Yeremiya 2 - Bible en Guidar

Kəleŋɗe aka pay na məlĩ na Yoziyah, Yoyakim, Yezakin gəm Sedekiya ( 2:1—25:38 ) Israyel azganək tive an moggoni

¹ Əpel na Yawe ade suwək dawnah na:

² Doko, kəpelgən a sləmet ɗiy na Yerusalem də wənah na: Vaŋ Yawe anahə: In tat əɗɗumon moggon nok aka kəsok gore. Aka əŋgla na gəre noko! Gala kədazbaw a kapta-muyã, aka dələv məza guli adak ɓa.

³ Israyel məwele na Yawe yi va zəga na mabardaw nan dəsəɓ maddaabəŋgi. Ɗəf an dəzəm pak tay də wən akani; tatwãh warəha, Yawe aɗiymani.

⁴ Məprəm əpel na Yawe, kirtin Yakob, dit mahəlfaɗe net ɗiy na Israyel pakə;

⁵ Vaŋ Yawe anahə: mi may efiŋgiɗkum arəhaŋ azaw mbərayən ka dəzaraŋgən səzawa di? Azbanənək zəga ɗarə akkpaŋgaŋ ɗarə.

⁶ Dənahaŋ na: Ŋgay Yawe məs dəpeŋgəm səka dələv na Eziptə məs dədawgəm a kapta-muyã, aka dələv məs daŋdaŋ dit məŋkparaɗe, aka dələv mukuro də guzli ndiɗimi aka dələv məs ɗəf dətoŋ ɗah dəkan ɓa, məs ɗəf dəsan ɗah də gəla adak ɓaŋ di?

⁷ Nəkikumuk aka dələv məs guli net wəleŋɗe məzuwaŋgə, kəzəməngən uwa neti də ətərwəray neti. Yaŋ kəzzoŋ kərnokonən dələv nawa, kəkkpaŋganənək dələv nawray naw zəga daryawə.

⁸ Məsdəlveŋge awnahaŋ na: ŋgay Yawe di ɓa? Ɗiy na mahenziŋ dəsənwən ɓa, məzuteɗeŋge net ɗiy atemeŋgik akawa, məskəleŋɗe aɗɗaŋgək kələŋ də iya na ba'al, ammbet zəgeɗ en atəraŋ na wəray ɓa addoŋgu.

⁹ Vini nəsaw də dolgoy akokum, dolgoy naw wasan aket kirtit kirtukum Yawe aɗiymani.

¹⁰ Məddoŋ aket mətuwəraɗe na Kitim mula, məslən a Kedar, məttokon gabban təstəsə, mula, an zəga agəɗka,

¹¹ ɗiy-ɗar addəɗetin meŋgilveɗ net sa? Ya net dərəŋ meŋgilveɗiŋ ɓa! Ya ɗiy naw addəɗanənək gagdak net də zəga an nawtər wərayi ɓa.

¹² Disiŋ aggət aka wənəska, akker kətkət diyɗa sən geslne, Yawe aɗiymani.

¹³ Vi ɗiy naw aɗɗaŋgək an dəslə ɓa aka zən zaɓzaɓə: Azgawənka, in iŋkile miyma, vi kawso'oŋ vov net iŋkile neti; vov məpɗakən məs awziwgit iŋkile ɓa.

Wəzgan Daya na wən nan tuwãhi

¹⁴ Israyel balami sa? Muwan na balami sa? Nan vimi asan ka zəga nappõhon di?

¹⁵ Bigawleɗ net ɓooliɗ tay əbayaŋ sənən gagay. Tay əbayaŋ gagay zit soksoku. Araygənək dələv nan kuɗupu. Məzleti walaŋgəleɗe gugriɗ nani, ɗiy tahəŋ addivit ɓa.

¹⁶ Ɗiy na Memfis gəm na Dafne dayday akkpokənək kiyko.

¹⁷ As van arəhuk na vi kəzgan Yawe Maŋgəlva noko, gala adakuk tive tive yi ɓa sa?

¹⁸ Kakaŋ na, mi dədamndogok aka tive na Eziptə ka kawsa iŋkile na Nil di? Mi dədamndogok aka tive na Asiri ka kawsa iŋkile na Efrat di?

¹⁹ Mambray nok dəzga suko, kəta əppan Maŋgəlva dəkisuk əzga'a! Vasna asəna kulagən na wəzgan Yawe Maŋgəlva nok gəm wəgeslne sən tay ɓa na, wən nan təraŋhi, mbərayni, Yawe Maŋgəlva Məzuɓappak aɗiymani.

Israyel, guluk məkuta

²⁰ Far kəŋzlu zuk noko, kəpəlik helegeɗ dəynokuni; kəmna: Nəgəɗ na wəza ɓa! Aka təki ɗagarra gəm ammbet wəleŋɗe tindiŋ tindiŋ pak kəweɗik zuk əɗɗa polkoyo.

²¹ Intə nəmpuk va megezlembirke məwelin, va wəlaŋga an moggon diyɗa. Mbarmbar kəkkpaŋ va megezlembirke an ɗar di?

²² Aslslay də meleme zlaŋ, akkəɗ sapuna təl ɓaɓay zlaŋ, mambray verre abawa, Yawe Maŋgəlva aɗiymani.

²³ Mbar kədawnah na: kərga'an zuk ɓa kəzban ba'al ɓa di? Awla va kədaw a walaŋ! Asən an kəgəɗə! Zlogomo məguluŋgut məzənzat slorsloru.

²⁴ Is tat va koro mugolun nawra, məs dəsərək də kapta-muyã. Pay narka' nani tay əffok səmyã; naway nawtak pay narkã nan di? En mezeŋgleket məzukayanən pak awyaŋ sam ɓa; tahəŋ əpeŋ akan an təla nani.

²⁵ Asla zuko, vas ɓa na wakəsok mədaw tuluk mekeleŋ ma wulok waŋkəl sit meme! Yaŋ kəzlan na: Agəɗ na ɓa, vi nəŋgluwik meŋgilveɗ melekeɗi, wanənzaw ammbeti.

²⁶ Va wil adawdanən məhala pay məgbat akani, vas wil adawdenin mə Israyelɗe, ndəɗaŋgə, milyeŋge neti, deyeɗe neti, məsdəlveŋge neti gəm məskəleŋɗe neti.

²⁷ Tay ənah sən wəlaŋga məzaɓən na: istə afuwa! Gəm sən gərəm na: istə kəwuwa! Istə kəwəmə! Vi doŋgbolit akkpaŋgan suwən ɓa na hereti ɓa. Ya pay na tatwãh net na, ndəɗaŋ ənahaŋ na: Asil akõhgəmə!

²⁸ Ŋgahəŋ meŋgilveɗ nok məs kəzaɓ sən kiyuk nek di? Dəsilyoŋgu an wakõhgukun pay na tatwãh noko? Yuda vi əŋɗa net walaŋgəleɗe gugriɗ nok gba net meŋgilveɗ noki.

²⁹ Vimi kədawɓuhun mokum də in di? Yawe aɗiymani. Mənokum baymokum pak kətemeŋgik akawa.

³⁰ Nəyanək zu ərge kirtukum, dətafnən əzga naw ɓa. Masalam nokum abeyik məskəleŋɗe va ɓoolu adampər zəga.

³¹ Mənokum ɗiy en kakaŋka, məprəm əpel na Yawe! Nəkkpaŋgək va kapta-muyã aza Israyel sa? Awaniɓa va dələv ara guzli sa? Vimi ɗiy naw anahaŋ na: «Na kiyəm mənani məmil na azok əmpa ɓa di?»

³² Waŋ goruk tazgət ki zəga na gawla nat sa? Guluk namba zil tazgət ki gendu nat sa? Ya ɗiy naw na maggaŋ azgətaŋ kiyu ɓa.

³³ Va kəsənən əzaɓan tive naɗɗa gəre. Vini kəsərəkaŋ əɗɗa polkoyo.

³⁴ Mbel net məzurayɗe də en məs mezlibezlibe na met tahəŋ aza gabba lukut noko, də kəgbot aket daɗɗa mbərayən ɓa zlaŋgə! Ya də as pak zlaŋ na,

³⁵ is tat ənah na, maw bartatay ədagədəv nan ade na akaw ɓa! Ya naw in yakəŋ ətawwən akoko vi is tat ənəh na: «Nəgəɗ mambray ɓa.»

³⁶ Mbar kəgəm zuk əddok faraɗa kaddəɗan tive nok di? Aba Eziptə dayday wakərbə wil va kərbə wil aba Asiri.

³⁷ Akəgil sədak vok aka kiyuk seki. Vi Yawe azgetik zəgeɗ məs kəɗi əɗɗum nok aketiska. Kərah na an nawtəruk ɓa.