Yeremiya 17 - Bible en Guidar

Mambray na Yuda

¹ Mambray net ɗiy na Yuda məverni də mabəl na təbəz ɓəɓəla. Məverni aka kalaɓ na mekreti gəm aka moho təki nawzaɓ Maŋgəlva neti.

² Va adaɗɗumoŋ aket kirtiti tay əɗɗumoŋ aka təki nawzaɓ Maŋgəlva neti, aket Astereɗ meŋgilveɗ neti, ameŋgevet wəleŋɗe məndufti aket mossorgoɗe məɓeyti.

³ Aw mossorgo naw na muyã arya nokoko, əzaɓ nokoko gəm gəleɗe-nettuyeŋge nokoko, wanəppan sən popoho, aka wən na mambray naka dələv nokəŋ pakə.

⁴ Is sən kiyuk wakəppan dələv nok məs nəpsuko. Wanəkkpoŋgok balam net məzuzelɗe nok aka dələv məs kəsən ɓa. Vi kəsɗanənək offo na ədagədəv nawa, wasan gidigidi hã faɗə.

Fendeŋ an ga'ə, fendeŋ an gesiŋ

⁵ An Yawe anah yaŋka: Əray aka ɗəf məs dəɗi əɗɗum nan aka ɗəf tirtiri məs dəɗi kiyən aka gbogboŋ na zəni məs dəkkpaŋgan makran səka Yawe.

⁶ Wasan va degirgeɗ kpiŋ a təki warwarə. Awla na ɗah zazay ɓa! Wasan aka təki mukuro a kapta-muyã, aka dələv meleme məs ɗəf asan na də gəla akan ɓa.

⁷ Əzaɓ aka ɗəf məs dəɗi əɗɗum nan aka Yawe məs Yawe asan zəga nawges nan azani.

⁸ Wasan va wəlaŋga məmpan a met iŋkile, tay əka slalwayən kəla lolohõ. An təki kakãh adeke, awgeslne ɓa, van meddəkan adawsani. Aka əzva na koloy na tay dədawfayãn ɓa, appan na uwa ɓa.

⁹ Makra ɗəfi məmbəɗan ɗəf dayki zəga pakə, anzaɗ ɓa. Naway nawsən wən nan di?

¹⁰ In Yawe in tat ula an dəsan a makra ɗəfa, in tat əkoson əɗɗumo. Wanəfaɗ sən naway pak va aza ədaw nani, gəm aza wəza nani.

¹¹ Va taɓraw məs dəvoŋ aket ɗeŋzle məs awəŋ ɓa vaski məgəɗ arya məs də tiveni ɓa. Aka dadak ənziya nani, arya nan wappani aza əggrak nan na wakkpaŋ mitemin.

Daya takərgəni suwer ənziya

¹² Gəla salala nami yi mazaŋga na məlĩ an gagdak məɓayəŋ də ətəŋ nani!

¹³ Yawe yi məs Israyel aɗi kiyən akani, ɗiy en dəzgokun pak wil areti! En dəzaraŋ səzok wazaŋ va iya məverin aka burɗuku. Vi azgokunko, Yawe is heret iŋkile na zeŋgile.

Əkkam na Yeremiya

¹⁴ Yawe anzaɗwa wanənzaɗə; akõhguwa, wanəkõhu, istə nədawgagdokoko.

¹⁵ Net yaŋ tay ənah suwən na: Ŋgay an Yawe apel nak kandi? Dəgəɗ kana!

¹⁶ Naw nəɓoŋ dassaw məzutaɗa abok ɓa; Nok kəsənəka, nəŋglu pay na tatwãh əzzan ɓa. An dəgil sə mawa, tay aboko.

¹⁷ Kədassok su zəga nawgeslne sən ɓa, istə təki nawɗam naw aka pay na tatwãha.

¹⁸ Məzuzəmguwən sahã dərbaŋ wili, naw nədarba wil ɓa hara! Ageslnegiti naw nədawgeslne ɓa hara! Aki pay na tatwãh aketi, aŋzlet əŋzla təl sula.

Ətəlma nawɓe' sən pay naffete

¹⁹ An Yawe anah su yaŋka: Dok əziw a maddamba na gəla net ɗiyi, də təki milyeŋge na Yuda adawtoŋgoŋ gəm adawgilyoŋ sə walaŋgəla-metiŋgini; gəm a maddambeɗe na Yerusalem temtem pakə.

²⁰ Kənah sitgən na, milyeŋge na Yuda, ɗiy na Yuda gəm ɗiy na Yerusalem mətoŋgoŋ kəla maddambeɗeŋ pakə: Məprəm əpel na Yawe.

²¹ Vaŋki Yawe anahə: Kiykum adassokum əsla zəga pay naffet ɓa, kədawtoŋgənən zəga təttaka kəla maddambeɗe na Yerusalem ɓa.

²² Kədawgilginin zəga nawsla səŋgil anokum da pay naffet ɓa, kədaɗɗaŋ wəza ɓa, məgagdakan pay naffet va nəɗi wən nan sit efiŋgiɗkum.

²³ Net dəprəmaŋ ɓa, dəpakən sləmet ɓa, aɓɓəlanənək kiyti, vi adaprəmnən ɓa, ka adawrahaŋ əzga' ɓa.

²⁴ Yawe aɗiyman na: An kəprəmwənka, Kətoŋgənən zəga nawsla pay naffet kəla maddambeɗe na walaŋgəla-metiŋginiŋ ɓa, gəm kawgagdakan pay naffete məza əɗɗaŋ wəza zəv awandi pak dəpas ɓa na,

²⁵ asna milyeŋge dəssoŋ aka mazaŋga na məlĩ Davit, məzədawaŋ dit pilseŋge awaniɓa aket mawteɗ net pilseŋge, ɗiy gagdakɗe na wəza neti, ɗiy na Yuda gəm ɗiy na Yerusalem, ɗiyis pak watoŋgoŋ kəla maddambeɗe na walaŋgəla-metiŋgini, walaŋgəla-metiŋ vanəs wasan dit ɗiy addəvən hã faɗə.

²⁶ Ɗiy wazzoŋ səddivit walaŋgəleɗe gugriɗ na Yuda, na maŋgava Yerusalem, səka dələv na Benyamin, sə Bagərma, səka mossorgo metiŋ gəm sə Dohoŋ. Wakiyaŋ əvəl nawzla kurmbuɗuku gəm əzaɓ-Maŋgəlva, əvəl na zəga na mabardaw gəm tursan, wakiyaŋ əzaɓ-Maŋgəlva naɗɗa əsoko addəv gəla na Yawe.

²⁷ An kəprəmwən ɓa, kəgagdakanən pay naffet ɓa, kəkiyaŋgək zəga nawsla kəla maddambeɗe na Yerusalem pay naffet na, asna wanəɗi offo sit maddambeɗe nani. Wazle gəleɗe lelewɗe na Yerusalem, amtə na ɓa.