Yeremiya 15 - Bible en Guidar

¹ Yawe aɓsu na: Kəta Moyis də Samiyel dəziweŋ abaw əkkam ammbet zlaŋ, kiyu asan na aket ɗiyəŋ ɓa. Arɓehet səbawa, dəgilyoŋgu!

² An anahaŋ sukunuk na: Aŋga mədaddam di na? Kəzlan sitgin na: An Yawe anah yaŋka: An namta sən əmta! An na masalam ama masalam an na mayã sən mayã an nawsimgini, kawsimgini!

³ Tatwãhɗe temtem poɗo nədataw aketi Yawe aɗiymani; masalam wabileti, kirɗe wakdehnin ɓa'ə, mogdokɗe gəm zəgeɗ nawra wazlornin gəm wampirini tutu'u.

⁴ Wanəkkpeŋget mbəreyit a maheret milyeŋge na dələv pakə. Vi Manase wətən Hizkiya məlĩ na Yuda sən an agəɗ a Yerusalem.

Wən van abanək Yawe

⁵ Yerusalem, naway nawla sahã akok di? Naway nawhəmguk di? Naway dədamzlah əttokon zay nok di?

⁶ Yawe aɗiyman na, istə kəzgawa gəm kuktu' dəɓok suwa. Nəslanək vaw akoko, nəzokko, vi nəyək dawla sasãhko.

⁷ Addivit walaŋgəleɗe gugriɗ naka dəlva, nəseŋgerik ɗiy naw də tekpesle nawseŋger zəga; nəzetike, nuwɗeketik dit kirtiti, ya dədəɗanən ədaw net ɓa.

⁸ Nənzlirgitik gil net gəbayɗe hõnyõ' hõnyõ' day ki hoyoŋko a məlpa. Də tataŋ paya, nəkiyək əza akat ma gawla nalpa; midigirzike, nəggbo' əkker də geslne akata.

⁹ Məs tuwə kirin buhul tətdakka əmpəs agilik səzata. Pay nat atəpək də kapaya. Zəga net wili azata, zət baybayə. Medembirgit na, wanəppet ama masalam abet məzuzelti, Yawe aɗiymani.

Yeremiya tay əɓuhmani, Maŋgəlva atafək wəza nani

¹⁰ Aw haya, vimi əmma təwu di? Nəkkpaŋgək zəga narma mama azawa, gəm nawgəɗ sən memeɗəŋ aka dələv pakə. Nəpsən dəmən sən ɗəf ɓa məvayə dəmən ɓa'a ya naway pak tay ərawa.

¹¹ Yawe kənah suwək na: Sessel wanəkuk aka moggoni, sessel wanəɗɗa ka aka pay na tatwãha gəm aka pay na əzəmsahã məzuzelɗe dəkayokungəni.

¹² Kawɓapi əŋzlu təbəz titir sa sasak təbəz titir dəde sə kəla disiŋ may təbəz pepreŋ sa?

¹³ Wanəppan arya nok də əzaɓ nok sən popoho, kawfaɗ suki ɓa vi mambray nok məs kəgəɗ aket meŋge na dələv nok pakəŋka.

¹⁴ Wanəkkpaŋgok balam net məzuzelɗe nok aka dələv məs kəsən ɓa, vi ədagədəv naw arəmək offo, tay vakvak akokum.

¹⁵ Isi Yawe kəsənəka. Aɗɗum akawa, abbah suwa, akə wən ammbawa məza ammbet məzərɓahawən ɓa. Nədamta sən ɓatɓat nok ɓa! Asən na in tat əɓəs əra aka wən noko.

¹⁶ Səza nərəh əpel noko, nəzəmka; əpel nok asanək azaw mamyãk-mamyãk gəm ənnek a makrawa, vi də iya nok adawyəwəni Yawe Maŋgəlva Məzuɓappak.

¹⁷ Nəsaw ɗah aweleŋgit məzumasaŋ əsmay ɓa. Sən kəska wəlawi nəsaw matakərguwa vi kədan suwək gədəvwa.

¹⁸ Vimi əzəmsahã naw asan faɗ di? Gəm uwwa naw məs anzaɗ ɓa aɓoŋ danzaɗ di? Is tat azaw va lolohõ məs dədakkpa' aziwgit iŋkile ɓa!

¹⁹ Vini Yawe anah na: An kəmilke, asna wanətafko, wakəziw abawa. An kəsənək əgohon əpel an moggon səza an ɗarə asna wakəsok mawa. Ɗiy wamilyoŋ azoko, istə namndok azet ɓa.

²⁰ Wanəkkpaŋgok va zlava na təbəz pepreŋge gboloŋgboloŋ azet ɗiyiski. Wagayaŋ də isi, askanən na wəlok ɓa hara. Vi in tat də isi, kawkõhguko gəm kawbitko, Yawe aɗiymani.

²¹ Wanəporslokuk səmmba vet ɗiy mbəreyti, wanəpuluk səvet məs gagayɗe.