Yeremiya 3 - Bible en Guidar

Məpolkoyok kiyɓəɓəla

¹ Yawe aɗiyman na: An ɗəf appatək guluk nani yas təgili təkkpaŋ ga ɗəf mbərni, wamsak əgəmət ka gon əmpa sa? As waraygən dələv tipi. Mbaraka nok na, kəgəɗək əku dit gəreŋgiɗuk diyɗa, kawmilyok anawda sa?

² Aslan horo awəl aket tiveɗi, təki tay məza məvoŋguki adak ɓa sa? Aba tive kədawsok wəge greŋgiɗuk va Arab a kapta-muyã. Kəraygənək dələv də ɗarɗar noko gəm də zəga daraw nok məs kədaɗɗa.

³ Ndəni buwən dəzi ɓa, buwən na mawala dəzi ɓa. Guluk hara ɓəɓəl kənan ammba ɗarɗarə, kəɓoŋko, wil dədukun ɓa.

⁴ Təŋ kakaŋ na kəhəm su na: «Əbba, istə baynaw na sawã nawa.

⁵ Wakərma ədagədəv nok akaw faɗ sa? Wakərmu a mokrok sa?» Vas kədawpele, ya kəzbanək əɗɗa mambrayə!

Israyel məppan Maŋgəlva gəm Yuda məgəɗ mbərayən

⁶ Aka pay na məlĩ Yosiyas, Yawe anah su na: Kulak an Israyel məs man sula sulas agəɗ sa? Ambatək aka mossorgo metiŋ məɓayəŋ awandi pakə, ammba wəlaŋga hirikhirik awandi pak əɗɗa polkoyo nan adaka.

⁷ Naw nəmna, dərɓaga aɗɗa as pak na wamil azaw soko. Ya dəmil ɓa. Yuda hinzere məlmən awlaka.

⁸ Nulak va nəzgan Israyel məppan Maŋgəlva, va nuɗak dəndən dapsən ɗerewel nawɗaka vi agəɗ polkoyo. Də as pak na Yuda məgəɗ mbərayən məlmən dəgeslne ɓa. Ambatək əɗɗa polkoyo tamə.

⁹ Agəɗək polkoyo dit meŋgilveɗ net gərmeŋge gəm net wəleŋɗe, araygənək dələv də wədaw nani.

¹⁰ Də as pak na Yuda hinzere məlmən dəmil azaw də makran taka ɓa, də əwa wən kaka'ə hara, Yawe aɗiymani.

¹¹ Ndəni Yawe anah su na: Israyel məs man sula sula ula zən na təstəsi dəɗah ki Yuda hinzere.

¹² Dok əpel wənəŋ aka dələv na kəla disiŋ kənahgən na: Amili Israyel məs man sula sula, Yawe aɗiymani. Wanətok haraw akok ɓa, vi ɗəf təstəs nani, narma wən a makraw faɗ ɓa, Yawe aɗiymani.

¹³ Asən mbərayən nok kaka'ə, vi aka Yawe Maŋgəlva nok kəɓoŋgu. Kəmbatək də kakara ammbet meŋgilveɗ meɓɓeti awetdi pak gəm ammba wəlaŋga hirikhirik awandi pakə, kəŋgəm əprəmu ɓa Yawe aɗiymani.

Əmilye net mə Yudeɗi

¹⁴ Məmili, kirin kiyɓəɓəlɗe, Yawe aɗiymani, vi intə afukum! Wanəgəm taka səmbokum sə walaŋgəla-metiŋ pakə, sula səddəv mahəlfa, wanəkikum a Siyon.

¹⁵ Wanəpsukum məzuteɗeŋɗe na makrawa, wataɗkumən də əsəna gəm də maɗɗula.

¹⁶ Yawe aɗiymani: Pay kədanzləraŋgə kədawanən kikum aka dəlva. Pay nan na, kawpeli aka wən na akoti na wənmiyna na Yawe əmpa ɓa. Əɗɗum nan ade na aka ɗəf ɓa, kaɗɗumoni ɓa, met asan na akan ɓa, kawzaɓi maɓɓan əmpa ɓa.

¹⁷ Pay nan dəpaska, Yerusalem adawyaŋ na mazaŋga na məlĩ na Yawe. Ɗiy-ɗar pak wakkalaŋ vi iya na Yawe a Yerusalem, azbanən na makra ɓəɓəl net mbəraynəŋ əmpa ɓa.

¹⁸ Pay nan dəpaska, ɗiy na Yuda wasapaŋ azet ɗiy na Israyel, wamilyoŋ matak səka dələv na disiŋ aka dələv məs nəpsit efiŋgiɗkum ka neti.

Əmilye net ɗiy məs met sula sula aza Maŋgəlva

¹⁹ Naw nənahək na: Nəŋgəl kəta na kəssoŋgən temme səret kirtuwa, kapsuk dələv moggoni, təki an lalaw day səka dəlva. Nənahək na wakəyu əbba, kəmil na səzaw əmpa ɓa.

²⁰ Ya va guluk hinzerek tədawmbəɗan zəlta vas ɗiy na Israyel assoŋ hinzereɗe azawa, Yawe aɗiymani.

²¹ Tay əprəmaŋ wəla ɗəf aka təki ɗagarra: Mbaraka ɗiy na Israyel, məzuhəmaŋgə gəm məzəkkamaŋgə, vi dəgəmən tive an moggon ɓa, azgətaŋgək kiwa, in Yawe, Maŋgəlva neti.

²² «Məmil azawa, kirin kiyɓəɓəlɗe, wanəmbəlgukum səka ma sula sula nokum!» «Mənam yakəŋkə, midek azoko, vi istə Yawe, Maŋgəlva namə.»

²³ Gesiŋ, matuyaɗe naket mossorgoɗe, də gogoyo naket mossorgoɗe gugriɗ ambəɗaməka. Gesiŋ aza Yawe Maŋgəlva nam əkõh na Israyel asani.

²⁴ Matuya na Ba'al, maŋgəlva net wil azanənək wəza net efiŋgiɗmə, gilew neti, wasliɗe neti, kirtit mezeŋgleket dit muguluŋgiti, far səka sawã namə.

²⁵ Məsamsəm addəvit wil namə, mətaf səm ərbet wil namə, vi məgəɗək mambray sən Yawe Maŋgəlva namə, mənamə va efiŋgiɗmə, far səka sawãmə hã gap pay dəpaŋka; məprəm ma Yawe Maŋgəlva nam ɓa.