Yeremiya 21 - Bible en Guidar

Əzlan ama məlĩ Sedekiya

¹ Əpel an Yawe anah sən Yeremiya gala məlĩ Sedekiya aslən Pasehur wətən Malkiya gəm məsdələv Sefanya wətən Maseya azan kawnah sən na:

² Kamə attokon səm Yawe vi məlĩ na Babilon Nabukodonozor tay əgay dəndəmə. Awsən ɓa Yawe wagəɗ səm zəga naggət akani, wamndan səzam faraɗa soko.

³ Yeremiya azlan sit dawnəh na: an kədawnah sənən Sedekiya yaŋka:

⁴ Vaŋki Yawe Maŋgəlva na Israyel anahə: Gulomɗe nalpa nammba vokumiŋki, məs kədawgayaŋ də məlĩ na Babilon gəm mə Kaldiyeɗiŋki inyakəŋ əmndeget akokumu. Ɗiy en dəvoŋgoŋ sukumən də baŋla, wanəkkelet addak walaŋgəla-metiŋginiŋka.

⁵ In sən kiwa, wanəgay də mənokum də vaw gboŋgboŋ təlla gəm də ədagədəv makraw fuyõfuyõ diyɗa sit herɗe.

⁶ Wanəbey ɗiy na walaŋgəla-metiŋgiŋka, ɗiyi gəm zəgeɗ memeyẽɗi wamtaŋ sən gbəgba mərma diyɗa.

⁷ Səɓɓa as əmpa na, Yawe aɗiymani, wanəppan Sedekiya məlĩ na Yuda, məɗɗaŋ wəza nani, ɗiy en dəppaŋ səddəv walaŋgəla-metiŋginiŋ səma gəbaymərma, masalam gəm səma maya ammba va Nabukodonozor məlĩ na Babilon gəm ammba vet məzuzelɗe net məzəŋglaŋ kawbeytini, Nabukodonozor wabey də masalam, sasãh ɗəf tay adawla ɓa, ɗəf tay adappa ɓa, awəl na sasãh ɓa.

⁸ Kənah sitgin ɗiy vetis na: An Yawe anah yaŋka: Nəɗiyək tive na zeŋgile gəm tive namta abokum.

⁹ Ɗəf dəsan addəv walaŋgəla-metiŋginiŋka wamtə ama masalam, sən mayã awaniɓa sən gəbaymərma diyɗa. Ɗəf dəgil vi kawsap dit mə kaldiyeɗ dəsərŋgəslkuməni, nan wasan madarani, wakkpaŋ zəga nawrəh nama əgaya.

¹⁰ Vi haraw aka walaŋgəla-metiŋginiŋki nəɗiya, ka moggon nani ɓa, ka tatwãh nani yi Yawe aɗiymani; wasan ammba va məlĩ na Babilon, wazla də offo.

Əpel sən gəla na Məlyã

¹¹ Anah sən gəla na məlĩ na Yuda na: aprəm an Yawe anahə,

¹² Zev Davit: An Yawe anah yaŋka: Aza va addaŋ pak məgəɗ moggoni. Məmõh məs adappətaŋ səmmba va məzəppətni. Vas ɓa na ədagədəv naw wagil va offo məzuzla, məza ɗəf tay namtan ɓa, vi wəza daryaw nokum.

¹³ Nərmak wən nokum a makrawa mənokum na walaŋ aggərəm a təki fahfahə, Yawe aɗiymani; mənokum məzunahaŋ na naway nawaksəkum di? Naway nazzan a təki nawɗam nam di?

¹⁴ Wanətaw wən aka wəza nokum Yawe aɗiymani. Wanəɗi offo sit wəleŋɗe rəɓ nani wazlzlir tutu'u.