Yeremiya 19 - Bible en Guidar

Gagiya muŋgrofun

¹ An Yawe anah sən Yeremiya yaŋka: Dok albah hinziw səna məzərka da, sədərɓagan na kəgəmgən ɗiy məsɓet səret ɗiyi gəm ɗiy məsɓet net məsdəlveŋge.

² Kəgilgin də walaŋ na Ben-Hinnom, məs dəsan a maddamba net galmayãɗe; Adaka, kətəlgən ma na əpel an nədawnah suko.

³ Kənahgən na: Məprəm əpel na Yawe, milyeŋge na Yuda, gəm mənokum ɗiy na Yerusalem! An Yawe Məzuɓappak Maŋgəlva na Israyel anah yaŋka: In yakəŋ əki tatwãh aka təkiyəŋka, ɗəf dəprəm pak sləman wagəɗ nzeehẽ.

⁴ Vi azgawənka, araygənənək təkiyəŋ də əzla tursan sit meŋgilveɗ meɓɓet məs ndəɗaŋ zək net dəsinnin ɓa, efiŋgiɗit ɓa, milyeŋge na Yuda ɓa. Aknahənək təkiyəŋ dit mbel net ɗiy məs də mezlibezlibe na meti.

⁵ Arkaŋgək gəleɗe-nettuyeŋge sən Ba'al vi kawzle kirtit ka əvəl nawzla kurmbuɗuk sən Ba'al. Nəɗi wən vas ɓa, nəpel vas ɓa, dəde ɗah vas a makraw ɓa.

⁶ Vini Yawe aɗiymani, pay wade məs kawyani təkiyəŋ Tofet awaniɓa walaŋ na Ben-Hinnom ɓa, kawyani dərəŋ na miktik Nawbay gəbaya.

⁷ A təkiyəski nədawraygən an Yuda də Yerusalem aynaŋgə. Wanəzlbe də masalam abet məzuzelɗe neti gəm də vet en məzukayanən zeŋgileti. Wanəpsit kiygəbeyit ka əzəm net biŋgeɗi gəm zəgeɗ nawra.

⁸ Wanəzan walaŋgəla-metiŋginiŋka, wakkpaŋ təki məraygəni. Ɗəf dədawtoŋ də maŋgavan pak wageslne'i, gəm waggət aka an dəgəɗə.

⁹ Wanəzəmgit sluwit kirtit mezeŋgleket dit muguluŋgiti. Ɗiy wampəranən zit addəv əzəmsahã gəm tatwãh məs məzuzelɗe net adawkiyaŋ aketi, gəm en məzukayanən zeŋgileti.

¹⁰ Kəkrapgən hinziw nak ama heret ɗiy məs dəddoŋ də is naka.

¹¹ Kənah sitgin na: An Yawe Məzuɓappak anah yaŋka: Va adakrapən hinziw na məzərka awzaɓ əmpa ɓaŋka, vaski nədekrep ɗiyəŋki gəm walaŋgəla-metiŋginiŋka. A Tofet zlaŋ kawndəki ɗiyi vi təki tay nawndəkit ɓa.

¹² Vas nədawgəɗ sən təkiyəŋka gəm sit ɗiy naddəvən. Wanəkkpaŋgan walaŋgəla-metiŋgiŋ va Tofet Yawe aɗiymani.

¹³ Gəleɗe na Yerusalem, gəleɗe net milyeŋge na Yuda wassoŋ mərnokit va Tofet gəm gəleɗe məs azlaŋ tursan sit məzəlpaŋ na disiŋ a təki məs afloŋgun mbazla nawpesl net sit meŋgilveɗ meɓɓet pakə.

¹⁴ Yeremiya amilik sə Tofet təki məs Yawe aslən adak kaɗɗa kəleŋ, adek əziw a daŋgla na gəla na Yawe, anah sit ɗiy pak na:

¹⁵ An Yawe Məzuɓappak Maŋgəlva net mə Israyelɗe anah yaŋka: In yakəŋ əki tatwãh aka walaŋgəla-metiŋgiŋ dit walaŋgəleɗe nan pak va nənahə. Vi aɓɓəlanənək kiyti ka adaprəmən əpel naw ɓa.