Yeremiya 20 - Bible en Guidar

Miynani Yeremiya aka wəlaŋga nawlaw ɗiyi

¹ Pasehur wətən Immer, məsdələv daya na gəla na Yawe aprəmək əpel Yeremiya apel na kəleŋgəska.

² Pasehur argak məskəleŋ Yeremiya yas appan miynan aka wəlaŋga nawlaw ɗiy a maddamba na Benyamin an məɓayən nawtoŋ addəv gəla na Yawe.

³ Vit pummo nani, səza Pasehur apəl səka wəlaŋga nawlaw ɗiy naka, Yeremiya aɓsən na: Yawe ayuk na Pasehur əmpa ɓa, wayuk na Magor-Misabib va wənah na geslne dahãdahã pakə.

⁴ Vi an Yawe anah yaŋka: In yakəŋ kappok addəv geslne, is dit beyneŋgiɗuk pakə. Waskotoŋ pak ama masalam net məzuzelɗe neti, horok wawla. Yuda də wən nan pak wanəppan ammba va məlĩ na Babilon. Wasimgit a Babilon, wabey də masalam.

⁵ Arya na walaŋgəla-metiŋginiska, wərəh na wəza net pakə, zəgeɗ na sləma net pak gəm wəzaɓ net məlyeŋge na Yuda pak wanəpsit ammba vet məzuzelɗe neti; wappohonəni, wasləpatnəni, wakanən a Babilon

⁶ Ya is Pasehur dit ɗiy nanokda pakə, kawkukumi aka balamə. Wakəgap a Babilon, adak kədamta, adak adawndukkun sap dit beyneŋgiɗko, vi kəgəɗ sitik kəleŋ na uwawəna.

Yeremiya aɓuhuk man aba Maŋgəlva

⁷ Yawe kəmbəɗawəka, nəmbəɗka; kərmuka, kəskak wəlawa. Nəkkpaŋgək zəga nawmas akan pay pakə naway pak tay əmas akawa.

⁸ Va nədawpel aka əpel nok pakə, in əŋzla vaŋvəl əyuk nabbaha sən ərma mama gəm əraya. Vi əpel na Yawe akkpaŋgək azaw ka zəga na əra gəm nawmas akaw pay pakə.

⁹ Ya an nənahək na: Nəɗɗum na akan ɓa, nəpel na də iya nan əmpa ɓa, asna addəv kpum na makrawa tay va offo məzuzla addivit slesleŋɗe nawa. In zu sok əɓəsən ya nawɓapən ɓa.

¹⁰ Vi in tat əprəm əpel mbərayən sə met ɗiy diyɗa; əyəwən na: «Geslne tərwəslə.» Məssak akani, waməssak akani. Bayneŋgiɗu pak tahəŋ heret ɗəhərra ammba əzlzlaɓ nawa, kuzuŋ wappan zən sən ərak soko, məskagən wəlani, məmpəlgən kiya.

¹¹ Yawe tay də in va məzəlpa gurom. Vini məzərɓahawən adaskotoŋgu; askaŋ na wəla ɓa. Warbaŋ wil diyɗa, vi ahhar na ammbet ɓa wasan sit zəga net wil an faɗ məs kazgəti kiyən ɓa.

¹² Ya Yawe Məzuɓappak, kəsinik ɗiy en təstəsə, kawla kpukpum na mekret də əɗɗum neti. Nəppanək wən naw pak avoko, in tat əŋgla nulagən va kədampəlkiya.

¹³ Məyəsən gəlya sən Yawe məgagdakan Yawe, vi akõhgənək məssahã səvet ɗiy mbəreyti.

¹⁴ Əray aka pay məwuwa! Əzaɓ adassan aka pay maw təwu ɓa!

¹⁵ Əray aka ɗəf dəki alabara nanneken zə afu dawnəh na: «Məwəsuki wiyən mizilin!»

¹⁶ Ɗəfəska dəsan va walaŋgəleɗe gugriɗ məs Yawe azet məza ndən əddəɗan man ɓaŋka! Pum na dəprəm vaŋvəla, ya tataŋ pay tamə vaŋvəl na əgaya!

¹⁷ Va appawək əmta aka nəsaw addəvət əmma! Əmma watəsat magamas naw kəta, daway nat wasan addəvət faɗə!

¹⁸ Vimi nəgil səddəvət əmma kawla tatwãh də əzəmsahã kakgrak ənziya naw egge addəv ərba wil di?