Yeremiya 23 - Bible en Guidar

Ɗiy gugriɗ mbəreyti gəm məlĩ məkohgit ɗiyi

¹ Əray aket məzuteɗeŋɗe məppetin ɗiy naw əzaŋ gəm ətrayaŋgə, Yawe aɗiymani.

² Vini Yawe Maŋgəlva na Israyel apel aka wən net məzuteɗeŋɗe məzuteɗnin ɗiy nan vaŋka: Nokum kəppetinik gilew naw ətrayaŋgə, kəzetinke, kəzgaŋ sləma aket ɓa. Naw in yakəŋ əsilyew akokum sən daraw na wəza nokum, Yawe aɗiymani.

³ Naw wanəkkelet gilew naw an dəppaŋ səket dəlveŋge məs nətreyet adak pakə. Wanəmilgit a təki nawtaɗ neti, wawanən kiyti, wanzləraŋgə.

⁴ Wanəɗi məzuteɗəŋɗe aketi, wateɗini, wageslne'eŋ əmpa ɓa, akkeren na ɓa, tay nawza səret ɓa, Yawe aɗiymani.

⁵ Pay tay əzzani, Yawe aɗiymani, wanəsilgin zev Davit an təstəsə Wazəm məlyã, wagəɗ zəga də maɗɗula, də tiveni.

⁶ Aka pay nani, Yuda wakõhu, Israyel wasan kiyən foŋgo. Iya an adawyanən yaŋka: Yawe yi təstəs namə.

⁷ Vini, pay tay əzzani, Yawe aɗiymani, kawnahi əmpa na: Va Yawe məs dəpeŋgit mə Israyelɗe səka dələv na Eziptə asan madarani ɓa.

⁸ Ya dərəŋ na: Də Yawe madaran məs dəpeŋgit gəm dəmndeget kirtit mə Israyelɗe səka dələv na kəla disiŋ gəm səket dəlveŋge məs arɓeh adak ka dəssoŋgən aka dələv neti.

Məskəleŋɗe məs dədahaŋ ɓa

⁹ Aket məskəleŋɗe: Makraw tay əssawa ma slesleŋgu tay yuwar-yuwarə. In tat zurokzurok va ɗəf məs mbazla abayə, va məs mbazla aska wəlan, sən wən na Yawe gəm sən wən na əpel nan salala.

¹⁰ Dələv aknahək dit ɗiy məkuwaŋ a gizbe. Vaski dələv tay addəv əhəm aka wən na mefɗeke; təki nawtaɗ a kapta-muyã akəlka, əɗɗum net aka əɗɗa mambrayi gurom net dəslə aza an naɗɗa ɓa.

¹¹ Məskəleŋɗe dit məsdəlveŋge zlaŋ arayaŋka. Ha addəv gəla naw dayday nərahək mambray neti, Yawe aɗiymani.

¹² Vini tive net adawsan də maslarkatay nawka ɗəfa. Kawsleŋgeti ara guzliyo, waskotoŋ addəvən, vi əzva nədawsilyew aketi wanəki əza aketi, Yawe aɗiymani.

Məskəleŋɗe ɓetteŋɗeŋ a Samari

¹³ Nəwələk zəga nassa anet məskəleŋɗe na Samari da, ndəɗaŋ əɗɗaŋ kəleŋ də iya na Ba'al ndəɗaŋ əzetin mə Israyelɗe ɗiy nawa.

¹⁴ Gəm nəwələk zəga daryaw anet məskəleŋɗe na Yerusalem da: Ndəɗaŋ əku a gizbe, assoŋguk addəv uwawəna, ndəɗaŋ əzɓetin məɗɗaŋ mbərayən, kpaŋ ɗəf tay dəɗaɗɗum əppan mbərayən nan ɓa. Pakgit tahəŋ azaw va Sodom, ɗiy naddəvən va ɗiy na Gomorra.

¹⁵ Vi vaski Yawe Məzuɓappak anah vaŋ aket məskəleŋɗe: Wanəzimgit də ndərzla, wanipsit dəsaŋgən iŋkile də muhun areti: Vi səzet məskəleŋɗe na Yerusalem əraygən matuya agili atray aka dələv pakə.

Məskəleŋɗe muwaŋ wəna

¹⁶ An Yawe Məzuɓappak anah yaŋka: Kədaprəmən əpel net məskəleŋɗe ɓa en məzupeleŋ sukumən va məskəleŋɗeŋ na əza adawzokumuni, əɗɗum na mekret adawpeleŋgi səmaw in Yawe yi ɓa.

¹⁷ Ndəɗaŋ məzupeleŋ dawnah sit məzumasaŋ na: Yawe amna: zazay wasan akokum. Sit məzəzbanən əɓɓəlan mekret na tahəŋ ənahaŋ na tatwãh ade na akokum ɓa.

¹⁸ Ya naway dəsan də Yawe addəv əsəɓ nan di? Məs dula gəm dəprəm əpel nan di? Naway dəzək sləma ammba əpel nan gəm dəprəm gabban di?

¹⁹ Səmyã yaŋka: Ədagədəv na Yawe dəgili. Barkataŋ tay əgəmnən zit əgul məsdarawɗe.

²⁰ Ədagədəv na Yawe aɓət na ɓa gap ndən gərak əkgrak əɗɗa an na makrani. Addəvit əvoŋɗe en nabe na wakəɗɗumon akan də maɗɗula.

²¹ Nislin məskəleŋɗes ɓa, net addoŋko məza nəpel sit ɓa, apeleŋgik va məskəleŋɗe.

²² Va assoŋguk addəv əsəɓ nawa, əpel naw adaprəmanən sit ɗiy nawa; wamndegetin səka tive mbərayən neti, gəm səka əɗɗa mbərayən neti.

Addəv zəga pak Daya tay

²³ Maŋgəlva an gu'o nənan kaka' sa? Yawe aɗiymani, məza Maŋgəlva an faraɗa ɓa sa?

²⁴ An ɗəf aɗamək a təki nawɗam na, nula na ɓa sa? Yawe aɗiymani. Intə nəknəh disiŋ də dəlvafuŋ ɓa sa? Yawe aɗiymani.

Kədawlanən ŋgav va hay ɓa

²⁵ Nəprəmək an məskəleŋɗe anahaŋgə. Məzupeleŋ va məskəleŋɗe də iya naw də uwawən dawnəh na: Nissinik na, nissinik na!

²⁶ Hã dewɗe məzəɗiyən zit va məskəleŋɗeŋ adappanən əɗɗa kəleŋ na uwawən gəm əɗɗa kəleŋ də an dəde sə mekret di?

²⁷ Məzugayaŋ ka ɗiy naw dəzgətaŋgən ki iya naw də əbotet əssineɗ net awalaŋ ziti va efiŋgiɗit azgətaŋ ki iya naw ammba Ba'al.

²⁸ Məskəleŋ an dəssini, dənah əssine vani, ya an dərah əpel naw na, dənah əpel naw van gesiŋ! Miy dəsapan ŋgav də hay zək nan di? Vas Yawe aɗiymani.

²⁹ Əpel naw tay va offo ɓa sa? Yawe aɗiymani. Əpel naw tay va ndəvəl məzəgrof milɓe ɓa sa?

³⁰ Vini, in tat əgay dit məskəleŋɗe məzuhãlən əpel naw awalaŋ ziti, Yawe aɗiymani.

³¹ In tat əgay dit məskəleŋɗe məzugəmən əpel net ka əpel nawa, Yawe aɗiymani.

³² In tat əgay dit məɗɗaŋ kəleŋ na əssine net na uwawəna, Yawe aɗiymani. Tahəŋ ənahəni, tahəŋ əzetin ɗiy naw də uwawən net gəm də fərka neti. Naw nəslin ɓa, nəɗi sit wən nan ɓa, atəraŋ na wəray sit ɗiyəŋ ɓa, Yawe aɗiymani.

Əpel na Daya na zəga miynan nawslay sa

³³ An ɗiyəŋki, məskəleŋ awaniɓa məsdələv attokokunək dawnəh na: Miy zəga miynan nawsla na Yawe di? Asna kəzlan sitgin na: Miyə zəga miynan nawsla mədaykiykum di? Wanəppokum Yawe aɗiymani.

³⁴ Ya an məskəleŋgi, məsdəlva awaniɓa ɗəf səret ɗiy dənah na: Əpel na Yawe zəga miynan nawslay yi na, asna wanətawwən aka ɗəf van də gəla nani.

³⁵ Vaŋ kədawpeleŋ a walaŋkum ɗəf pak aza meggeni awaniɓa ɗəf pak aza məlmən na: Mbar Yawe azlan di? Miy Yawe anah di?

³⁶ Kədawnahaŋ na, əpel na Yawe zəga miynan nawslay əmpa ɓa. Vi wasan zəga miynan nawsla aka ɗəf məs dəpeli. Mənokum əkkpaŋgan əpel na Maŋgəlva madarani, Yawe Məzuɓappak Maŋgəlva namə.

³⁷ Vaŋ kədanah sən məskəleŋgi: Miy Yawe azlan suk di? Miy Yawe anah di?

³⁸ An kənahaŋgək na, əpel na Yawe, zəga nawslay yi na, vini Yawe adawnəh vaŋka: Adan kənahaŋ na, əpeləŋ zəga nawsla na Yawe yi na, asna in tat əslən akokum kawnah na, kədawnahaŋ na: Zəga nawsla na Yawe ɓa.

³⁹ Vini in yakəŋkə, wanəndukum, wanəzgokum mənokum də walaŋgəla-metiŋ məs nəpsukum gəm sit efiŋgiɗkum;

⁴⁰ Kawrokumi pay pakə, wil wassoŋ akokum faɗ məs kazgəti kiyit ɗah ɓa.