Yeremiya 13 - Bible en Guidar

Yeremiya də helege na gize na ngərayã

¹ An Yawe anah su yaŋka: Doko, kəlbahgən helege na gize na ngərayã, kiynangən a gizeko, asla zuko kədawyopən aret iŋkile ɓa.

² Yaŋ nəlbah helege na gize nak va Yawe anahə, yas niynan a gizewa.

³ Yawe apel su masula'ən amna:

⁴ Agəm helege na gize məs kəlbah dəsan a gizok naka, dok a məlpa na Efrat. Aɗaman a popor gərəm adaka.

⁵ Yas nəmmbat a Efrat, nəɗaman va Yawe aɗi su wən nani.

⁶ Sədərɓaga əvoŋ diyɗa, Yawe anah suwək na: Asil amndok a Efrat, agəm helege na gize məs nəɗi suk wən nan kəɗamangən nak sədaka.

⁷ Nəmndawək kan a Efrat, nəkayanək helege na gize sə təki məs nəɗaman naka, yas nəkdah sədaka. Nula na, helege na gize nak arayka atər na kpak ɓa.

⁸ Yaŋ Yawe apel su dawnəh na:

⁹ Vaski nədawzan əɓaygənkiya na Yuda gəm əɓaygənkiya metiŋgin na Yerusalem Yawe anahə.

¹⁰ Ɗiyəŋ mbəreytiŋ məzuɓoŋgoŋ daprəm əpel nawəŋ, məzəzbanən əɗɗum na mekretiŋ, məzəzbetin meŋgilveɗ meɓɓet kawgəɗ sit wəza gəm kappu' abetiŋki, dəkkpaŋgaŋ va helege na gizeŋ məs atər na kpak ɓaŋka!

¹¹ Va ɗəf adaynan helege na gize a gizeni, vaski niynet ɗiy na Israyel gəm ɗiy na Yuda pak Yawe anahə, dəkkpaŋgaŋ suwənəngən ɗiyi, ka sləmawa, ka zəga nawɗi kiywa gəm zəga na gawla nawa, ya dəprəmaŋ ɓa.

Mbazla na ədagədəv na Maŋgəlva

¹² Kənah sitgin əpeliŋ də wənah na: Aŋki an Yawe, Maŋgəlva net mə Israyelɗe anahə: Mesteɓe pak dəsan məknahən də mbazla. An azlanaŋ sukunuk na: Məsən na mesteɓet pak dəknahaŋgən də mbazlay ɓa sa?

¹³ Kənah sitgin na: An Yawe anah yaŋka, wanəbet ɗiy naka dəlvəŋ pak də mbazla hã ndən bay əbeyti, milyeŋge məs dəssoŋ aka mazaŋga na məlĩ Davit, məsdəlveŋge, məskəleŋɗe gəm ɗiy na Yerusalem pakə.

¹⁴ Wanəɓeheti, an taka aka an mbərən, əfiŋgiɗit dit kirtit pak matakə Yawe aɗiymani. Nəmbər na ɗəf ɓa, nəwəl na sãhã ɓa, nə'ugit dawzet ɓa.

Məprəmə vi kədawnahaŋ na va awsən na ɓa

¹⁵ Məprəmə, məpak sləmokum, kədaɓɓəlanən kiykum ɓa, vi Yawe tay əpele.

¹⁶ Məgagdakan Yawe Maŋgəlva nokum tak adawki guzliyo, tak təlkum adaŋgbay azet mossorgoɗe sən guzliyo. Əkeɗeɗe kədawgaŋ kəta, ya akkpaŋganən ka guzli tiɗimi kpaŋgən va guzli na buna.

¹⁷ An kəprəmən əzga'əs ɓa, wanəhəm mahaɗama sən əkaɓ nokum, wanəmet sini, haraw wasan zletzlet dit sini, vi məkani gazlaŋ na Yawe aka balamə.

Əpel na Maŋgəlva sən gəla na məlyã

¹⁸ Anah sən məlĩ dət ma'ãyə̃k nan na: Məɓe'gin kiyzukum, məssoŋ afuŋ vi kulpup na gagdak nokum dədannek zukum abətək səkokum.

¹⁹ Məmsani met walaŋgəleɗe gugriɗ na Negev ɗəf tay dədawkolit ɓa, vi məsimgini Yuda baymani, məsimgini tutu'u.

Mərbəsəni wil sən Yerusalem

²⁰ Məsilgin horokum mule ɗiy en dədazzoŋ sə kəla disiŋ. Ngay gazlaŋ net gilew məppan avok lahəŋ məzənnek zukuŋ di?

²¹ Mə kədawnah pay adawgayaŋ də is di? Kəsərəkgitik də bayna nok ka kiyko, Kəttəman na tatwãh va guluk məɓay uwa ɓa sa?

²² Ya an kənahək a mokrok vimi zəgeɗ vas adawrəwən di na? Vi memetiŋ na heslepe noki məkros gabba lukut nokum məsilipi, gəm mərma motokpotokpo təlko.

²³ Mə Etiyopiya waddəɗan gəba zən sa? Awaniɓa balgam ŋzezlezle na zən sa? Vasna mənokum wakəɓapaŋ əɗɗa an dəslə mənokum məs kəsərəkaŋ əɗɗa mbərayən.

²⁴ Wanətreyet va eslesle ammba səmyã na kapta-muyã.

²⁵ An nawruhuk yaska, haran nok an səvawa, vi kəzgətək kiwa kəɗi kiyuk aka uwawəna Yawe aɗiymani.

²⁶ In sən kiyu wanəslan gabba lukut məsilip nok hã aka horok, kawlani zəga nawki wil aroko.

²⁷ Əkəw a gizbe noko, fĩfĩ noko, wil na polkoyo noko! Nulek aket mossorgoɗe gəm awra, nulek zəgeɗ daryawɗe noko! Mə əray mi akokəŋ di Yerusalem, kawŋgəm əbbur zuk əzbaw ɓa! Ka dewe kandi?