Yeremiya 22 - Bible en Guidar

¹ An Yawe anah yaŋka: Aprik addəv gəla na məlĩ na Yuda kəpelgin əpeləŋ adaka.

² Kənahgən na: Aprəm əpel na Yawe məlĩ na Yuda is məs kəsok aka mazaŋga na Davit, awəl sitik məɗɗaŋ wəza noko gəm ɗiy nok məzutoŋgoŋ də maddammbeɗeŋki.

³ An Yawe anah yaŋka: Məgəɗ təstəsə gəm an sarara, məmõh ɗiy en adappətaŋ səvet məzəppitetini. Kədawzəmgənən sahã na molhõyõ, mitiwe gəm gagəbay ɓa, kədaɗɗaŋ gəgay ɓa. Kədawbayən ɗəf də mazlibezlibe na man a təkiyəŋ ɓa.

⁴ An mənokum tat əɗɗanən zəgaska, asna milyeŋge tahəŋ nassoŋ aka mazaŋga na məlĩ Davit. Wapeŋgeŋ aket pilseŋge gəm aket mawteɗe na pəlsa. Watoŋgoŋ də metive na məlyã, ndəɗaŋgə, məɗɗaŋ wəza neti gəm ɗiy neti.

⁵ Ya an kəprəmən əpeləŋ ɓa, suwayə Yawe aɗiymani, gəla na məlyəŋ wakkpaŋ kiməskiya.

⁶ Vi an Yawe anah aka gəla na məlĩ na Yuda yaŋka: Law kənan azaw va Galad va ki Liban, wanəkkpaŋgok kapta-muyã walaŋgəla-metiŋ məs ɗiy nan tahəŋ akan ɓa.

⁷ Wanəhheɗet məzuzelkun akoko, ɗəf pak də zəga nani. Wabilin muguguleɗ na Liban nok en moggeti wazgetin akoffo.

⁸ Melekeɗ watoŋgoŋ diyɗa gu'o də walaŋgəla-metiŋginiŋka. Wattokonən zit na: Vimi Yawe agəɗ sən walaŋgəla-metiŋginiŋ vaŋ di?

⁹ Kawzlan siti na: Vi azganən wənmiyna na Yawe Maŋgəlva neti, appu'oŋ abet meŋgilveɗ meɓɓeti gəm agəɗ sitin wəzay yi.

Əpel aka Salum, dəgəm gəla Yosiyas

¹⁰ Kədawhəmgənən ɗəf məmtən səkay ɓa, kədaskaŋ morkoyo ammban ɓa. Məhəmə, məhəm ammba ɗəf məzəddan dərəngə, vi amil na əmpa kawla dələv nan ɓa.

¹¹ Vi aŋki an Yawe anah aka Sallum wətən Yosiyas məlĩ na Yuda, dəsan məlĩ agəla Yosiyas afəni, məs dəgil sə təkiyəŋka, amil na əmpa ɓa.

¹² Vi a təki məkan aka balamə, adaki adamta, awla na dəlvəŋ ɗah ɓa.

Əzelen an Yoyakim agəɗə

¹³ Əray aka ɗəf məs dərka gəla nan də əzelen təstəsə! Gəm gəleɗe nan məɓeyit məzuzel an dəslə! Tay əbet ɗiy əɗɗa wəza məza ətər ɓa, məza apsit iya na wəza net ɓa!

¹⁴ Məzunah na: Warka gəla vender vender məzarŋgasla, gəleɗe naddəvən sloprok sloproku. Tay əppa təkifoŋgo tay əɗaman zə gəla van diŋgil dit wəleŋɗe moggeti tay əkkəɗ sit sleɗi.

¹⁵ Mok aka ərban na temme kənan səzet milyẽŋge meɓɓet də ərka gəla nok də wəlaŋga ɓəɓəl sa? Afuk azəmka, asəka, atawək wən təstəs də tiveni, vini arah zazaya.

¹⁶ Tay əɗɗa moggon sən məssahã gəm sən məzuraya, as lewi. Aski əsənu ɓa sa? Yawe aɗiymani.

¹⁷ Ya nok horok də mokrok pak aka ərəh noki, gəm aka əggbo' mbel net ɗiy en də mazlibezlibe na meti, aka əsər met ɗiyi gəm aka əɗɗa darawi yi.

¹⁸ Vi vaski, an Yawe anah aka Yoyakim məlĩ na Yuda wətən Yosiyas yaŋka: Kawhəmi ammban dawnəh na: Aw məlmuwa! Aw məlmuwa ɓa! Kawhəmi ammban də wənah na: Aw daya nawa! Aw məlĩ nawa ɓa!

¹⁹ Kawndəkni va koro, kakdani gbototo kazgani appaka na Yerusalem.

Wili gəm ərba wil na Yerusalem

²⁰ Apeŋ aka mossorgo na Liban aŋgəsl vaŋvəla dəprəm a Basan aŋgəsl vaŋvəl hã səket mossorgoɗe na Abarim vi məbeyti gəreŋgiɗuk gərakə.

²¹ Nəpel sukuk aka kəsok kiyuk foŋgo, ya kənahək na: nəprəm na ɓa. Aski ədaw nok far səka gawloko; vi kəprəm maw ɓa.

²² Səmyã watreyet məzuteɗeŋɗe noko: vaski, gəreŋgiɗuk waddoŋ aka balamə. Asna wil wadukuni gəm wakərbə wili sən mambray an kəgəɗ pakə.

²³ Is məs kəsok də gəla a mossogo na Liban məs gəla nok aket muguguleɗ, wakənɗəsə an zəga nassa arəhkuko hara, wakəsok ɓalwãy-ɓalwãy va guluk məɓay uwa.

An dəgəɗ aka Koniya, wətən Yoyakim

²⁴ Va nəsaw madarawa Yawe aɗiymani: Kəta is Koniya wətən Yoyakim, məlĩ na Yuda asok va ndama aka vaw dəzəŋ zlaŋgə, wanəggbukko.

²⁵ Wanəppok ammba vet ɗiy məzukayokun kawbayko, ammba vet ɗiy məs kədawgeslne' siti, ammba va Nabukodonozor, məlĩ na Babilon gəm ammba vet mə Kaldiyeɗi.

²⁶ Wanəzgok dət mok məs təwuk aka dələv maɓɓani. Dələv məs məwukumi adak ɓa, adak kədamtaŋgə.

²⁷ Wakəŋglaŋ əmilye aka dələv nokum ya kəɓapen na ɓa.

²⁸ Məttoki na: Ɗəf Koniyaŋ mozgoy gboŋgboho məzeleni sa? Mesteɓe məs ma ɗəf tay akan ɓay sa? Vimi məzget appaka ndən dit kirtini, mərɓehit aka dələv məs dəsənən ɓaŋ di?

²⁹ Dəlva, dəlva, dəlva aprəm əpel na Yawe.

³⁰ An Yawe anah yaŋka: Məver iya na ɗəfəs va tay də uwa ɓa, ɗəf məs ənziya nan dəhhar ammban ɓa vi ɗəf təttaka səddəv mazlalwan tay nawsan aka mazaŋga na məlĩ Davit kawzəm məlĩ aka Yuda əmpa ɓa.