸ Yaŋ Yeremiya anah sit mə Rekabɗe na: Vaŋ Yawe Məzuɓappak Maŋgəlva na Israyel anahə: Adan kəprəmənək an afukum Yonadab aɗi sukum wən nani, kərmanənək an aɗi naɗɗa pak kəɗɗanən va aɗi sukum wən nan pakə,

¹⁹ asna ɗəf səddəv gəla na Yonadab, hã faɗ zəv mə Rekab nawziw abaw akkpap na ɓa. Aski an Yawe Məzuɓappak Maŋgəlva na Israyel anahə.