Yeremiya 32 - Bible en Guidar

Yeremiya tay əlbah gulyo

¹ Əpel an dəde sən Yeremiya səza Yawe aka əzva makəlawan na Sedekiya məlĩ na Yuda, əzvaska, əzva makəlaw kiyən dodopoɗon na Nabukodonozor.

² Məzəlpaŋ na Babilon asərgəslənək Yerusalem, dəpas na məskəleŋ Yeremiya tay mərman a daŋgla an nawga ana məlĩ na Yuda da.

³ Sedekiya məlĩ na Yuda arma adak dawnəh na: Vimi kədaɗɗa kəleŋ də wənəh na: Vaŋki Yawe anahə: Wanəppan walaŋgəla-metiŋginiŋ ammba va məlĩ na Babilon, wazəma di?

⁴ Sedekiya məlĩ na Yuda wakõh səmmba vet mə kaldiyeɗ ɓa, əpsa nədepsən ammba va məlĩ na Babilon. Wapeleŋ met də mani, haran wawla.

⁵ Waka Sedekiya a Babilon, adak adawsan hã gap pay an nədazga sləma akani, Yawe aɗiymani. An kəgayaŋgək dit mə Kaldiyeɗ zlaŋ kəskaŋ na wəla ɓa.

⁶ Yaŋ Yeremiya anah na, əpel an dəde su səza Yawe yaŋka:

⁷ Hanameyel wətən babsawok Sallum yaŋ əzzan azok kawnah suk na: Albah guli naw na Anatot, vi tive tay abok nawbitin kəlbahgəni.

⁸ Wətən babsawãw Hanameyel ade azaw va Yawe anah su aka mərmu ana məlĩ da, yas anah su kan na, albah guli naw məs dəsan aka dələv na Benyamin a Anatot; vi is tat də tive dəsangən ka noko gəm is tat də tive nawbitin kəlbahgəni. Vaski nəsən na as əpel na Yawe yi.

⁹ Yas nəlbah guli dəsan a Anatot səva Hanameyel wətən babsawãw naka, yas nəsla sən təbəz babar akani: təbəz babar kəlaw kiyən buhulu.

¹⁰ Nəverik wən nalbah nan addəv ɗerewel, nəɗi ndama naw akani, nəyək məziwweɗe yaŋ nəsla təbəz babar aka kilo.

¹¹ Yas nəgəm ɗerewel məs məver wən na əlbah addəvən məs nəɗi ndama naw akan va mahenziŋ aɗi wən nani gəm ɗerewel an siɗek va ndən dəsan kollo,

¹² nəpsin Baruk wətən Neriya dəhən Mahseya kara wətən babsawã Hanameyel gəm keret miziweɗe məs dəɗiynən vet aka ɗerewel aka wən nalbah nak keret mə Yudeɗ məs dəssoŋ a meŋgle nawga pakə.

¹³ Yas nəɗi wən nan sən Baruk keret dawnəh na:

¹⁴ An Yawe Məzuɓappak Maŋgəlva na Israyel anah yaŋka: Egim ɗerewelɗeŋki, ɗerewelɗe məs məver wən na əlbah addəvtiŋki, an məɗi ndama akani gəm an dəsan kollo, kəɗigin addəv məsteɓe na dəlva, dəssoŋgə zaɓɓa pay diyɗa addəvni.

¹⁵ Vi Yawe Məzuɓappak Maŋgəlva na Israyel anahək vaŋ əmpa: Abe ahəŋ na, kalbahi gəleɗe, gulyeŋge gəm megezlembirkeɗ aka dəlvəŋka.

Əkkam na Yeremiya

¹⁶ Səza nəpsən ɗerewel məs məver wən nalbah addəvən sən Baruk wətən Neriya, nəkkamanək Yawe dawnəh na:

¹⁷ Aw, Yawe Maŋgəlva, istə kəzəməɗ disiŋ də dəlvafuŋ də əɓap nok metiŋgini gəm də gbogboŋ na voko, zəga tay naɗɗa gərəŋ akan azok ɓa.

¹⁸ Is məzəɗɗa moggon nok hã gap sayit ɗiy gabalə gəm məmndagan heslepe net efiŋgiɗit kirin aket kirtit dərɓegeti, Maŋgəlva metiŋ məs gbogboŋgo, iya nok na Yawe Məzuɓappakə.

¹⁹ Məs kəɗɗum naɗɗa metiŋgini, is tat əknahani. Is tat ula an ɗiy adaɗɗaŋ pakə, ka kamndagan sən ɗəf pak va aza ədaw nani gəm va wəza nani.

²⁰ Kəɗɗek sekeneɗ dit sesergeɗe aka dələv na Eziptə hã gap va dəpaŋka; a Israyel də aweleŋgit ɗiy meɓɓeti, is tat ərban na nawa kənan di va pay dəpaŋkəŋka.

²¹ Kəgilgitik ɗiy nok mə Israyelɗe səka dələv na Eziptə də əɗɗa sekeneɗ dit sesergeɗe də va gbogboŋ nok gəm də vok təlla dəggbo' geslne metigini.

²² Yas kəpsit dəlvəŋ məs kəsway sit efiŋgiɗit napsiti, dələv məs moŋvo də amama adawdawaŋ akan lokloku.

²³ Yas azzoŋ əmõhuni, ya dəprəmən mok ɓa, dədawaŋ aka mahenziŋ nok ɓa, məs kəɗi sit wən nan naɗɗa pak dəɗɗanən ɓa, yas kəki tatwãhəŋ pak aketi.

²⁴ Awle məkkpotoŋ baray na dələv yeŋ əzzoŋ a walaŋgəla-metiŋgin vi kawzəmni; məpsiti walaŋgəla-metiŋ ammba vet mə Kaldiyeɗi, wabət avet məzəlpaŋ dəndən sən masalam, mayã gəm gəbaymərma. An kəpel pak agəɗka, is tat horok sekke.

²⁵ Ya Yawe Maŋgəlva, istə kənah su na: albah guli də təbəz babara, kəyəgən miziweɗe nawziw akani, ya walaŋgəla-metiŋgin nak mipsiti avet mə Kaldiyeɗi.

Yawe tay əzlan sən Yeremiya

²⁶ Əpel na Yawe ade sənək Yeremiya dawnəh na:

²⁷ Awle, intə Yawe Maŋgəlva na zəga an dəsan madaran pakə, zəga tay an naggət akan azaw ɓa.

²⁸ Vi vaŋki Yawe anahə: Inyakəŋ əppan walaŋgəla metingiŋ avet mə Kaldiyeɗi gəm ava Nabukodonozor məlĩ na Babilon, wazəma.

²⁹ Mə Kaldiyeɗ watoŋgoŋ əlpa də walaŋgəla-metiŋginiŋka, waɗisənən offo, wazlətin gəleɗe məggbo'o məs adawzlaŋ tursan aket sən ba'al, aggbo'oŋguk mbazla kawpesl meŋgilveɗ meɓɓet vi kawdan su gədəvwa.

³⁰ Vi mə Yudeɗ dit mə Israyelɗe mambray adaɗɗaŋ a maharaw kaka' təŋ səka gawla neti, vi mə Israyelɗe gədəvu adawdan suwən kaka' də wəza na veti, Yawe aɗiymani.

³¹ Walaŋgəla-metiŋgiski dədan su gədəvu gəm dəsilgin makrawa, təŋ səza pay mərkani hã gap pay dəpaŋka, maw tay aka nulagən ama haraw ɓa,

³² aka mambray an mə Israyelɗe gəm mə Yudeɗ aɗɗaŋ nawdan su gədəvwa, ndəɗaŋ, milyeŋge neti, ɗiy gugriɗ neti, məsdəlveŋge neti, məskəleŋɗe net dit ɗiy na Yuda gəm en na Yerusalem.

³³ Akkpaŋgan suwənək doŋgbolti məza heret ɓa. Nəppan gabba ərbə sit zəga ɓa ya dəprəmən əyak ka kawrəh maɗɗula ɓa.

³⁴ Aɗiyinik zəgeɗ daryawɗe net addəv gəla məs adawyanən iya naw adaka, araygənka.

³⁵ Arkaŋgək gəleɗe-nettuyeŋge sən Ba'al a walaŋ na Ben-Hinnom kawzi mbelit kirtit mezeŋgleket də an net muguluŋgit sən Molek. Zəga məs in nəɗi sit wən nan ɓa; əɗɗum nan dəde ɗah a makraw ka kaɗɗa zəga daryawəs kamzlahgən Yuda əɗɗa mambray ɓa.

³⁶ Ya kakaŋ na vini Yawe Maŋgəlva na Israyel anah aka walaŋgəla metiginiŋ məs kədawnahaŋ na: Əgaya, maya gəm gəbaymərma dəɗɗanən ka dəbətgən ammba va məlĩ na Babilonəŋ vaŋka:

³⁷ In yakəŋ əkkelet səket dəlveŋge məs nətreyet adak pak də ədagədəv nawa gəm dit herɗe nawa, də makraw fuyõfuyõ. Wanəmndeget a təkiyəŋka, wanəɗɗa dəssoŋgən kiyit foŋgo.

³⁸ Wassoŋ ɗiy nawa, naw wanəsaw Maŋgəlva neti.

³⁹ Wanipsit əɗɗum a mekret taka gəm tive taka vi dəgeslne'eŋ suwəngən pay pak ka moggon neti gəm net kirtit dərɓegeti.

⁴⁰ Wanəziwgin wənmiyna dənɗaŋ faɗə, nəmil na səmmbet ɓa vi kawgəɗ sit moggoni, wanəɗi geslne' naw a mekreti vi əzaraŋ faraɗa səzawa.

⁴¹ Wanənnek dənɗaŋ ka kawgəɗ sit moggoni, wanəmpe aka dəlvəŋ gegesiŋ; wanəɗɗa də makraw taka, də maw zək naw pakə.

⁴² Vi vaŋ Yawe anahə: Va nəki tatwãh metiŋginiŋ aket ɗiyiŋki, vaski nədawki moggon məs nədawpel aka wən netiŋ pak aketi.

⁴³ Kalbahi gulyeŋge aka dəlvəŋ məs kədawnahaŋ na, nan məraygəni yi, ɗəf tay akan ɓa, zəga mamayã ɓa, məpsiti avet mə Kaldiyeɗ əŋka.

⁴⁴ Kalbahi gulyeŋge də təbəz babara, kawverni wən nan addəv ɗerewel kaɗi ndama akani, kawyay məziwweɗe, vas adaɗɗa aka dələv na Benyamin, walaŋgəleɗe dəssoŋ tərwəsl ki Yerusalem, walaŋgəleɗe gugriɗ na Yuda, walaŋgəleɗe gugriɗ naka mossorgo metiŋ, walaŋgəleɗe gugriɗ na Bagərma, walaŋgəleɗe gugriɗ na dohoŋ, vi wanəzaɓan wən nokum, Yawe aɗiymani.