Yeremiya 28 - Bible en Guidar

Yeremiya də Hananiya məskəleŋ məwəwəna

¹ Addəv əzva vanəska'e, aka ətəŋ əzəm məlĩ na Sedekiya məlĩ na Yuda, aka əzva mopoɗo'ən təla mesle'in Hananiya wətən Azur məskəleŋ na Gabawən anah su addəv gəla na Yawe, keret məsdəlveŋge dit ɗiy pak dawnəh na:

² An Yawe Məzuɓappak Maŋgəlva na Israyel anah yaŋka: In tat əŋzlu zuk na məlĩ na Babilon.

³ Əvoŋ dəŋɗedəŋɗe əzva sula aŋ na, wanəmndeget zəgeɗ naddəv gəla na Yawe məs Nabukodonozor məlĩ na Babilon andə sə təkiyəŋ ake a Babilon a gəlet aŋka.

⁴ Gəm wanəmndagan Yekoniya wətən Yoyakim məlĩ na Yuda dit ɗiy en məsimgit sə Yuda a Babilon aŋka Yawe aɗiymani, vi wanəŋzlu zuk na məlĩ na Bibilon.

⁵ Yaŋ məskəleŋ Yeremiya azlan sən məskəleŋ Hananiya keret məsdəlveŋge dit ɗiy məs dəssoŋ ziwziw addəv gəla na Yawe pak na:

⁶ Dəsan vaska, kəta Yawe dəɗɗa vaska, kəta Yawe dəknahan əpel nok məs kəgəɗ kəleŋ akan nawmilgit zəgeɗ naddəv gəla na Yawe gəm ɗiy məsimgit a Babilon hã a təkiyəŋka, məskəleŋ Yeremiya anahə.

⁷ Aprəm əpeləŋ kaka' məs nədawnah suk a sləmoko gəm a sləmet ɗiy pakəŋ ɗa.

⁸ Məskəleŋɗe məs dəssoŋ far daabəŋ kiwa gəm daabəŋ kiko, ya aɗɗaŋgək kəleŋ aket dəlveŋge diyɗa gəm aket milyeŋge gugriɗe. Apeleŋ aka wən nawgaya, əraya gəm gəbaymərma.

⁹ Məskəleŋ dəgəɗ kəleŋ na zazaya, an agəɗək va əpel nani asna kawsənni na Yawe dəslən gesiŋ.

¹⁰ Yaŋ məskəleŋ Hananiya agəm zuk na ma wəla məskəleŋ Yeremiya, aŋzlani.

¹¹ Yaŋ Hananiya apel keret ɗiy pak dawnəh na: An Yawe anah yaŋka: Vas nədaŋzlu zuk məs Nabukodonozor, məlĩ na Babilon aklak awlet ɗiy pak tak əzva sula adagraka, Məskəleŋ Yeremiya tive nan kaw mbatə.

¹² Əpel na Yawe ade sənək Yeremiya sə dərɓaga məskəleŋ Hananiya aŋzlu zuk na ma wəla məskələŋ Yeremiya, dawnəh na:

¹³ Dok kəpelsəngən Hananiya dawnəh na: An Yawe anah yaŋka, zukɗe na wəlaŋga kəŋzletiŋki kəzaɓgən zukɗe na təbəz a gəleti.

¹⁴ Vi an Yawe Məzuɓappak Maŋgəlva na Israyel anah yaŋka: Nəklak zuk na təbəz a ma wəlet ɗiyəŋ pak na, vi dəɗɗaŋgən wəza sən Nabukodonozor məlĩ na Babiloni, ya waɗɗaŋ sənən wəza, zəga mamayã nawra zlaŋ nəpsənəka.

¹⁵ Yaŋ məskəleŋ Yeremiya anah sən məskəleŋ Hananiya na, aprəm kana Hananiya, Yawe dəslənuk ɓa, yaŋ nok kəɗɗa ka ɗiyəŋ dəɗiyəŋgən əɗɗum net aka uwawəna.

¹⁶ Vini Yawe anah na: Wanəzarguk səka dəlvəŋka, wakəmtə dəbyaŋka vi kəpelik nawɓoŋgit ɗiy aka Yawe.

¹⁷ Məskəleŋ Hananiya amtək aka əzvas aka təla mabuhuloni.