Yeremiya 29 - Bible en Guidar

Yeremiya aver ɗerewel sit ɗiy məket aka balamə

¹ Əpel naddəv ɗerewel məs məskəleŋ Yeremiya aslən sə Yerusalem yaŋ sit ɗiy məsɓet en dəppaŋ səret en misimgiti, məsdəlveŋge, məskəleŋɗe gəm sit ɗiy məs Nabukodonozor akə sə Yerusalem a Babilon:

² Səza məlĩ Yekoniya, ma'ãykə ɗiy gugriɗ na wəza nani, deyeɗe na Yuda dit en na Yerusalem, məsənaŋ əzaɓ zəga, məzaɓaŋ məslakata na maddamba agilyoŋ sə Yerusalem,

³ apsən ava Eleyasa wətən Safan gəm Gemariya wətən Hilkiya məs Sedekiya məlĩ na Yuda aslən aza Nabukodonozor məlĩ na Babilon a Babilon dawnəh na.

⁴ An Yawe Məzuɓappak Maŋgəlva na Israyel anah yaŋ sit ɗiy məsimgit pakə, en məs nəsimgit sə Yerusalem a Babilon:

⁵ Mərkə gəleɗe, məssoŋ addəvti gəm məɗi guli net wəleŋɗe məzəm uwa neti.

⁶ Məgəm gili, məwə kirin mezeŋgleket dit muguluŋgiti, məkay gil sit kirtukum mezeŋgleketi, məke kirtukum muguluŋgit ammba zile duwaŋgən kirin mezeŋgleket dit muguluŋgiti gəm kuwanəngən kiykum diyɗa adaka, kədarrehen ɓa!

⁷ Məkayan zazay na walaŋgəla-metiŋ məs nəkukum aka balam adaka, məkkaman Yawe ammbani vi zazay nan dədawki zazay nokum.

⁸ Vi vaŋki an Yawe Məzuɓappak Maŋgəlva na Israyel anahə: Kədappetin məskəleŋɗe nokum dəssoŋ a waloŋkum gəm məskaŋ helig nokum əmbəɗokum ɓa, kədazgaŋ sləma aket əssineɗ nokum məs kədassineŋ ɓa.

⁹ Vi uwawəni adaɗɗaŋ sukumən də iya nawa, nəslin ɓa Yawe aɗiymani.

¹⁰ Vi yaŋ an Yawe anahə: Ha'aw, an Babilon agəɗək əzva kaklaw buhul va nətawsən na, wanəzək slema akokum, asna wanəknahan əpel naw moggon vikum vi kawmilgukum a təkiyəŋka.

¹¹ Vi naw nəsənək an nədaɗɗum naɗɗa aka batamkum, zazay yi ɓa na tatwãhi ɓa, vi kapsukum əssa nokum nabe də əɗɗum nawga zəga, Yawe aɗiymani.

¹² Wakəyəwəni, wakəzzoŋ əkkamawa, wanəprəmkum.

¹³ Wakəkayawəni ya wakərəhwəni vi wakəkayawən də mokrokum pakə.

¹⁴ Wanəppan zu kərəhwəngəni Yawe aɗiymani, wanəzaɓan wən nokum gəm wanəkkolokum səket dəlveŋge də sə təki temtem məs nərɓokum adakəŋ pakə Yawe aɗiymani, wanəmndogokum a təki məs nəsimgukum sədaka.

¹⁵ Vi kənahaŋgək na: «Yawe apsəmək məskəleŋɗe a Babilon.

¹⁶ Vi vaŋki Yawe anah sən məlĩ məs dəsan aka mazaŋga na Davit gəm sit ɗiyen dəssoŋ də gəla addəv walaŋgəlaŋ pakə, milmiŋgiɗkum məs misimgiti də mənokum ɓaŋka.

¹⁷ An Yawe Məzuɓappak anah yaŋka: Inyakəŋ əslən masalam aweleŋti, mayã gəm gəbaymərma. Wanəkkpeŋget va sokoyeɗ məŋgənti məs kawɓapi əzimit ɓa sən əray neti.

¹⁸ Wanəzbet də masalam, də mayã gəm də gəbaymərma, wanəkkpeŋget ka zəga nawgeslnegit milyeŋge naka dələv pakə, ɗiy naket dəlveŋge məs nəɓɓeh adak pak waŋglaŋ sitin əraya, tatwãha, waggətaŋ aketi gəm waretini.

¹⁹ Adan dəprəmən əpel naw ɓa Yawe aɗiymani, ndəɗaŋ məs nəzban əslən sit məɗɗaŋ wəza naw məskəleŋɗe məza əppan gabban ɓa, ya yaŋ dəprəmaŋ ɓa.» Yawe aɗiymani.

²⁰ Mənokum məs nəsimgukum, nəkukum sə Yerusalem a Babilon, məprəm əpel na Yawe.

²¹ Vaŋki Yawe Məzuɓappak Maŋgəlva na Israyel anahə aka wən na Akab wətən Kolaya gəm aka wən na Sedekiya wətən Maseya, ndəɗaŋ məzəɗɗaŋ sukumən kəleŋ də uwawən də iya nawa: Inyakəŋ əppet ammba va Nabukodonozor məlĩ na Babilon wabey ama horokum.

²² Məket aka balam sə Yuda a Babilon pak wapeleŋ na mefɗeke də iya net dawnəh na: Yawe dəgəɗ suk va agəɗ sən Sedekiya gəm Akab məs məlĩ na Babilon azle akoffo.

²³ Vi aɗɗaŋgək zəga nawtem a Israyel, aɗɗaŋ əku a gizbe dit gil net milmiŋgiɗti, apeleŋgik əpel na uwawən də iya nawa ya nəɗi sit wən nan ɓa. Nawa, nəsənka, wanəswayə Yawe aɗiymani.

Yeremiya tay əzlan a ma ɗerewel na Semaya

²⁴ Kəpel səngən Semaya mə Nelam dawnəh na:

²⁵ Vaŋ Yawe Məzuɓappak Maŋgəlva na Israyel apel dawnəh na: Vi nok kəslənək ɗerewelɗe aka iya nok sit ɗiy en dəssoŋ a Yerusalem, gəm sən məsdələv Sefanya wətən Maseya gəm sit məsdəlveŋge pak dawnəh na:

²⁶ Yawe aɗikuk is Sefanya məsdələv a gəla məsdələv Yoyada, ɗəf matuŋguk kənan addəv gəla na Yawe vi karma ɗəf məzunah na məsdəlvi yi vi kaynan aza wəlaŋga nawlaw ɗiy də helege na təbza.

²⁷ Kakaŋ na vimi kəzgasən Yeremiya ɗəf na Anatot məs dəpel sukum va məskəleŋ ɓa di?

²⁸ Adan aslən səm ɗerewel a Babilon kawnah səm na, wakənziyaŋ aka balamə. Mərkə gəleɗe məssoŋ addəvti, məɗi guli net wəleŋɗe məzəm uwa neti.

²⁹ Məsdələv Sefanya anɗan ɗerewel vanəs sən məskəleŋ Yeremiya.

³⁰ Yaŋ əpel na Yawe ade sən Yeremiya dawnəh na:

³¹ Aslən sit ɗiy naka balam pakə, anah sit na: An Yawe anah aka Semaya mə Nelam yaŋka: Vi Semaya agəɗ sukumuk kəleŋ məza in nəslən ɓa, amokokumək ka kətafəngən uwawəna.

³² Vini Yawe anah na: Wanəsil aka Semaya mə Nelam gəm aket kirtini, ɗəf nan təttaka asan na aweleŋgit ɗiyiŋ ɓa, awla na moggon nədawgəɗ sit ɗiy naw ɓa, vi apelik nawɓoŋ aka Yawe, Yawe aɗiymani.