Yeremiya 31 - Bible en Guidar

¹ Pay dəpas na, wanəsaw Maŋgəlva net mahəlfaɗe na Israyel pakə, net tamə, wassoŋ ɗiy nawa Yawe aɗiymani.

Əmilye net mə Israyelɗe səka balam

² Vaŋ Yawe anahə: Ɗiy en dəkõhoŋ səma masalam nulak sãsehit a kapta-muyã. Israyel tay ədaw kiyən foŋgo.

³ Sə faraɗa Yawe arban zən azawa; amna, nəŋglukuk va nəŋgluwuk farə, vini nədawŋgəlsuk moggoni.

⁴ Wanəmsak əsilguko, wakəsili Israyel wakəgəm dəgəla nok əmpa wakəgil aret en məzumasaŋgə.

⁵ Wakəmpə megezlembirkeɗ əmpa aket mossorgoɗe gugriɗe na Samari, en dədampaŋ megezlembirkeɗ waɓuhnən uwa neti.

⁶ Vi Pay wade məs məgaɗe adanzlaŋ vaŋvəl aket mossorgo metiŋ na Efrayim: Misil məpeŋgən a Siyon aza Yawe Maŋgəlva namə.

⁷ Vi vaŋ Yawe anahə, məŋgəsl vaŋvəl nannek sən Yakob, mənnek babyak-babyak sən daya naket dəlveŋge, mərban ənnek nokum, məgagdakani, mənah na: Yawe, akõhgit ɗiy noko, madambirgit na Israyel.

⁸ In yakəŋ əkiyit səka dələv na kəla disiŋ wanəkkelet hã səket meŋge na dəlva. Aweleŋti, deŋgerɗe, vədalɗe, gil en də daway dit en məɓayaŋ uwa sapə vanday metiŋgin dədawmilyen aŋka.

⁹ Də əhəm adazzoŋgu, addəv əɓuh met nədawketi. Wanəke emet iŋkile a məlpa dəka tive an sarara, askotoŋ na akan ɓa vi intə afən Israyel Efrayim yi Tizi nawa.

¹⁰ Ɗiyi, məprəm əpel na Yawe, məprəman aket mətuwəraɗe en faraɗa. Mənah na: Ndən məs dətreygit mə Israyelɗe, dədakkelet gəm dədawget va məzutaɗa də gazlaŋ nani.

¹¹ Vi Yawe akõhgənək Yakob, abitik səva gurom məday kiyən.

¹² Wamilyoŋ də əŋzla vaŋvəl sən ənnek aket mossorgoɗe na Siyon; wazzoŋ zletete aka zəga na va Yawe: Haykəmari, mbazla na meketepe, mẽl məɗotun kakaŋka, gilewi gəm wasliɗe. Wassoŋ va guli net wəleŋɗe məpsən iŋkile; azəmaŋ na sãhã əmpa ɓa.

¹³ Asna gorɗeŋge wannekenin zit də əskəla, gewleɗ dit mezzeɗ pak sapə. Wanəkkpaŋgan əhəm net ka ənneke; wanəɓətgiti wanənneken sit zit sə dərɓaga əzəmsahã neti.

¹⁴ Wanəbet məsdəlveŋge də səlhã, ɗiy naw wabaŋ də zəga vawa Yawe aɗiymani.

¹⁵ An Yawe anah yaŋka: Əhəm tay əprəm sə Rama, əhəm naska morkoyo. Rakel tat əhəm ammbet kirtita; təɓoŋguk dawɓətgət aka wən net kirtita vi tahəŋ ɓa.

¹⁶ An Yawe anah yaŋka: Aɓətə, appan əhəma, appey sin səroko, vi wanəfaɗ suk əzəmsãhã noko. Yawe aɗiymani. Kirtuk wamndoŋ səka dəlev net məzuzeltini.

¹⁷ Ərəh nok tay abe kirtuk wamilyoŋ aka dələv neti Yawe aɗiymani.

¹⁸ Əprəm nəprəm Efrayim əɓuh man na: Kəzgasuwəka, nətafək əzga' van va wasli məyagani ənse ɓa. Amndagawa, wanəmndawa vi istə Yawe Maŋgəlva nawa.

¹⁹ Vi səza nəɗɗumon kiwa, nəɗiyək marava. Səza nəsən dərwa zu na, nərgak mettilewa, wil aduwənka, nəsawək addəv ərba wili, vi nəsletik wil na gawla zuwa.

²⁰ Efrayim, wətu an na makrawi sa? Wətu an nəŋgəl dayi hara nəpelgən akan nəɗɗum əɗɗum akan əmpa sa? Vini makraw adaɗɗa birbir vini, ulasãh na, nulak sasãhni. Yawe aɗiymani.

²¹ Ampə zəga narban tive noko aɗi meŋge; aɗi mokrok aka tive kədadawa, amili Israyel, amil addivit walaŋgəleɗe gugriɗ nokəŋki.

²² Dehey kədappan əssok slorslor di goruk mətemta? Vi Yawe azəməɗək zəga meleketen aka dəlvafuŋ: Guluk watəkay ɗəf mizilin.

Wənmiyna meleketeni

²³ An Yawe Məzuɓappak Maŋgəlva na Israyel anah yaŋka: Pay nədawzaɓan əssa neti, wapelin əpeləŋ aka dələv na Yuda gəm addivit walaŋgəleɗe gugriɗ nan əmpa na: Kəta Yawe dəzoɓoko, Təki na təstəsə mossorgo metiŋ na salala.

²⁴ Ɗiy wassoŋ də gəla aka dələv na Yuda gəm addivit walaŋgəleɗe gugriɗ nan pakə, məzənseŋ sap dit məzuteɗeŋɗe məzəzmeŋgi.

²⁵ Vi wanəpsən iŋkile sən ɗəf an dəyə, wanəban ɗəf an dəddak pakə.

²⁶ Aka aska, nəfɗahka, nulak na sin nawəŋ nekiŋ azawa.

²⁷ Pay tay əzzani Yawe aɗiymani, wanəwan zev ɗəf titir gəm zev zəga mamayã aka dələv na Israyel gəm aka dələv na Yuda.

²⁸ Wasan va aka nəzək sləma aka wəptiwti, əbzliwti, əkrepti, əzeti gəm əttepeti, vas nədazga sləma aket karket gəm kampeti Yawe aɗiymani.

²⁹ Aka pay nani, kawnahi əmpa na: efiŋgiɗit kirin ampəraŋgək uwa na megezlembirke məgalən yaŋ abay sleyit kirni ɓa.

³⁰ Dərəŋ na ɗəf pak wamtə vi heslepe nani, ɗəf an dəmpər uwa na megezlembirke məgalən slayən anan adawbaya.

³¹ Pay tay əzzani Yawe aɗiymani, wanəziwgin wənmiyna meleketen dit ɗiy na Israyel gəm dit ɗiy na Yuda.

³² Asan na va wənmiyna nəziwgin dit efiŋgiɗit aka pay nərme aza vet kawgilgit səka dələv na Eziptə ɓa, net araygənənək wənmiyna nawa, də nəsaw daya net zlaŋ Yawe aɗiymani.

³³ Vi aŋki wənmiyna məs nədawziwgin dit ɗiy na Israyel dərɓaga payəska Yawe aɗiymani: Wanəɗi mahenziŋ addivti, wanəver a mekreti, wanəsaw Maŋgəlva neti, net wassoŋ ɗiy nawa.

³⁴ Ɗəf tay nawyagan ɗəf maɓɓani awaniɓa məlmən əmpa də wənah na: Asən Yawe ɓa, vi wasənwən baymet təŋ səzet memeɗeŋɗe net hã gap azet gugriɗ neti Yawe aɗiymani. Vi wanəvvuyon sit heslepe net də mambray neti, nəɗɗum na akan əmpa ɓa.

³⁵ An Yawe anah yaŋka: Ndən dəɗi pay ka dəkasakgən kapaya, dəɗi mahenziŋ sən təla dit ŋgərzleɗe dəkasakaŋgən də dəfəɗa, ndən dədaɓlan pehe, vovulumɗe nan adawbayaŋ gəgayə, iya nan na Yawe Məzuɓappak.

³⁶ An mahenziŋɗes azaŋgək səbawa, Yawe aɗiymani, asna ɗiy na Israyel assoŋ na ka ɗiy abaw ɓa hã faɗə!

³⁷ An Yawe anah yaŋka: An kawɓapi əsla əɓay na disiŋ awaniɓa əkosoŋ gabba dələv va asani, asna wanəzgan əsap net mə Israyelɗe aka an məs aɗɗaŋ pakə Yawe aɗiymani.

³⁸ Pay tay əzzani, Yawe aɗiymani, karkani walaŋgəla-metiŋ sən Yawe təŋ səza gəla məzargasla na Hananeyel hã gap aza metive na bezler.

³⁹ Kamsaki əpak helege nawziwgit meŋge sarara aka mossorgo na Gareb kakkpaŋ kəla Go'a.

⁴⁰ Walaŋ net kiygəbayɗe də an na moŋglo milmisin, muyã dəmmbat hã gap ama məlpa na Kedron gap aka bezler na maddamba net pilseŋge na kəlammba pay nampum. Təkiyəs pak salala sən Yawe, kawmõhni ɓa, kaɓzluni əmpa ɓa hã faɗə.