Yeremiya 27 - Bible en Guidar

Yeremiya aklakək zuk awlani

¹ Aka ətəŋ əzəm məlĩ na Yoyakim wətən Yosiyas məlĩ na Yuda na, əpeləŋ adesənək Yeremiya səza Yawe dawnəh na:

² An Yawe anah su yaŋka: Aɗəm helegeɗi, azaɓ zukɗe na wəlaŋga kəsletgin ama wəloko.

³ Asna kəslingin sən məlĩ na Edom, məlĩ na Mo'ab, məlĩ net mə Ammonɗe, məlĩ na Tir gəm məlĩ na Sidon də vet maslənɗe məs dəzzoŋ a Yerusalem aza Sedekiya məlĩ na Yuda.

⁴ Kənah sitgin an nəɗi wən nan sit deyeɗe net dawnəh na: An Yawe Məzuɓappak Maŋgəlva na Israyel anah yaŋka: An kədawnah sitin deyeɗe nokum yaŋka:

⁵ Intə nəzəməɗ dəlvafuŋ, ɗəf titire gəm zəga mamayã naka dəlvafuŋ də əɓap naw metiŋgini gəm də vaw paparra, yaŋ nədepsin ɗəf an nəŋgələ.

⁶ Ya kakaŋ na, intə nəpsən dəlveŋgeŋ pak ammba va gawla naw Nabukodonozor məlĩ na Babilon, zəga mamayã nawra zlaŋ, nəpsənək dəgəɗ səngən wəza.

⁷ Ɗiy naka dələv pak wagəɗ sənən wəza, sən wətəni, sən wəten wəteni hã gap pay dəlveŋge diyɗa gəm milyeŋge gugriɗe adakkpaŋganən ka məgəɗ wəza neti.

⁸ An ɗiyi awaniɓa milyeŋge dəɗɗaŋ wəza sən Nabukodonozor məlĩ na Babilon ɓa, dəppanən wəlet ammba zuk na məlĩ na Babilon ɓa na, asna wanəsil aket ɗiyis də masalam, mayã gəm gbəgba mərma Yawe aɗiymani, hã gap in kakah əzet də vani.

⁹ Ya nokum na kədaprəmən met məskəleŋɗe nokum ɓa, met məzulaŋ nokum ɓa, əssine nokum ɓa, məskaŋ helig ɓa gəm məɗɗaŋ sekeneɗ nokum ɓa, ndəɗaŋ məzupeleŋ sukumən dawnəh na: Kədaɗɗaŋ wəza sən məlĩ na Babilon ɓaŋki.

¹⁰ Kəleŋ na uwwa wən adaɗɗaŋ sukuməni vi kawzargugkum faraɗa səka dələv nokum gəm nəɓɓahkumgəni kəzaŋgəni.

¹¹ Ya ɗiy en dətafən əvoŋgən wəlet ammba zuk məs məlĩ na Babilon aɗiyə gəm kawgəɗ sən wəza na, asna wanəppet zay aka dələv neti Yawe aɗiymani. Wansenini gəm wassoŋ akani.

¹² Ya sən Sedekiya məlĩ na Yuda na, nəpelik əpeləŋ pak dawnəh na: Məvoŋgən wəlokum ammba zuk na məlĩ na Babilon gəm məgəɗ sən wəza ndən dit ɗiy nani kəssoŋgən madorokum.

¹³ Vimi kədamta is dit ɗiy nok ama masalam, mayã gəm gəbaymərma va Yawe apel aka an nawrih ɗiy dəɓoŋgoŋ dawgəɗ sən wəza sən məlĩ na Babilon di?

¹⁴ Ya kədaprəmən met məskəleŋɗe məzupeleŋ sukumən dawnəh na: Kəɗɗaŋ na wəza sən məlĩ na Babilon ɓa vi kəleŋ na uwwa wən adaɗɗaŋ sukuməni.

¹⁵ Naw nəslin ɓa Yawe aɗiymani, ya net tahəŋ əɗɗaŋ kəleŋ na uwwa wən də iya nawa, ka nərɓohkumgən kəzaŋgəni, mənokum dit məskəleŋɗe məzəɗɗaŋ sukumən kəleŋgi.

¹⁶ Ya sit məsdəlveŋge dit ɗiyiŋ pak nəpel sitik dawnəh na: An Yawe anah yaŋka: Kədaprəmən mət məskəleŋɗe nokum məzəɗɗaŋ sukun kəleŋ dawnəh na: Kamndegeti zəgeɗ naddəv gəla na Yawe kakaŋkakaŋ də kakara sə Babilon! Net kəleŋ na uwwa wən adaɗɗaŋ sukuməni.

¹⁷ Kəprəmən met ɓa, məgəɗ wəza sən məlĩ na Babilon kəssoŋgən madorokum, vimi walaŋgəla-metiŋginiŋ adakkpaŋ va kiməski di?

¹⁸ Ya an məskəleŋɗeŋ, an əpel na Yawe tay a meti, dəkkamanən Yawe Məzuɓappak vi adawketin zəgeɗ en dəmpaŋ addəv gəla na Yawe, naddəv gəla na məlĩ na Yuda gəm na Yerusalem a Babilon ɓa.

¹⁹ Vi vaski Yawe Məzuɓappak anah aka wən net dədəkeɗi, mergeɗi, kasliɗe gəm aket zəgeɗ en dəppaŋ addəv walaŋgəla-metiŋginiŋka,

²⁰ məs Nabukodonozor məlĩ na Babilon dəgim gala asimgin Yekoniya wətəŋ Yoyakim məlĩ na Yuda dit ɗiy na məlĩ na Yuda dit en na Yerusalem pak sə Yerusalem a Babilon ɓa.

²¹ An Yawe Məzuɓappak Maŋgəlva net məs Israyel anah aka wən net zəgeɗ en dəppaŋ addəv gəla na Yawe gəm addəv gəla na məlĩ na Yuda də an na Yerusalem yaŋka.

²² Kawketi a Babilon pakə, adak adassoŋ hã gap pay an nədazga sləma aketi Yawe aɗiymani, asna wanəmndegeti, wanəki a gəlet a təkiyəŋka.