Yeremiya 25 - Bible en Guidar

Əzva kaklaw sula kiyən hoku aka ərban wəna

¹ Əpel an dəde sən Yeremiya aka wən net ɗiy na Yuda pakə, aka əzva mapoɗo'ən na Yoyakim wətən Yosiyas məlĩ na Yuda. Əzvaski əzva maddaabəŋ na Nabukodonozor məlĩ na Babilon aka məlĩ yi.

² An məskəleŋ Yeremiya apel aka wən net ɗiy na Yuda gəm aka wən net ɗiy na Yerusalem pak dawnəh na:

³ Təŋ səza əzva kəlaw kiyən hoku na Yosiyas wətən Ammon məlĩ na Yuda hã gap pay dəpaŋka agəɗək əzva kaklaw sula kiyeŋ hoku, nəpel sukumuk əpel an Yawe apel su məza əppan gabban dawpelin ɓa, ya kəprəmən ɓa.

⁴ Yawe azbanək əslin sukum məɗɗaŋ wəza nan məskəleŋɗe məza əppan gabban dawslinit ɓa, ya kəprəmaŋ ɓa, kəpakən sləmokum vi kaprəmən ɓa.

⁵ Anahaŋ sukumənək na, kamə ɗəf pak dəmil səka tive mbərayən nani gəm səka wəza nokum mbərayən, kəssoŋgən faɗ aka dələv məs Yawe apsukum gəm sit efiŋgiɗkum farfar hã faɗə.

⁶ Kədezbetin meŋgilveɗ meɓɓet ɓa, kadawgəɗ sitin wəza ɓa, kədappu'oŋ abet ɓa, kədawdan səwən gədəvu də wəza mbərayən na vokum ɓa, asna nəgəɗ sukum na mbərayən ɓa.

⁷ Kəprəmwən ɓa hara Yawe aɗiymani. Yaŋ dərəŋ kədan suwənən gədəvu də wəza na vokum ka mbərayən akokum.

⁸ Vini Yawe Məzuɓappak anah vaŋka: Adan kəprəmnən əpel naw ɓa na,

⁹ Yawe aɗiyman na, in yakəŋ əslən əkeyet ɗiy na kəla disiŋ pak gəm wanəki Nabukodonozor məlĩ na Babilon gawla naw dəgaygən də dəlveŋka, dit ɗiy naddəvən, dit ɗiy naket dəlveŋge en dəssoŋ kiyən tərwəslə, wanəzet kakãhə, wanəkkpeŋget zəga naggət gəm nawmas aketi, wasan kiməski faɗə.

¹⁰ Wanəɓətgən geŋgere na ənnek gəm na əbabyak sənetda, gəlya na gawla an dəɓel gəm an nat məɓelta, gəlya nawsəra gəm wanəmtan lalam neti.

¹¹ Dələvəŋ pak wakkpaŋ kiməski muyã ɗarə, ɗiy naka dəlvəŋ waɗɗaŋ wəza sən məlĩ na Babilon əzva kaklaw buhul.

¹² An əzva kaklaw buhul aggrakək kan na, wanəsil aka məlĩ na Babilon gəm aket ɗiy nan vi mambray neti, Yawe aɗiymani; wanəsil aka dələv net mə Kaldiyeɗi, wanəkkpaŋgan ka kiməski hã faɗə.

¹³ An nəpel aka wən na dəlvəŋ pak wanəknahani, an məverin addəv ɗereweləŋ pak an Yeremiya apel na kəleŋ aka wən net ɗiy pakə.

¹⁴ Vi net van tam wakkpaŋgaŋ belemɗe net ɗiy diyɗa gəm net milyeŋge gagdakɗe. Vas nədamndagan sit an aɗɗaŋ gəm hara wəza net aɗɗaŋ dəveti.

Huloŋguk na mbazla nawtaw wəna

¹⁵ Vi aŋki an Yawe Maŋgəlva na Israyel anah suwa: Atafət huloŋguk na mbazla na ədagədəvəŋ sə vawa. Kəzlər sitgin ɗiy məs nəslənuk azetiŋ pakə.

¹⁶ Dəsaŋgəni dəssoŋgən denene, kiyit dəzlzlaɓgən sən masalam nədawslən aweleŋti.

¹⁷ Nətaftək huloŋguk na mbazla nak səva Yawe, nəzlər sitik ɗiy məs Yawe aslənu azət nek pakə,

¹⁸ nəpsəntək Yerusalem, walaŋgəlaɗe gugriɗ na Yuda dit məlyeŋge nani, ɗiy gugriɗ nani, kakkpaŋget va kiməskiya, kafyok aketi gəm nawsla kiva əraygən ɗəf dənɗaŋ va pay dəpaŋgənənka.

¹⁹ Sən Farawən məlĩ na Eziptə dit məɗɗaŋ wəza nani, ɗiy gugriɗ nani, ɗiy nan pakə,

²⁰ gəm sit molhõyẽɗ pakə; sit milyeŋge naka dələv na Us. Sit milyeŋge net mə Filistiɗe: En na Askelon, na Gaza, na Ekron gəm net mə Asdod en dəmbraŋgə.

²¹ Sit mə Edomɗe, sit mə Mo'abɗe gəm sit mə Ammonɗe.

²² Sit milyeŋge na Tir beymeti, sit milyeŋge na Sidon beymeti gəm sit milyeŋge na mətəwəra dəgar ki pehe;

²³ sən Dedan, Tema, Buz gəm sit məfaɗ tapasleyit pakə.

²⁴ Sit milyeŋge na Arab pakə gəm sit milyeŋge net ɗiy en dəssoŋ a kapta-muyã pakə;

²⁵ sit milyeŋge na Zimri pakə, sit milyeŋge na Elam pakə gəm sit milyeŋge na Maday pakə;

²⁶ gəm sit milyeŋge na kəla disiŋ en gu'o dit en faraɗe a walaŋ zit pakə, gəm sit milyeŋge naka dələv naka dəlvafuŋ pakə, dərɓeget na, məlĩ na Sesak dədawsa.

²⁷ Ya kənah sitgin na: «An Yawe Məzuɓappak Maŋgəlva net mə Israyelɗe anah yaŋka: Məsə hã kpe'i, hã əpara, hã əskoto gəm məza əɓap əsilye səba masalam məs nədawki akokuməŋ ɓa.»

²⁸ Ya an aɓoŋgoŋguk dawtafət huloŋguk səvok vi kawsəta, asna kənah sitgin na: An Yawe Məzuɓappak anah yaŋka: Va agəɗ pak wakəsətəni.

²⁹ Vi dəka walaŋgəla-metiŋ naw nədawtəŋ əki tatwãha, ya nokum na wakəkohoŋ sa? Kəkõhoŋ na ɓa vi in tat iya masalam aket ɗiy pakə Yawe Məzuɓappak aɗiymani.

³⁰ Ya nok na, kəpel sitgin əpel na kəleŋgəŋ pakə, kənah sitgin na: Sə disiŋ Yawe ahayə; sə təki nassa salala nani tay əslan wəlan əhaya, tay əhayet ɗiy nani. Tay əŋzla vaŋvəl va məɗot uwa net megezlembirkeɗi. Naway dəsan aka dələv pak tay əprəmən.

³¹ Vaŋvəl nan tay əgap a təki dələv abaymani Vi Yawe tay ətawwən aket ɗiy nani, tay ətoŋ ətawwən dit ɗiy pakə. Tay əppet məs mambrayɗe ama masalam. Yawe aɗiymani.

³² An Yawe Məzuɓappak anah yaŋka: Tatwãh tay əgilyen səket ɗiy əmbat aket ɗiy mbirti, barkataŋ metiŋgin tay əsilyen sə təki dələv abaymani.

³³ Pay dəpaska, təŋ sə təki dələv abaymani gap aza man mbərən, əhəm na gəlabay wasan viyit ɗiy en Yawe abay ɓa, kakkeleti ɓa, kawndikti ɓa, wassoŋ ka ba'ar aka dəlvafuŋ.

³⁴ Mətəŋ əɓuh mokum məzuteɗeŋɗe, məŋgəsl vaŋvəla, Məputkul afuŋ mənokum migil gazlaŋɗe, vi pay nokum agapək nawtaw wəlokum! Wakəskotoŋ kawtəray daɗaɗ va məsteɓe na sləma.

³⁵ Təki nawbit əɗam tay viyit məzuteɗeŋge ɓa! Təki nawɗam tay viyit migil gazlaŋɗe ɓa!

³⁶ In tat əprəm vaŋvəl net məzuteɗeŋge, əɓuhma net deyeɗe net gilew sən əzəmsahã: Vi Yawe tay əzan təki nawtaɗ neti.

³⁷ Gazlaŋɗe net tahəŋ semsemi, azaŋka, sən vakvak na ədagədəv na Yawe.

³⁸ Appetik ɗiy nan va wət ɓoolu dəgil sə gəlani. Vi dələv net akkpaŋgək məraygən aba vakvak na məzimgit sahã, gəm aba vakvak na ədagədəv nani.