Yeremiya 18 - Bible en Guidar

Yeremiya ana məzərka da

¹ Əpel an sən Yeremiya səza Yawe yaŋ dawnəh na:

² Asili, dok ana məzərka da, adak nədaprəman suk əpel nawa.

³ Nəmbatək ana məzərka da vani, yaŋ tay əɗɗa wəza dit zəgeɗ na wəza nani.

⁴ An tay dəpəl sən mesteɓe an arkə van va adawray səva məzərka na dəlva, ndən əmsak ərkan əkkpaŋgan ka mesteɓe mbərən va aza əŋgla nani.

⁵ Yas əpel na Yawe ade su dawnəh na:

⁶ Mənokum mə Israyelɗe, nəɓap na əɗɗa də munokum va məzərka adaɗɗa də dələv narka ɓa sa? Yawe aɗiymani: Va dələv asan ammba va məzərka, vaski kəssoŋ ammba vawa ɗiy na Israyel.

⁷ Pay mbərən an niynanək naptiw ɗiy naka dəlva awaniɓa kiva na məlyã, naɓzliwti may nawzeti,

⁸ an ɗiy naka dələv nəpel aket vet appanənək mambray net məs dədan su gədəvu vani, asna wanəppan tatwãh an niynan nawgəɗ siti.

⁹ Pay mbərən an niynanək narketi gəm nampet ɗiy naka dəlva awaniɓa kiva na məlyã,

¹⁰ an ɗiy vetis aɗɗaŋgək mambray ama harawa, dəprəmnən maw ɓa, asna wanəppan wən na moggon məs nənah na wanəgəɗ sit moggoni.

¹¹ Kakaŋ na, anah sən ɗəf na Yuda pak dit en na Yerusalem dawnəh na: Vaŋki Yawe anahə: In yakəŋ əki əray akokum, niynanək an nədawgəɗ sukum, ɗəf pak dəmil səka tive nan mbərayən. Məzaɓan ədaw nokum də wəza nokum moggoni.

¹² Ya tay ənahaŋ na: Gabban tay ɓa, əɗɗum nam mədazba. Ɗəf pak wasan addəv ki ɓəɓəl nani, mbərayən mədaɗɗa.

Israyel azgətək ki Daya nani

¹³ An Yawe anah yaŋka: Məttoket ɗiy naka dələv mbərən: Naway dəprəm ɗah zev wən vas di? Ɗiy na Israyel aɗɗaŋgək zəga daryaw sawɓa.

¹⁴ Ɓeɓrezle-rizze na Liban wabeweŋ dassoŋ aka milɓe nawra sa? Iŋkile zazay məzəzzoŋ sə guw wakkpa'aŋ sa?

¹⁵ Ya ɗiy naw azgətaŋgək kiwa. Sit zəgeɗ en tektekiŋ ɓa ndəɗaŋ əzlaŋ sitin tursan yaŋ amzlegitin səket tiveɗ net en adazban farə, vi kawmbat də maksaf məza dəka tive təstəs ɓa.

¹⁶ Akkpaŋganənək dələv net va təki məpiweni gəm nafyok akan pay pakə. Məzutoŋ kəla dak pak wasan gərəŋ, waɓlan kini.

¹⁷ Va səmyã nammba pay nampum nədatreyet aba məzuzel neti. Də modoŋgbolwi ɓa na də harawi nədawlet pay na əray net ɓa.

Wən mətuvuro aka məskəleŋ Yeremiya

¹⁸ Aɓɗaŋ na: Mide mətuvur səm wən aka Yeremiya, mahenziŋ azəna vi məsdəlveŋge tahəŋ ɓa ɓa, əzga' vi məsmaɗɗula tay ɓa ɓa, əpel na Maŋgəlva vi məskəleŋɗe tahəŋ ɓa ɓa. Məndam sa akani, məraygən səm iya nani, əpel nan tay mədazga sləma akan ɓa.

¹⁹ Azgə sləma akawa Yawe, aprəm əpel net məzuseɓɗe azawa.

²⁰ Amndaganən mambray a gəla moggon sa? Net aso'oŋguk vov kawzawa. Aɗɗum na, in tat əziw aboko vi kawpel moggon aka wən net kawzargən ədagədəv nok səketi.

²¹ Vini kana appet kirtit addəv mayã, appet ama masalam. Kirtit gil net dəmtaŋgə, zilŋgiɗit dəmtaŋgə, Dəbeyin gewleɗ net də masalam addəv əgaya.

²² Vaŋvəl dəprəm eŋgil anetda pay kədawki vanday net məzəlpaŋ girzik aketi. Vi aso'oŋguk vov karmuwa, aɗamanənək bizwil narma təlwa.

²³ Ya isi Yawe kəsənək əsler net akaw gərak nawbaywa. Kəppan sit heslepe net ɓa, kəvvuyon mambray net səbok ɓa. Dəskotoŋ aboko, atawwən aket pay ədagədəv noko.