Yeremiya 16 - Bible en Guidar

Yeremiya asanək bokgor

¹ Əpel na Yawe ade suwək dawnəh na:

² Kədawɗiy guluk ɓa, kədassok də uwa nok mezeŋgleket may muguluŋgit aŋ a təkiyəŋ ɓa.

³ Vaŋki Yawe anah aka wən net kirin mezeŋgleket gəm aka wən net en muguluŋgit muwet a təkiyəŋka, aka wən net may met en duwenini gəm aka wən net efiŋgiɗit en dəzoŋgolnin aka dəlvəŋka.

⁴ Əmta damtaŋ sit gbəgbaɗe, kaɗɗay gəlabeyit ɓa, kawndikti ɓa. Wakkpaŋgaŋ ka ba'ar aka dəlvafuŋ. Waggrakaŋ ama masalam gəm sən mayã, kiygəbay net wasan zəga nawzəm net biŋgeɗ na disiŋ gəm zəgeɗ nawra.

⁵ Vi vaŋki Yawe anahə: Kədawtoŋ a daŋgla əzəm way na gəlabay ɓa, kədaddok əhəm na gəlabay ɓa, kədasɗet na gəlabay ɓa, vi nəgəmək zazay naw səket ɗiyiŋki, moggon nawa gəm ulasahã nawa, Yawe aɗiymani.

⁶ Ɗiy gugriɗ dit memeɗeŋɗe wamtaŋ səka dəlvəŋka kawndikti ɓa, kawhəmi ammbet ɓa, kantarani zə ɗəfa may əɗɗa ɗuŋgul ammbet ɓa.

⁷ Kawzəmi way də ɗəf a gəlabay vi kaffeten sən makran aka wən na ɗəf məmtən ɓa, kapsəni zəga nawsa vi kaffeten makran ɓa, kəta afən dəmtə, kəta man təmtə zlaŋgə.

⁸ Kədawtoŋ addəv gəla nawzəm na wəzləra vi kawsok əzəma may əsa dənɗaŋ ɓa.

⁹ Vi vaŋki Yawe Məzuɓappak Maŋgəlva na Israyel anahə: Pay dəpaŋ in yakəŋ əɓətgən səma horokum gogoyo na ənnek mamyãk-mamyãkə, gogoyo na ənneke, gəlya na gawla dəɓeli, gəm gəlya nat waŋ məɓelit sə təkiyəŋka!

¹⁰ Pay kədawnah zəgeɗis sit ɗiyiŋki, asna wanahaŋ sukun na: Aka mi Yawe apel tatwãh metiŋ vas akam di? Mi heslepe nam di? Mə mambray mi məraygən sən Yawe Maŋgəlva nam di?

¹¹ Asna kəzlangən na: Vi efiŋgiɗkum azgawənka yaŋ azbetin meŋgilveɗ meɓɓeti, aɗɗaŋ sitinik wəza, appu'oŋ abeti, Yawe aɗiymani. Yaŋ naw azgawəni, dərmanən mahenziŋ naw ɓa.

¹² Nokum tamə kəɗɗaŋgək mambray day kiy an net efiŋgiɗkum; Naway pak tay əzban an makra ɓəɓəl daryaw aŋgələ, məza əprəm maw ɓa.

¹³ Ya wanəndolkum səka dəlvəŋ aka dələv məs mənokum dit efiŋgiɗkum kəsənnən ɓa. Wakəɗɗaŋ wəza sit meŋgilveɗ meɓɓet dəfəɗ də kapay pak adaka, vi naw nəwəl na sahã akokum ɓa.

Əmilye an gədakə

¹⁴ Vi pay wade Yawe aɗiymani, kawnəhi əmpa na, də iya na Yawe madaran məs dəgilgit mə Israyelɗe səka dələv na Eziptə ɓa!

¹⁵ Kawnəhi dərəŋ na, də iya na Yawe madaran məs dəmilgit mə Israyelɗe səka dələv na kəla disiŋ gəm səket dilveŋge məs aɓɓehet adak pakə, wanəmndeget aka dələv net məs nəpsit efiŋgiɗti.

Məs dəraygənən pak karmeti

¹⁶ In yakəŋ əslən mərmaŋ ɗiy diyɗa də zəva, Yawe aɗiymani, warmenini, səbbər asna, wanəslin mətəvəlaɗe diyɗa wateketin aket mossorgoɗe gugriɗe dit mossorgoɗe pakə hã gap a poporit gərmeŋge.

¹⁷ Vi haraw tay sekke aket tiveɗ net pakə, aɗamaŋ na səbaw ɓa, heslepe net azə na səma haraw ɓa.

¹⁸ Wanəfaɗ sit heslepe net də mambray net təɓələn sula, vi arnokonənək dələv naw də kiygəbayit zəgeɗ daryawɗe neti, aknahənək dələv nawzəmgəla naw də zəgeɗ net mbəreyti.

Ɗiy pak asənənək Maŋgəlva an gegesiŋ kana

¹⁹ Yawe istə gbogboŋ nawa, təki nawzeŋ nawa, təki nawɗam naw aka pay na tatwãha. Azoki ɗiy-ɗar adazzoŋ hã səket meŋge na dəlva. Wanahaŋ na: Uwawəni kaka' efiŋgiɗim armaŋgə awziweŋ aka wən taka ɓa tay an nawtər wəray azet ɓa.

²⁰ Ɗəf wazaɓ meŋgilveɗ nan sa? An azaɓ vet meŋgilveɗiŋ ɓa.

²¹ Vi aski, aka aŋ na in yakəŋ ərban sit gbogboŋ na vawa. Wasənnən kan na iya naw na Yawe yi.