Yeremiya 30 - Bible en Guidar

An Maŋgəlva aynan nawgəɗ sən məlĩ na Israyel

¹ Əpel an sən Yeremiya səza Yawe yaŋ dawnəh na:

² Vaŋ Yawe Maŋgəlva na Israyel apel dawnəh na: Nok na aver əpel an nənoh suk pak addəv ɗerewel.

³ Vi pay yaŋ əzzani, Yawe aɗimani. Wanəzaɓan wən net ɗiy naw mə Israyelɗe dit mə Yudeɗi Yawe anahə. Wanəmilgit aka dələv məs nəpsit efiŋgiɗti, wagəmnən ka neti.

⁴ Əpel an Yawe apel sən Israyel gəm sən Yuda yaŋka:

⁵ Vasna, an Yawe anah yaŋka: ɓaɓəlma geslne nəprəmə, vaŋvəl na gəslne məza na zazayi ɓa.

⁶ Məssõh ɗa, mula an ɗəf məzilin awa. Ya vimi nədawla ɗəf mizilin pak də van a gizen va akən məɓay uwa di? Heret pak pokpok bar?

⁷ Əray midi miy aŋ di? Pay metiŋgin tay va ndən ɓay; pay na əzəmsãhãy yi viyit ɗiy na Yakob! Ya wakohoŋ səddəvən hara.

⁸ Pay dəpas na, Yawe Məzuɓappak aɗiyman na, wanəŋzlu zuk sə wəleti, wanəɓuh helege səzeti. Kəssoŋ na belemɗe net melekeɗ əmpa ɓa.

⁹ Waɗɗaŋ wəza sən Yawe Maŋgəlva neti. Davit nədawɗi sit ka məlĩ neti.

¹⁰ Is Yakob gawla nawa, kəgeslne ɓa Yawe aɗiymani; Israyel kəkker ɓa, vi inyakəŋ kawkõhguk sə faraɗa gəm kirtuk səka dələv an məket aka balamə. Yakob wamili wasan kiyən foŋgo məza əɗɗum ɓa; ɗəf tay nazlzlaɓan ɓa.

¹¹ In tat də is vi kawkõhguko Yawe aɗiymani; pay nədawki əza aket dəlveŋge en nətraygukum adak pak na, istə kaka' məs nəzok na ɓa. Wanəzga suk va an dəslə nuluk na va ɗəf məs də mezlibezlibe na man ɓa!

¹² An Yawe anah yaŋka: Vamvi nokum ambeɗna ɓa, huwa nokum anzaɗ na ɓa.

¹³ Ɗəf tay nahãy ammbok ɓa. Yoro nok armana haran ɓa. Miha nawmbəlguk tay ɓa.

¹⁴ Ɗiy en dəŋglukun pak azgətaŋgək kiyko, tay dədaɗɗum akok ɓa; vi nəvərkuk va kəɓəs na məzuzeluk nani, nərgukuk gədakə vi heslepe nok metiŋgini mambray nok adayka.

¹⁵ Vimi kədawɓuh mok sən əssa na vamvi nok məs ammbeɗ ɓaŋ di? Nəɗɗa suk vasna vi heslepe nok metiŋgini mambray nok adayka.

¹⁶ Ɗiy en dəzlatkuməni kawzletti yi; məzuseɓɗe nok pak waddoŋ baymet aka balamə; məzundolokun wakkpaŋgaŋ ka zəgeɗ nawndoleti, məzuppohõkuni, wanəpet sən popoho.

¹⁷ Də adanzlaŋ vaŋvəl na: Siyon məzgani yi ɗəf tay məzukayan ɓa zlaŋ na, wanəɗɗa huweɗ nok dərmanəngən hereti, wanənzeɗ huweɗ noko Yawe aɗiymani.

¹⁸ Vaŋ Yawe anahə: Inyakəŋ kawzaɓan wən net gizlirkeɗe na Yakob, wanəwəl sãhã aket daŋglaɗe nani. Karkani walaŋgəla-metiŋ a gəlan an lahəŋka, kawɗiyni gəla gboloŋgboloŋ a gəlan an farə.

¹⁹ Kaprəmi wəlet əya gəlya, sən ənneke. Wanənzlirgiti, arreheŋ na ɓa. Wanəɗɗa ɗiy dəgagdaketingini, kawzeleti ɓa.

²⁰ Kirtin wassoŋ va lahəŋka, əsap net ɗiy nan wasan abaw ɓəlɓələ wanəsil aket məzusərnən met pakə.

²¹ An dəgil səzan dədawsan daya nani; an dədawzəm məlĩ akan səddəvən adawgilyeni. Wanəddergin go'o, wade azawa, vi naway narga makran nadder azaw di? Yawe aɗiymani.

²² Wakəssoŋ ɗiy nawa, wanəsaw Maŋgəlva nokum.

²³ Barkataŋ na Yawe yaŋka: ədagədəv agilke Barkataŋ tay əkkpaŋga wabət aket məsdarawɗe.

²⁴ Makra Yawe tay turõh turõh aɓət na ɓa, hã an aɗɗaka, hã an aknahanək an aɗɗum a makran naɗɗa. Wakəprəmən gabban laha.